7 نشاطات رائعة تعمليها عشان متضعفيش قدام الاكل
كتير مننا لما بنكون تحت ضغط نفسي او متوترين ده بيزود رغبتنا للاكل وبنحاول نهرب من الضغط ده باننا ناكل اي حاجة تيجي قدامنا وبكميات كبيرة زي الشوكولاتة او الشيبسي او الحلويات وغيرها من الحاجات اللي ممكن تسبب لنا زيادة في الوزن, عشان كده النهاردة جايبين لكل بنات حوا نشاطات تعمليها عشان متضعفيش قدام الاكل ولما تحسي بتوتر او ضغط نفسي تعمليها بدل ما تاكلي وكمان هتساعدك انك تتخلصي من الاجهاد والضغط النفسي.
نشاطات تعمليها عشان متضعفيش قدام الاكل:
1- روحي اتمشي:
المشي واحد من الطرق اللي ممكن تهربي بيها من الاكل وفي نفس الوقت هيساعدك تتخلصي من الضغط , المشي مفيد جدا لتفريغ الضغط, ويعتبر نوع من التمارين اللي بتساعد على افراز الاندروفين اللي بيحسن المود وبيديكي طاقة ايجابية, والمشي كمان بيساعد على تصفية الذهن جدا, وهتحسي فرق كبير في مودك وحالتك النفسية بعد ممارسة المشي.
2- اتصلي بصاحبتك:
اوقات كتير بتكون الفضفضة حل سريع وفعال جدا, اتصلي بأقرب صاحبة ليكي اللي دايما متعودة تحكي لها كل حاجة واتكلمي معاها في مشكلتك هتحسي براحة جدا بعد الفضفضة دي لانك هتفرغي الضغط اللي عندك وهتساعدك تتخلصي من الاحباط, وممكن تديكي نصايح واقتراحات وتساعدك في حل مشكلتك.
3- اشربي مية:
المية ممكن تكون مش هتساعد على تقليل الضغط لكن هيديكي لحظة توقف من التوتر ولحظة تفكير قبل ما تضعفي قدام الاكل, والمية ممكن تساعدك كمان في قتل الرغبة في اكل سناكس او وجبة خفيفة.
4- حطي قايمة للاكل:
لو كل تركيزك وتفكيرك في الاكل ممكن تعملي حاجة مرتبطة بالاكل من غير ما تاكلي, انك تحطي قايمة للاكل بتاع الاسبوع مثلا, او تعملي بحث عن وصفات اكل جديدة تجربيها.
5- ممارسة الرياضة:
ممارسة الرياضة زي ما قولنا بتفرز الاندروفين اللي بيساعد على تحسين المود, والرياضة تعتبر من احسن الطرق اللي ممكن تخلصك من الضغط النفسي والتوتر, ومش بس كده كمان ليها تأثير ايجابي على الصحة بشكل عام وهتخليكي تبقي عايزة تاكلي اكل صحي اكتر لانك هتبقي عايزة متضيعيش نتيجة الرياضة اللي انتي عملتيها بجنك فود او اكل مش صحي.
6- اكتبي اللي حاسه بيه:
الكتابة من الطرق الممتازة جدا اللي ممكن تساعد على تفريغ الضغط النفسي, اكتبي وخرجي مشاعرك وكل اللي انتي حاسه بيه على الورق, ولو مش عايزة تحتفظي بيها ممكن تتخلصي منها او تقطعيها بعد كده بس المهم انك هتكوني خرجتي مشاعرك كلها واتخلصتي من الضغط.
7- حطي خطة لحل المشكلة:
احيانا بيكون افضل طريقة للتعامل مع الاجهاد او الضغط هو التعامل معاه, يعني حاولي تبصي لمشكلتك من منظور خارجي وتفكري في حلول ممكنة وتختاري انسب حل ليها.
ودي كانت بعض الحلول البسيطة اللي ممكن تلجأي لها بدل ما تضعفي قدام الاكل, ولو جربتي اي طرق تانية ممكن تشاركيها معانا.