روتين الاهتمام بالبشرة لسن التلاتين لبشرة متألقة
حلم كل بنت فى اى عمر من غير شك هو انها يفضل جمالها دايم وتفضل بشرتها نضرة ومشرقة، خصوصا مع بداية سن التلاتين لانه فى الوقت ده طبيعة البشرة بتتغير و ممكن تبدأ تظهر عليها الخطوط البسيطة ويبان عليها التعب والارهاق اسرع، علشان كده البشرة فى السن ده بتحتاج اهتمام اكتر وعناية خاصة، مثلا الممثلات اللى سنهم كبير بنلاقيهم فى الحفلات وعلى ال red carpet بشرتهم نضرة و شابة حتى لو سنهم كبير وده بيرجع لانهم بيهتموا لبشرتهم اهتمام كبير وخاص جدا، وطبعا هما مابيكتفوش بالعلاجات والوصفات المنزلية اللى احنا بنستخدمها واللى ممكن تكون مفيدة جدا، لكن كمان بيعتمدوا على العلاجات الجاهزة و مراكز الاهتمام بالبشرة والـ spa و الـ beauty therapy.
ولانه مش كلنا نقدر نروح الـspa و نستخدم العلاجات الغالية، فى المقال ده بنات حوا هتقولك على روتين اهتمام خاص بالبشرة لسن التلاتين واكتر علشان تفضل بشرتك متألقة ونضرة مهما كان الوقت .
روتين الاهتمام بالبشرة لسن التلاتين لبشرة متألقة ..
اول لما بيبدأ سن التلاتين، بنبدأ نلاحظ ظهور علامات تقدم السن البدائية و تجعيدة صغيرة او اتنين، او ترهل الجلد شوية عند الدقن و مسام البشرة الواسعه. علشان كده هو ده الوقت المناسب علشان تبدأى تهتمى ببشرتك اكتر.
1- تنضيف البشرة :
منظفات البشرة بتساعد فى ازالة الطبقة السطحية من البشرة اللى بتبقى مشبعه بالاتربة و الزيوت، اختارى منظف للبشرة خالى من الصابون و يكون اساسه مائى وخالى من الكحول واستعمليه بشكل يومى.
2- تقشير البشرة :
تقشير البشرة بيعتبر خطوة مهمة فى روتين الاهتمام بالبشرة لسن التلاتين علشان تتخلصى من الاتربة والخلايا الميتة، بس برده خدى بالك انه التقشير المبالغ ممكن يضر بشرتك ويسبب التهابات، اكتفى بانك تعملى جلسات تقشير لبشرتك مرتين فى الاسبوع.
3- السيروم و التونر :
السيروم والتونر بيستخدموا لتلطيف البشرة وغلق المسام بعد التقشير، استخدمى التونر دايما علشان توفرى لبشرتك الترطيب وتحافظى عليها نضرة.
4- ترطيب البشرة :
ترطيب البشرة بيساعد على تجديد خلايا البشرة، بعد ما تغسلى وشك استخدمى كمية مناسبة من كريم الترطيب اللى فيه معامل حماية من الشمس SPF علشان تحمى بشرتك من أشعة الشمس فوق البنفسجية الضارة. ولانه فى بعض الكوافيرات ومراكز التجميل بتعمل جلسات تنضيف عميق للبشرة و جلسات علاج الكلف وعلاج حب الشباب وغيرها، حاولى ماتعمليش اى جلسة علاج او تنضيف من دى الا اما تعرفى ايه هو العلاج المستخدم و ايه هى نتيجته علشان ماتضريش بشرتك.
5- علاجات الـ spa :
آخر خطوة معانا فى روتين الاهتمام بالبشرة لسن التلاتين هى انك تنفذى علاجات الـ spa. وفى نوعين من علاجات الـ spa، واحد لتهدئة التوتر و التانى لـتجديد شباب البشرة . وعلشان تختارى العلاج المناسب لحالة بشرتك يفضل تسألى دكتور بشرة او تروحى الـ spa لانه الحالات المختلفة للبشرة بتتطلب علاجات مختلفة، وعلاجات الـ spa ممن تبقى حاجه من دول :
– المساج.
– العلاج بالابر.
– النقع الكامل للجسم “فى الاعشاب او الطمى” .
– تقشير البشرة بالملح.
– العلاج العطرى.
مهم جدا لما تيجى تعملى علاجات الـ spa انك تسألى حد خبير و ماتستخدميش منتجات رخيصة او غير معلومة المصدر لانها ممكن تسبب ضرر كبير جدا لبشرتك ، شوفى هنا 10 طرق تجيبي بيهم ال spa فى البيت !
