افضل 10 افكار لتجديد الديكور باستخدام رفوف الكتب

بقلمآية حسان فيمنوعات visibility2315

الناس اللى بتحب القراية بتبقى الكتب بتاعتهم غالية عليهم ومهمة بالنسبة لهم ، وبتلاقى الكتب بتاعتهم فى كل حتة وعاملين ليها رفوف او مكتبة مخصوص ليهم ، فلو كنتى من اللى بيحبوا الكتب ووجودها مهم بالنسبة لك وعندك كتب كتيرة  ، النهاردة هنقولك على استخدام جديد للكتب غير القراية وهى تغيير الديكور باستخدام رفوف الكتب ، علشان تقدرى تضيفى لمسة من الجمال لديكور بيتك وتغيرى فيه، اعرفى افضل 10 افكار لتجديد الديكور باستخدام رفوف الكتب ..

افضل 10 افكار لتجديد الديكور باستخدام رفوف الكتب

رفوف الكتب الملونة ممكن تستخدميها كلمسة جميلة فى تجديد ديكور البيت، وفى طرق كتيرة ومختلفة لاستغلال الكتب فى الديكور علشان تعملى لبيتك ستايل خاص بيعبر عنك انتى. شوفى فى المقال ده 10 أفكار مختلفة وسهل تنفيذها تقدرى تستغلى بيها رفوف الكتب واختارى منها اللى يناسبك :) ..

1- رف الكتاب على شكل قوس قزح :

دى طريقة لطيفة جدا و مليانة بالالوان المبهجة علشان تستغلى بيها رفوف الكتب ، رتبى الكتب بتاعتك حسب الوانهم وبعد كده رتبى مجموعات الالوان دى بترتيب الوان قوس قزح، ترتيب الكتب على الرفوف على شكل قوس قزح هيعمل شكل مختلف ومبهج فى البيت، علشان تعملى نفس الشكل اللى فى الصورة هتحتاجى كتب كتيرة لكن ممكن تعوضى ده بانك تستخدمى رفوف كتب أصغر، ولو ماعندكيش كتب ملونة ممكن تستخدمى ورق الجلاد الملون فى تلوين اغلفة الكتب بتاعتك علشان تعملى الشكل ده. ممكن كمان تضيفى شوية تفاصيل زى براويز الصور، الشموع او اى ديكورات تانية تحبيها.

رف الكتاب على شكل قوس قزح

2- رف الكتاب على شكل شجرة :

كل اللى محتاجاه علشان تنفذى رفوف الكتب على شكل شجرة هو رفوف زجاجية و دهان حائط او ورق حائط 3D على شكل فروع شجر، لو كنتى بتعرفى ترسمى ارسمى شكل الشجرة زى اللى فى الصورة و سيبيه ينشف وبعد كده ثبتى الرفوف الزجاجية على الفروع بنفس الترتيب، ولو مالكيش فى الرسم اشترى ورق حائط  او رسومات جاهزة 3D على شكل فروع شجر والزقيه على الحيطة وبعد كده ثبتى الرفوف الزجاجية بنفس الطريقة. الديزاين ده فريد ومختلف فى شكله وهيضيف لمسة حلوة اوى فى ديكور بيتك.

رف الكتاب على شكل شجرة

3- رفوف الكتب على شكل خلية نحل :

الشكل ده من رفوف الكتب هيبقى مناسب ليكى لو كان عندك كتب كتيرة، اختارى حيطة مناسبة فى البيت ونفذى تصميم رفوف الكتب على شكل خلية النحل، التصميم ده صعب تنفذيه بنفسك، لكن ممكن عند النجار ينفذهولك وبتكلفة مناسبة.

رفوف الكتب على شكل خلية نحل

4- رف الكتاب المعلق :

رف الكتاب المعلق بالشكل ده مختلف وفكرته جديدة جدا وهيدى شكل مميز للديكور فى بيتك، كل اللى هتحتاجيه هو قطعة خشب طويلة بحجم اللى فى الصورة ومشابك وخيوط قوية وعلقى الكتب بتاعتك بشكل جديد!

رف الكتاب المعلق

5- رف الكتاب الـ Chaotic :

الشكل ده من رفوف الكتب مميز وبيعتبر مودرن، هو تقريبا نفس فكرة رف الكتب على شكل خلية نحل لكن المختلف هنا هو ان الابعاد بين الكتب غير متساوية واحجام المربعات كمان مختلفة ، التصميم ده هيغير شكل الحيطة وهيخليه مختلف وفريد.

رف الكتاب الـ Chaotic

6- رف الكتاب على شكل بيانو :

علشان تعملى التصميم ده محتاجة يبقى عندك بيانو قديم ومركون، استغلى البيانو القديم وحوليه لقطعة ديكور مميزة، رف الكتاب على شكل بيانو هيحول الحيطة عندك لقطعة فنية فريدة !

رف الكتاب على شكل بيانو

7- رفوف للكتاب تحت السلم :

لو بيتك دورين وعندك مساحة تحت السلم عايزة تستغليها، حولى المساحة دى لمكان مخصص للقراية واعملى رفوف للكتب تحت السلم. اعملى رفوف خشبية زى اللى فى الصورة فى المساحة الفاضية تحت السلم واستغليها بشكل جديد.و ممكن كمان تلونى الرفوف او ترتبى الكتب حسب الوانها زى ما قولنا فى اول شكل للرفوف.

رفوف للكتاب تحت السلم

8- رف الكتاب على شكل حرف A :

ممكن تصممى رفوف للكتب على شكل حرف A خشبى او اى حرف تانى تفضليه وبأى لون، التصميم ده جديد ومميز و هيخلى الديكور ممتع اكتر، اختارى اول حرف من اسم الشخص المفضل عندك ونفذيه، وممكن كمان تنفذى الشكل ده لترتيب الكتب فى غرف الاطفال.

رف الكتاب على شكل حرف A

9- رف الكتاب على شكل برواز :

استخدمى براويز الصور الخشبية القديمة لترتيب الكتب على الحيطة بالشكل اللى فى الصورة علشان تعملى رفوف بتصميم مختلف و vintage. 

رف الكتاب على شكل برواز

10- رف كتاب super hero :

لو كنتى من محبين الـ super heroes يبقى التصميم ده هو الاختيار الانسب، ممكن تختارى علامة الـ super hero المفضل ليكى زى سوبرمان او باتمان و تنفذي بيه رف الكتب، و الفكرة دى هتبقى حلوة جدا فى غرف الاطفال و هتحببهم فى القراية بشكل كبير، نفذى لاطفالك رفوف الكتب بالتصميم ده علشان تخلى اوضتهم مميزة.

رف كتاب superhero

شوفى كمان 19 طريقة مبتكرة و غير مكلفة علشان تخلى بيتك مريح اكتر .