وصفة الموز بالقرفة اللذيذة و السهلة بالمقادير والخطوات

وصفة الموز بالقرفة اللذيذة  هى وصفة بسيطة وسهلة  علشان لما تحبيى تعملى صنف حلو خفيف ومختلف، اعرفى معانا  ايه هى وصفة الموز بالقرفة اللذيذة والسهلة جدا و ازاى تعمليها فى 3 دقايق بس وبمكونات كلها بسيطة ومتوفرة عندنا فى البيت !  يعنى مش هتكلفك اى حاجه وبدون اضافة سكر، وده بيخليها مفيدة لانه السكر الطبيعى اللى فى مكونات الوصفة دى هيعزز من اكتساب جسمك الطبيعى للسكر وده بيقلل من خطر الإصابة بأمراض القلب و السمنة.

المميز فى الوصفة دى كمان انها بتعتبر low calorie recipe او وصفة قليلة السعرات الحرارية، وده معناه انه لو كنتى بتعملى دايت وعايزة تكلى حلو، تبقى  هى دى الوصفة المناسبة ليكى، وده لانها تقريبا خالية من اى مواد دهنية وكمان خالية تماما من السكر، والسكر اللى فيها بييجى من مكوناتها و كرملة الموز، وصفة الموز بالقرفة بتحتوى على 270 كالورى بس، و  19 جرام من الكربوهيدرات.

وصفة الموز بالقرفة اللذيذة و السهلة بالمقادير والخطوات..

المقادير :

– معلقتين أكل من العسل الأبيض الخام.

– معلقة أكل من القرفة المطحونة.

– ربع معلقة صغيرة من جوزة الطيب.

– سبراى مضاد لإلتصاق الطعام ” ممكن تستبدليه بانك تدهنى الصينية زيت او زبدة مع رشة دقيق”.

– حبتين موز حجمهم كبير مقطعين شرايح رفيعة.

طريقة التحضير:

1- امزجى العسل مع القرفة و جوزة الطيب فى بولة او طبق صغير.

2- فى طاسة تيفال او سيراميك او اى نوع مضاد للإلتصاق على حرارة متوسطة لعالية، رشي رشة من السبراى المضاد للإلتصاق او ادهنيها بمعلقة زيت او زبدة صغيرة.

3- ضيفى الموز و سيبيه يستوى على نار هادية مع التقليب من دقيقتين لـ3 دقايق.

4- ضيفى مزيج العسل مع القرفة وجوزة الطيب للموز، وقلبى برفق لمدة دقيقتين لـ3 دقايق، او لحد ما الموز يبقى ناعم اوى.

5- ارفعى المزيج كله مع النار ويقدم ساخن.

يلا جربيها وقوليلنا رأيك، وشوفى معانا كمان 13 اكلة سهلة ممكن تعمليهم في مج لو مش عايزة تاكلي كتير .