7 تسريحات للشعر الطويل تجنن وسهل تعمليهم

بقلمآية حسان فيشعر visibility7354

ستايلات الشعر  وتسريحاته كتييرة ومابتخلصش، خصوصا لو كنتى من أصحاب الشعر الطويل لانه  بيعتبر كلاسيك و موضته مابتبطلش ابدا، لكن بيبقى الاهتمام بيه صعب وبيحتاج عناية خاصة، وعلشان تقدرى تتمتعى بجمال شكل شعرك الطويل و ماتقابليش صعوبة فى اختيار تسريحة مناسبة وتحولى شكله من الكلاسيك للمودرن، فى المقال ده هتشوفى معانا 7 تسريحات للشعر الطويل تجنن وسهل تعمليهم بنفسك فى البيت من غير ما تضطرى تروحى للكوافير علشان تجددى من ستايل شعرك وتحسي باختلاف .

7 تسريحات للشعر الطويل تجنن وسهل تعمليهم ..

1- الضفيرة البسيطة : 

الضفيرة من تسريحات للشعر الطويل اللى مابتبطلش ابدا ولا بتروح عليها، وبتعتبر من تسريحات الشعر المفضلة لأصحاب الشعر الطويل، الضفيرة البسيطة بتعتبر واحده من احلى ستايلات الضفاير و من اكترهم استخداما، كل اللى عليكى تعمليه هو انك تقسمى شعرك لـ 3 أجزاء متساويين و ابدأى اعكسى الجزئين اللى بره مع بعض و بعد كده دخلى معاهم الجزء اللى فى النص، يعنى بطريقة الضفيرة المعتادة اللى كلنا عارفينها، دى واحده من اسهل وابسط تسريحات الشعر اللى ممكن تعمليها، وكمان بتعتبر مريحة جدا خصوصا فى حر الصيف لانها بتبعد شعرك عن رقبتك.

الضفيرة البسيطة

2- ضفيرة ديل السمكة : 

تسريحة كمان حلوة من تسريحات للشعر الطويل هى ضفيرة ديل السمكة او الـ fishtail braid. تقدرى تعمليها بأنك تقسمى شعرك لنصين متساويين وتاخدى خصلة رفيعة من النص الاولانى و تجدليها مع النص التانى، وبعدين تاخدى خصلة من النص التانى وتجدليها مع النص الاولانى وهكذا لحد آخر شعرك و تتكون معاكى ضفيرة ديل السمكة.

ضفيرة ديل السمكة

3- ديل الحصان المعكوس : 

 من أبسط تسريحات للشعر الطويل ، وكمان شكلها مختلف و stylish وهتقدرى تعمليها على طول من أول محاولة، اقسمى شعرك نصين بالعرض وخدى النص التانى اعمليه  ديل حصان عادى خالص ، امسكى القسم الاول وقسميه خصل رفيعة وابرميها وابدأى لفيها على ديل الحصان بحرص لحد نصها وسيبيى نهاية الخصل مفرودة واربطيها مع ديل الحصان.

ديل الحصان المعكوس

4- ديل حصان perky : 

التسريحة دى اسمها ديل حصان  perky او الـ perky side pony، واحدة من التسريحات اللى بيبقى شكلها مميز وحلو، اجمعى شعرك كله على جنب واحد واعملى ديل حصان على جنب واربطيه بأستك شعر علشان مايتفكش، و اقسمى ديل الحصان ده نصين وخدى النص اللى فوق واعمليه ضفيرة بسيطة بنفس الطريقة اللى شرحناها فى اول تسريحة وبعد كده اجمعى الضفيرة وديل الحصان مع بعض من النص بأستك شعر تانى.

ديل حصان perky

5- ضفيرة نص التاج :

تقدرى تعملى التسريحة دى بأنك تفصلى خصلتين على بعد حوالى 5 سم من ودانك من الناحيتين و تعملى ضفيرة من كل خصلة، لفى الضفيرتين على راسك من قدام زى التاج كده وثبتيهم بالبنس و ممكن تستخدمى البنس المزينة بالورد علشان تضيفى لمسه حلوة للتسريحة بتاعتك.

ضفيرة نص التاج

6-  تسريحة البنس : 

تسريحة سهله تعمليها وفى وقت قليل، افصلى خصلة من بداية شعرك على كل جنب وابرميها وثتيها بالبنس زى الصورة كده و افضلى افصلى خصل رفيعة بنفس الطريقة على الجنبين وثبتيهم بالبنس ، وبعدين اعكسى اخر 3 او 4 خصل مع بعض علشان تكملى التسريحة وتعملى شكل حلو، الستايل ده بيبقى شكله حلو ومابياخدش وقت خالص وكمان سهل جدا.

تسريحة البنس

7- Bun على جنب : 

علشان تعملى modern stylish look جربى تسريحة الـ side bun او bun على جنب، الطريقة هى انك تعملى ديل حصان بسيط على جنب و بعدين لفيه على شكل bun وعلشان تديله مظهر stylish اكتر ممكن تطلعى منه خصل صغيرة اوى وتسيبيها بحرية، ثبتى الـ bun ببنسة وبكده تكونى خلصتى، وممكن كمان تاخدى خصلة من ديل الحصان وتجدليها على شكل ضفيرة وبعدين تلفيها مع الـ bun علشان تضيفى تفاصيل اكتر للتسريحة بتاعتك.

Bun على جنب

جربى التسريحات دى وقوليلنا ايه رأيك، وشوفى معانا اكتر من 20 طريقة جديدة لتسريحة ” الكحكة “ .