15 تمرين هتخليكي توصلي للجسم اللي بتحلمي بيه

لكل البنات اللي بيحلموا بجسم جميل ومثالي النهاردة هنساعدكم في تحقيق ده بمجموعة تمارين هتخليكي توصلي للجسم المثالي اللي بتحلمي بيه والتمارين بتشتغل على كل اجزاء الجسم عشان تديكي الشيب اللي بتتمنيه لجسمك.

تمارين هتخليكي توصلي للجسم المثالي:

– تمارين للكتف والذراعين:

التمرينات دي بتشتغل على عضلات الكتفين والذراعين, العضلات دي بتدعم الفقرات العنقية وبالتالي بتمنع الم الرقبة, ولو مش متوفرعندك  الدامبلز في البيت ممكن تستخدمي بدالها ازازة مية صغيرة.

1- اقفي بشكل مستقيم والجسم مفرود وباصه للامام والقدمين جنب بعض, افردي الذراعين للجنب بالدامبلز لحد مستوى الكتف, مع الحفاظ على الجسم في وضع ثابت, وخدي شهيق وطلعي الزفير وانتي بترفعي الذراعين للجنب.

2- هتقفي بشكل مستقيم زي التمرين اللي فات, ارفعي الذراعين بالدامبلز واتنيهم عند الكتف, مع الحفاظ على الجسم في وضع ثابت, وشهيق وزفير اثناء التمرين.

– تمارين لعضلات الصدر:

دايما سن المرأة بيتحدد من منطقة الصدر والرقبة, التمارين دي هتساعدك على تعزيز عضلات الصدر وتحسين شكلها بسرعة وعالية.

3- نامي على الارض واتني الركبتين, وامسكي الدامبلز وارفعي الذراعين لفوق بالتبادل يعني ارفعي الذراع اليمين لفوق ونزلي الشمال والعكس, بس متخليش الدامبلز يلمس الارض لما تنزلي ايدك, وحافظي على الشهيق والزفير اثناء التمرين.

4- نامي على الارض واتني الركبتين زي التمرين اللي فات وارفعي الذراع بالدامبلز لفوق للجنب بالتبادل بين الذراعين, مع الحفاظ على الشهيق والزفير اثناء التمرين.

– تمارين لعضلات الضهر:

التمارين دي بتشتغل على تمارين الضهر وبتمنع مشاكل الضهر والعمود الفقري.

5- ارفعي ساق واحدة على كرسي وتني الجذع لقدام وبصي لتحت, اسندي بذراع على الكرسي وبالذراع التانية امسكي الدامبلز واتنيها لفوق جنب الصدر مع الحفاظ على الجذع ثابت, مع الحفاظ على الشهيق والزفير اثناء التمرين.

6- اتني ركبتك واسندي بايدك عل الركبة, ورجعي الرجل التانية لورا, وحافظي على الضهر مستقيم, ارفعي ايدك لفوق بالدامبلز جنب الصدر, وحافظي على الشهيق والزفير اثناء التمرين, وبدلي مع الرجل التانية نفس الحركة.

7- اسندي على الارض بالايد وبالركبتين وخلي ركبة لقدام شوية عن التانية, خلي ضهرك مفرود وموازي للارض وبصي لتحت, مرجحي ايدك للجنب بالدامبلز لحد مستوى الكتف ويكون الكوع متني بشكل بسيط, وبعدين بدلي بالرجل والايد التانية.

– تمارين لعضلات البطن:

التمارين دي بتشتغل على عضلات البطن, بتقويها وبتخلصك من الكرش.

8- نامي على الارض, اتني الركبتين, وخلي الذراعين ورا الراس, ارفعي الراس لفوق ومتخليش الدقن تلمس منطقة الصدر, ارفعي الجزء العلوي من الجسم لفوق, حافظي على الشهيق والزفير اثناء التمرين.

9- نامي على ضهرك, خلي جسمك كله مفرود, خلي ايدك تحت منطقة المؤخرة, ارفعي ونزلي رجلك الاتنين مع بعض من غير ما تلمسي الارض وانتي بتنزليها.

10- نامي على الارض, اتني الركبتين, افتحي الرجل اوسع من مستوى الكتفين شوية, خلي ايديكي الاتنين مفرودين قدامك, واتأكدي ان الدقن مش لامسة منطقة الصدر, ارفعي الصدر ناحية الركبتين مع الزفير.

11- نامي على الارض, خلي ايديك جنب راسك عند منطقة ورا الاذن, اتني الرجل اليمين ناحية الصدر مع رفع الكوع الشمال ناحية الرجل اليمين في نفس الوقت وبدلي مع الرجل الشمال مع الكوع اليمين وكرري الحركة بالتبديل بين الجانبين.

– تمارين للساقين والفخدين والارداف:

تقريبا معظم مشاكل زيادة الوزن بتكون في منطقة الساقين والارداف والفخدين, والتمارين دي مفيدة وفعالة جدا لفقدان الوزن في المناطق دي.

12- اقفي مع الجذع مستقيم, نطي لفوق وبعدين انزلي مع تني الركبة وتني الكوعين لجنب الصدر, وحافظي على الضهر مستقيم اثناء التمرين, وطلعي الزفير اثناء النزول وتني الركبة.

13- اسندي بايديكي الاتنين على كرسي, خلي ضهرك مستقيم, بصي لتحت, ارفعي الساق للجنب ونزليها, حافظي على الجذع ثابت اثناء التمرين, وطلعي الزفير وانتي بترفعي الساق, وبعدين كرري نفس الحركة للساق التانية.

14- اقفي مع جذع مستقيم, حافظي على الذراعين قدامك واشبكي ايديك في بعض, بصي قدامك, انزلي لتحت في وضع القرفصاء, وبعدين اتني رجلك اليمين ورجعيها لورا ناحية الشمال والرجل الشمال ناحية اليمين من غير ما الركبة تلمس الارض, وطلعي الزفير بعد ما تخلصي الحركة.

– تمرين للجسم كله:

15- اقفي مستقيمة, امسكي الدامبلز بايديكي الاتنين وحافظي عليهم مرفوعين وثابتين على الكتفين, حافظي على استقامة الجذع, انزلي بركبتك على الارض وبعدين قومي اقفي لوضع البداية وطلعي الزفير اثناء الوقوف.

قبل التمارين اعملي احماء من 15 – 20 دقيقة عشان تخلي العضلات تستعد للتمارين وتتجنبي اي اصابات ممكن تحصل, وكرري كل تمرين على قد ما تقدري ممكن تبدأي في البداية بوقت بسيط وبعدين تزودي لما جسمك يتعود, والتمارين بسيطة جدا وتقدري تعمليها في البيت بنفسك من غير جيم او مدرب.

افضل 5 تمارين لوسط نحيف ومثالي في 30 يوم بس تقدري تعمليهم في البيت بسهولة