ازاي تستعدي للنوم .. الحاجات اللي لازم تعمليها وتتجنبيها قبل النوم !

بقلمريهام محمود فيصحة visibility5747

بنسبة 50% مننا تقريبا بيعاني من مشاكل مزمنة في النوم وارق مستمر ومش بنعرف ناخد ساعات نوم كافية وبالتالي بنقوم تعبانين وجسمنا بيوجعنا ومش بيبقى عندنا طاقة لنشاطاتنا اليومية, عشان كده النهاردة احنا جايبين لكم نصايح الخبراء عن افضل طريقة للتحضير للنوم عشان تقدري تنامي نوم عميق وجسمك يكون مرتاح تاني يوم الصبح وتقومي نشيطة ومستعدة ليومك.

افضل طريقة للتحضير للنوم:

1- اظبطي ساعة جسمك:

لو انتي بتقلقي بدري اوي قبل ميعادك او مش بتنامي بسرعة في الحالتين ده يبقى دليل ان ساعة الجسم محتاجة اعادة ظبط لان ساعة الجسم او الساعة البيولوجية بتكون حساسة جدا لضوء النهار والضلمة, وفي دراسات حديثة اثبتت فعالية العلاج بالضوء في اعادة ظبط الساعة البيولوجية ل 57% من الاشخاص المصابين بالارق, كل اللي هتعمليه انك تقعدي جنب Lightbox لمدة 30 دقيقة يوميا او تستخدمي اباجورة كبديل, لو انتي بتصحي بدري اوي استخدمي اللايت بوكس بالليل لمدة 30 دقيقة, ولو بتنامي متأخر اقعدي جنب اللايت بوكس الصبح 30 دقيقة, الطريقة دي هتعمل اعادة ظبط لساعة جسمك.

افضل طريقة للتحضير للنوم
افضل طريقة للتحضير للنوم

2- الساعة 8 بالليل –  قبل النوم بـ 3 ساعات:

اتجنبي اكل وجبة تقيلة قبل النوم, والمفروض ان وجبة العشا تكون قبل النوم ب 3 ساعات تقريبا وخلي دايما وجبة العشا تكون خفيفة ومن غير توابل كتير, ولو انتي مش جعانة اوي ممكن تكتفي بالليل بسناكس خفيفف زي قطعة فاكهة او اي مشروب يكون خالي من الكافيين.

والجسم بيهضم الاكل بشكل افضل لو قعدة وجسمك مفرود او واقفة, لكن لما تاكلي وتنامي على طول ده هيخليكي معرضة لحرقة المعدة, وعسر الهضم, والربو.

وخلال النوم الجسم بيعمل اعادة تجديد للخلايا ولو انتي واكلة اكلة دسمة او تقيلة قبل النوم على طول ده هيخلي الجسم يستهلك طاقتة في هضم الاكل بدل اعادة تجديد الخلايا.

افضل طريقة للتحضير للنوم
افضل طريقة للتحضير للنوم

3- الساعة 10 بالليل – قبل النوم بساعة:

 هل في وجبة معينة ممكن تساعد على النوم ؟ اثبتت الدراسات ان البوتاسيوم اللي في الموز بيساعد على النوم, عشان كده يعتبر الموز اختيار هايل جدا كوجبة خفيفة في وقت متأخر, كمان عين الجمل من الاختيارات الممتازة جدا كوجبة خفيفة بالليل لانه بيحتوي على هرمون الميلاتونين “هرمون النوم” وبالتالي ده هيساعد انك تنامي بشكل اسرع.

شاي الاعشاب كمان من الحاجات اللي ممكن تساعد على نوم سريع وعميق لانها بتصفي الذهن, ممكن تشربي مشروب البابونج او النعناع او اليانسون او غيرها من الاعشاب اللي هتساعدك على نوم افضل.

افضل طريقة للتحضير للنوم
افضل طريقة للتحضير للنوم

4- الساعة 10:15 – قبل النوم بـ 45 دقيقة:

ده الوقت اللي لازم تتوقفي فيه عن استخدام كل الاجهزة الالكترونية زي الموبايل, التابلت, اللاب توب, التليفزيون, لان الضوء الازرق اللي بيخرج من الاجهزة دي بيمنع انتاج الميلاتونين “هرمون النوم” وبالتالي ده معناه انه هيكون صعب انك تنامي بسرعة وتاخدي كفايتك من النوم.

الافضل انك لما تيجي تنامي تخلي التليفون بعيد عنك وترجعي لموضة المنبة انك تظبطيه عشان تصحي عليه بدل التليفون عشان يفضل بعيد عن ايدك.

وفي تليفونات بيكون فيها خاصية ايقاف الضوء الازرق’ ممكن تعملي اعادة ظبط وتظبطيه على الحالة الليلية.

افضل طريقة للتحضير للنوم
افضل طريقة للتحضير للنوم

5- الساعة 10:45 – قبل النوم بـ 15 دقيقة:

اظهرت الدراسات ان القراءة لمدة 15 دقيقة قبل النوم ممكن تساعد عقلك انه يفصل عن ضغط اليوم وبالتالي ده هيساعدك تنامي اسرع, ولو انتي مش من محبات القراءة اوي ممكن تسمعي حاجة هادية قبل النوم.

ولازم تتأكدي ان السرير مريح والمخدة اللي انتي نايمة عليها مريحة لراسك عشان تقدري تنامي نوم عميق ومريح ومتقوميش تاني يوم تعبانة.

افضل طريقة للتحضير للنوم
افضل طريقة للتحضير للنوم

6- الساعة 11 – وقت النوم:

قبل ما تدخلي في نوم عميق درجة حرارة الجسم هتبدأ تنزل ببطء, وده دليل على ان الجسم بدأ يفرز هرمونات النوم, وفي اشخاص بيحبوا يتغطوا بغطا تقيل اوي وغيرهم بينامو بغطا اقل او ارق, الحاجة المهمة في الحالتين ان تكوني مش حاسة بحرارة قوية وانتي نايمة لان ده هيأثر على نومك, يعني لازم تكوني نايمة في درجة حرارة مناسبة.

كمان نقطة تانية مهمة في بنات بيحبوا يناموا بالبرا او حمالة الصدر وبنات لا, وكان في اقوال ان النوم بيها ممكن يسبب سرطان الثدي لكن لحد دلوقتي مافيش دراسات اثبتت ده فلو انتي مش بتعرفي تنامي من غيرها او مش بتبقي مرتاحة غير وانتي لبساها مافيش مشكلة ممكن تنامي بيها بس البسي النوع اللي من غير Push up.

افضل طريقة للتحضير للنوم
افضل طريقة للتحضير للنوم

7- اكتئاب قبل النوم:

لو انتي من الاشخاص اللي دايما قبل النوم بيفكروا في مهما تاني يوم وبيبقوا قلقانين ممكن قبل النوم تعملي قايمة بالمهام اللي عندك تاني يوم من الاهم في المهم عشان تبقي مرتبة يومك ومش مضغوطة.

ولو دايما بتكوني قلقانة بتفكري في كل حاجة حصلت لك خلال اليوم اكتبي كل حاجة حصلت معاكي على ورقة يعني طلعي كل اللي جواكي على الورق وبعدين ارميها, الكتابة من الطرق الفعالة جدا للعلاج والتخلص من الضغوط والافكار السلبية.

افضل طريقة للتحضير للنوم
افضل طريقة للتحضير للنوم

7 حاجات متعمليهمش اول ما تصحي من النوم !

غلطات بنعملهم اول ما نصحى من النوم
غلطات بنعملهم اول ما نصحى من النوم