10 حاجات لازم كل اتنين متجوزين يعملوها هتزود الحب بينهم !
الحياة الزوجية اكيد بتكون محتاجة مجهود من الطرفين عشان يحافظوا عليها وعلى حياة سعيدة مستقرة بينهم ولكن في حاجات بسيطة جدا ممكن تعملوها مع بعض وتتشاركوا فيها وممكن تكون من الحاجات التقليدية المعتادة اللي بتعملوها كل يوم لكن المشاركة فيها بتغير شكلها ومعناها وبتخلي الحياة احلى وبتزود الحب بينكم, والنهاردة هنقولك على 10 حاجات لازم كل اتنين متجوزين يعملوها مع بعض هتزود الحب بينكم وتخلي حياتكم اسعد.
10 حاجات لازم كل اتنين متجوزين يعملوها:
1- اتشاركوا الشاور مع بعض:
ممكن تعملوا لحظة رومانسية بينكم انكم تتشاركوا الشاور مع بعض, هي حاجة بسيطة لكن هتفرق اوي في العلاقة بينكم وهتحسن المود اوي وهتخلي العلاقة فيها قرب وارتباط اكتر.
2- اتفرجوا على نفس الحاجة في التليفزيون حتى لو كنتوا في اماكن مختلفة:
اتفرجوا على نفس البرنامج او الفيلم او ايا كان اللي بيتعرض في التليفزيون حتى لو كل واحد فيكم في مكان مختلف عن التاني لان هتحسوا ان في مشاركة بينكم وانكم مع بعض حتى لو مش في نفس المكان, وممكن لما يرجع البيت مثلا تتكلموا في اللي حصل في البرنامج وتتشاركوا الاراء مع بعض يعني يبقى في تواصل فكري بينكم.
3- اختيار الجنب المريح لكل واحد في السرير:
غالبا الزوجين بيبقى كل واحد فيهم ليه جنب من السرير بينام فيه ومتعود عليه وبيريحه اكتر فلازم الطرفين يكونوا عارفين ده عن بعض, لو الجنب اليمين مثلا مريح اكتر ليها وهي نايمة بالليل فيلتزم انه يسيب لها مكانها اللي متعودة تنام فيه على طول وهي كذلك يعني كل واحد يبقى عارف ايه اللي بيريح التاني ويعمله حتى لو في الحاجات البسيطة.
4- ناموا حاضنين بعض:
احضنوا بعض وانتوا نايمين وخليكوا قريبين من بعض يعني مش كل واحد ينام منفصل عن التاني حتى لو مثلا بالليل غيرتوا وضعية النوم وده اكيد بيحصل طبعا حاولوا تخلوا بردو في تلامس بينكم بالايد او الساقين يبقوا متلامسين يعني المهم يبقى في اتصال دايما لان الحضن ده دليل على المحبة والترابط بينكم.
5- اختاروا مع بعض تاكلوا ايه وفين:
لو مثلا في يوم هتاكلوا في مكان بره عادة لما يجي يسألك تحبي تاكلي فين متقوليش مثلا “في اي مكان مش مهم” او “اديني اختيارات اختار منها” هو بنسبة 70% تقريبا بيبقى عارف انتي عايزة ايه لكن بيسألك على المكان اللي تفضليه او تحبيه اكتر لان هو بيبقى مش عايز ياخد القرار النهائي وسايبه ليكي, وهو اكيد لما يكون بيحبك هيبقى عارف بسهولة ايه المكان اللي انتي بتحبيه اكتر او اللي بتفضليه بس هي نقطة المشاركة هي المهمة في الموضوع.
6- ضحكوا بعض:
ضحكوا بعض لان حس الفكاهة والمرح بينكم مهم جدا يعني دايما خلال اليوم حاولوا انتوا الاتنين تضيفوا جو المرح لليوم بغض النظر عن اللي بتمروا بيه خلال اليوم لان ده هيفرق جدا وهيغيرلكم يومكم.
7- تغيير الهدوم قدام بعض:
يمكن دي حاجة في كتير من المتجوزين مش بيعملوها حتى بعد سنين جواز, لكن دي من الحاجات اللي المفروض تشاركوها وتعملوها مع بعض لانه المفروض خلاص مافيش حاجة مستخبية عن التاني, ولو مثلا في حاجة تايهه من التاني فردة شراب مثلا اللي دايما بتوه مننا :) كل واحد يدور للتاني عليها يعني خلوا الحياة كده فيها مشاركة في كل حاجة ومافيش حواجز بينكم.
8- اتحملوا بعض في الايام الصعبة:
في فترة الدورة الشهرية عن اي واحدة بتحصل تغيرات هرمونية وجسدية وعاطفية وبيكون المود مش حلو وبتتعصبي بسرعة من اقل حاجة وبتبقي مش مستحملة حد فلازم هو يتحملك في الايام دي ويكون عارف ومقدر حالتك النفسية وميحاولش يتعصب عليكي زيادة او يعمل مشاكل ويكون متفهم انك في الايام دي بتكوني شخص مختلف, فالمفروض انه يكون اقرب ليكي ويسألك لو محتاجة حاجة او يجيبلك مثلا حاجة بتحبيها عشان يحاول يساعدك انه يغيرلك مودك يعني يكون لطيف وصبور معاكي وبالتالي لما هو هيعمل معاكي كده اكيد انتي كمان هتعملي معاه نفس الشيء لما يكون في ايام موده فيها مش حلو او متعصب او تعبان, يعني لازم الطرفين يتحملوا بعض في كل الاوقات.
9- اختيار موضوعات للكلام فيها:
اختاروا دايما موضوعات تتكلموا وتتناقشوا فيها ويكون في بينكم حوار يعني مش بس يكون الكلام في الموضوعات التقليدية المعتادة زي انت عملت ايه النهاردة, او اخبار الشغل ايه الموضوعات الخاصة بالبيت والولاد, يعني حاولوا تتكلموا وتتناقشوا في موضوعات مختلفة متبقاش مقتصرة بس على الحاجات التقليدية عشان ميبقاش في ملل في الحياة, اتشاركوا الاراء واتناقشوا في اي حاجة وكل حاجة.
10- كلام اخر اليوم:
في نهاية يوم طويل ليكوا انتوا الاتنين قبل النوم وانتوا على السرير خلاص, ممكن تتشاركوا تفاصيل يومكوا, كل واحد يسأل التاني على يومه كان عامل ازاي, وهل في حاجة ضايقتوا مثلا خلال اليوم او في حاجة مهمة حصلت, وبعد ما تخلصوا كلامكم تحضنوا بعض زي ما قولنا وتناموا.