7 حاجات متعمليهمش اول ما تصحي من النوم !
ازاي بتبدأي يومك عادة عشان تمهدي لباقي اليوم ؟ لو في يوم حسيتي ان معندكيش طاقة انك تعملي حاجة يبقى اكيد انتي هتكوني عملتي غلطة من الغلطات اللي هنقولها النهاردة هنتعرف على اكتر 7 غلطات بنعملهم اول ما نصحى من النوم ممكن يأثروا على باقي يومنا وازاي نتجنبها.
غلطات بنعملهم اول ما نصحى من النوم:
1- متضغطيش على زرار الSnooze او الغفوة:
طبعا مافيش حد فينا الصبح مش بيدوس على زرار ال Snooz او الغفوة عشان ياخد خمس دقايق نوم زيادة لكن بيقول المتخصصين ان هو يعتبر فكرة سيئة لان كل مرة بتقومي وتضغطي على زرار الغفوة وترجعي للنوم فأنتي بتدخلي لدورة نوم جديدة كل مرة ومش بتكمليها عشان كده لما هتقومي من النوم هتلاقي نفسك تعبانة وكسلانة وحاسة ان جسمك مكسر, والافضل انك لما المنبه يرن تقومي على طول من غير ما تدوسي عليه وتدخلي في النوم تاني.
2- متفضليش نايمة في السرير واخدة وضع الكورة:
كلنا لما بنصحى الصبح بنفضل في السرير شوية صاحيين ومكسلين نقوم بس احسن حاجة عشان تفوقي نفسك انك تتجنبي تبقي نايمة وواخدة وضع الكورة او الجنين في السرير لان ده هيخليكي كسلانة وحاسة انك لسه عايزة تنامي, والافضل اول ما تصحي تفردي جسمك كله وتعملي Stretching او تمدد لايدك ورجلك وانتي لسه في السرير لان ده هيفرق معاكي جدا خلال اليوم وهتخليكي تستعدي ليومك بنشاط اكتر.
3- متفتحيش ايميلك اول حاجة لما تصحي من النوم:
كتير مننا اول حاجة بنعملها لما بنصحى من النوم نمسك الموبايل ونفتح الايميل او الفيس بوك او الواتس اب او غيرها من الابليكيشن لكن الافضل انك تأجلي الحاجات دي لوقت تاني وتوفري مجهودك للحاجات المهمة اللي وراكي في اليوم وتتواصلي مع نفسك الاول وبعدين فكري انك تتواصلي مع العالم الخارجي وتبدأي تشوفي اي حاجة تانية.
4- رتبي سريرك:
ترتيب السرير الصبح من المهام اللي بنهملها او بنكسل نعملها لكن بالرغم انها حاجة بسيطة لكن هتستغربي انها مؤثرة ومرتبطة بزيادة انتاجيتك باقي اليوم لانها تعتبر الخطوة الاولى اللي هتساعدك على ترسيخ كل العادات الجيدة لانك لما تكوني مهتمة بالحاجات البسيطة الصغيرة هتفرق معاكي في الحاجات الكبيرة.
5- اتجنبي شرب القهوة:
لو انتي من اللي ميعرفوش يبدأوا يومهم من غير فنجان القهوة يبقى لازم تغيري العادة دي لان ما بين الساعة 8 – 9 الصبح جسمنا بينتج كميات كبيرة من هرمون الكورتيزول اللي بينظم طاقة الجسم, ولو انتي بتشربي القهوة قبل الساعة 9 ونص الصبح ده هيخلي الجسم يخفض من انتاج هرمون الكورتيزول وبالتالي هيقلل من طاقة الجسم او هيكون عندك طاقة اقل خلال اليوم وهتتعبي وترهقي اسرع خلال النهار.
6- متصحيش في الضلمة:
الساعة الداخلية للجسم حساسة جدا للضوء والضلمة فلو انتي صحيتي في ضوء منخفض او قليل ده هيخلي المخ يتلخبط او يحس بالخلط ما بين الاوقات وبالتالي هتحسي انك لسه عايزة تنامي, عشان كده خليكي فاتحة الستاير بحيث اول ما النور يطلع تفوقي ولو صاحية بدري اوي ولسه الدنيا ضلمة يبقى اول ما تصحي ولعي نور قوي في الاوضة عشان تفوقي.
7- نظمي وقتك صح:
اي شخص عنده قدرة معينة او طاقة معينة ولو استهلكتي طاقتك انك تعملي حاجات كتير صغيرة هيبقى عندك طاقة اقل خلال اليوم, عشان كده حاولي تنظمي وقتك وتستعدي كل يوم الصبح انك تنجزي الحاجات الكبيرة او المهام الصعبة الاول عشان توفري باقي طاقتك لباقي اليوم.
20 حيلة سهلة هتساعدك تصحي بدري نشيطة !
