7 حيل و نصايح للـ eyeliner لازم كل بنت تبقى عارفاهم

بقلمآية حسان فيمكياج visibility21294

الحقيقة هى انه وضع الماكياج مش حاجه سهلة، وبيحتاج خبرة ومهارات خصوصا بقى لو جينا لخطوة مهمة وصعبة فى مكياج كل يوم زى الايلاينر، وده لانه علشان ترسمى خط ايلاينر مظبوط محتاجه وقت وصبر كبير جدا ! وعلشان نخلى الموضوع أسهل عليكى، بنات حوا فى المقال ده هتقولك على حيل و نصايح للـ eyeliner هتساعدك ترسمى الايلاينر مظبوط من اول مرة  وتعملى ايلاينر يبين جمال عينيكى :)

7 حيل و نصايح للـ eyeliner لازم كل بنت تبقى عارفاهم ..

1- استخدمى الايلاينر  بلون الرمادى الغامق لإبراز العيون : 

لو كنتى قلقانة انه اللون ده مش هيبان او يبقى بنفس الوضوح زى لون الايلاينر الاسود، ماتقلقيش، الرمادى الغامق هيعملك لوك مختلف و هيخلى عينيكى تبان اكبر واوسع ويخليها بارزة من غير ما تحسي انها مرسومة بشكل غامق. وممكن كمان تجربى ترسمى الايلاينر باللون البنى الغامق.

استخدمى الايلاينر الرمادى الغامق لإبراز العيون

2- ثبتى الايلاينر باستخدام ايشادو من نفس اللون :

بمجرد ما تخلصى رسم الايلاينر ، استخدمى الايشادو من نفس لون الايلاينر اللى استخدمتيه بانك ترسمى بيه خط فوق خط الايلاينر علشان تثبتيه لمدة بتوصل لـ 12 ساعة. الحيلة دى كمان هتخلى خط الايلاينر بتاعك ناعم ومتساوى و مش هتخليه يسيح حتى مع العرق.

ثبتى الايلاينر باستخدام ايشادو من نفس اللون

3- استخدمى الكحل :

لو لسه بتواجهك صعوبة فى رسم خط ايلاينر مظبوط ومتساوى، جربى تستخدمى قلم الكحل فى انك تمشى على الجفن وترسمى بيه، الكحل هيبقى سهل عليكى لانه مش محتاجه تبقى ايدك ثابته اوى علشان تتحكمى فى قلم الكحل. بعد ما تخلصى رسم الخط بقلم الكحل، امشى عليه بالايلاينر السائل او الاسهل انك تستخدمى الجيل الايلاينر gel liner علشان تطلعى بنتيجة أحلى.

4- استخدمى شريط لزق علشان ترسمى الايلاينر :

المرحلة التانية من رسم الايلاينر وهى مرحلة صعبة برده بعد رسم الخط الاساسي هى رسم الجناح او الخط الاخير فى آخر رسمة الايلاينر، وكمان صعب انك تطلعي الجناحين زى بعض من غير ما يكون واحد ارفع من التانى، او واحد اعلى من التانى. حيلة سهلة تحلى بيها المشكلة دى هى انك تستخدمى شريط لزق او كارت على زاوية عينك. استخدمى قطعة صغيرة من شريط اللزق وثبتيها عند الزاوية الخارجية لعينك و ارسمى عليها الجناح وبكده تتأكدى انك هتطلعى الرسمة مظبوطة للآخر.

استخدمى شريط لزق علشان ترسمى الايلاينر

5- اعملى الايلاينر الجيل او الـ gel liner بنفسك :

الايلاينر الجيل او الـ gel liner  من الانواع اللى الصبغة او الـ pigment بتاعها عالى جدا، وبتعتبر الاعلى، لكن استخدامه برده صعب وبيحتاج مهارة عالية لانه الجيل لاينر بيترسم بفرشة، لكن فى حيلة ممكن تعمليها علشان ترسمى ايلاينر بوضوح عالى وهى انك تعملي الجيل لاينر بنفسك فى البيت. هاتى قلم الكحل الاسود بتاعك و قربيه من لهب ولاعة لثوانى قليلة و انفخى فيه ثانية يبرد و بعد كده جربيه على ايدك هتلاقيه بقى اتقل واغمق زى الجيل لاينر بالضبط.

اعملى الايلاينر الجيل او الـ gel liner بنفسك
اعملى الايلاينر الجيل او الـ gel liner بنفسك

6- استخدمى الايلاينر الاومبرى Ombre liner  :

نوع جديد بدأ يظهر من الايلاينر هو  تكنيك ايلاينر الالوان المتدرجة او الـ Ombre liner، جربى تستخدمى الايلاينر الاومبرى بداية من زاوية العين الداخلية باللون الفاتح لحد نص خط الرموش، بعد كده هاتى ايلاينر بلون اغمق و كملى رسم الخط لحد نهاية الزاوية الخارجية لجفنك ، آخر خطوة هى انك باستخدام  فرشة وعند نص خط الجفن ادمجى نهاية اللون الفاتح مع بداية اللون الغامق .

استخدمى الايلاينر الاومبرى ombre liner

7- صححى رسمة الايلاينر باستخدام قلم تحديد nude :

آخر حيلة معانا من حيل و نصايح للـ eyeliner هى انك تصححى رسمة الايلاينر باستخدام قلم تحديد بلون بيج ، لو رسمة الايلاينر اتلغبطت منك او الخط اتلغبط شوية صححى الخط بإنك تمشى عليه بقلم التحديد باللون الـ Nude بدل ما تمسحيه وترسميه تانى، ممكن تستخدمى الحيلة دى كمان فى انك تخلى الخط يبان sharp ويحدد عينك أكتر.

صححى رسمة الايلاينر باستخدام قلم تحديد nude
صححى رسمة الايلاينر باستخدام قلم تحديد nude

شوفى كمان ازاى تعملى رسمة ايلاينر الـ cat eye المعكوسة بالصور و الفيديو