10 قطع ملابس اساسية للخريف لازم يبقوا فى دولابك
فصل الخريف بيعتبر من افضل شهور السنة وبيعتبر بداية جديدة، ولانه كل بداية جديدة بتحتاج تجديد فى حاجه من حوالينا، يبقى اهم حاجه لازم تغيريها فى فصل الخريف السنة دى هى ستايلك! فى الخريف بتبدأ الساقعه تقل وبيبدأ الجو يدفى ويحلو شوية بشوية وده معناه انه خلاص هنشيل الجواكت التقيلة و هنبدأ نطلع الهدوم الخريفى المريحة بألوانها وخاماتها المميزة جدا. علشان كده فى المقال ده بنات حوا هتقولك على 10 قطع ملابس اساسية للخريف تجددي بيهم دولابك ..
10 قطع ملابس اساسية للخريف لازم يبقوا فى دولابك
1- شنطة الضهر :
شنطة الضهر او الـ backpack هتمشي مع تقريبا كل لبسك النهارى وهتديله شكل حلو جد، المميز فى شنطة الضهر اللى هتشوفيها الخريف ده هى انها ممكن تتشال كروس او على الضهر، وهتلاقى منها أحجام مختلفة تستوعب كل حاجاتك المهمة زى اللابتوب والدفاتر و الكتب خصوصا لو كنتى من طلاب الجامعة، الشنطة دى عملية ومرنة وفى نفس الوقت شيك.
2- قميص chambray :
القميص الـ chambray او الـdenim راجع تانى بقوة بدرجاته والوانه المختلفة، و هنشوفه كتير فى موضة خريف السنة دى. اعملى لوك مميز بأن تلبسيه مع بنطلون بلون فاتح زى الابيض او البيج او البينك وشوز مناسب.
3- بلايزر جملى :
قطعة تانية لازم تبقى عندك من ملابس اساسية للخريف هى البلايزر الجملى، البسي البلايزر الجملى فوق توب او قميص بلون خريفى مناسب علشان تعملى layer look حلو و على الموضة،وممكن كمان تلبسيه فوق قميص chambray. او مع فستان نهارى بلون أسود وكعب عالى، اللوك ده مناسب للجامعة والشغل واجتماعاتك المهمة.
بلايزر جملى
4- شوز greige :
الشوز ده بلونه ميزته انه ممكن يتلبس مع تقريبا اى حاجه، جربي تلبسيه مع ستايلات لبس مختلفة بين البنطلون و الجيبة او الفستان الكاجوال وهتلاقى شكله حلو ومميز.
5- trench vest :
الكارديجان الطويل اللى بيوصل طوله لحد الارض او الـ trench vest، بيعتبر طريقة حلوة و stylish علشان تخلى اللوك بتاعك مميز اكتر، جربى تلبسي الـ trench vest بلون بترولى مع سكينى جينز غامق وشوز مناسب.
6- جاكت suede :
موضة الجاكت القطيفة او الـ suede jacket لسه مكملة معانا لموسم الخريف. جربى تلبسي الجاكت ده باللون الجملى او البيج بدل الجاكت الاسود اللى اكيد مفيش بنت فينا مالبستهوش كتير طول الشتا، وممكن تلبسيه تقريبا فوق اى توب ومع اى جينز تجبيه، عايزة ستايل حلو؟ البسي suede jacket مع جينز اسود و تيشيرت ابيض واعملى لوك خريفى ماحصلش :) ، شوفى هنا ستايلات أنيقة للبس الجاكت والبالطو القطيفة SUEDE JACKETS
7- شوز ankle strap :
النوع ده من الشوز هيبقى منتشر جدا فى الموضة ومن ملابس اساسية للخريف اللى لازم تبقى فى دولابك، اشترى شوز فلات بـ strap من عند الكعب علشان تخلى الستايل بتاعك اليجانت اكتر، وكمان الشوز ده من غير كعب بيخليه مناسب لمشاوير طول اليوم و مثالى للشغل او الجامعه لانه مريح بدرجة كبيرة وكمان شيك فى اللبس وهيمشى مع كتير من هدومك.
8- felt hat :
الـ felt hat بتعتبر من اسهل الطرق علشان تنقلى ستايلك من الستايل الشتوى للستايل الخريفى او الصيفى، ضيفى قطعة الملابس دى للوك بتاعك و اعملى حاجه مختلفة وخاصة بيكى.
9- بدى برقبة turtleneck :
البدى برقبة عالية او الـ turtleneck بيعتبر قطعة ملابس استعمالاتها متعددة و هتفيدك كتير، ممكن تلبسيه مع denim shirt مفتوح او تلبسيه تحت فستان نهارى او حتى تدخليه فى الجيبة وتلبسي عليه كارديجان قصير، البدى ده بيعتبر اساس لستايلات كتيرة ممكن تدخليه فيها و تعملى بيه looks مختلفة عن بعضها.
10- كارديجان منقوش :
آخر قطعة ملابس للخريف معانا هى الكارديجان الخريفى المنقوش، واللى بيعتبر طريقة سهلة علشان تفضلى متدفية وفى نفس الوقت شيك، البسى الكارديجان المنقوش على جينز بأى لون تحبيه وتوب ساده مع اكسسوار مناسب.
شوفى كمان افضل 10 افكار ستايلات لبس الخريف والشتا
