17 طريقة مختلفة علشان تخسى 5 كيلو بسهولة

آية حسان

في

10060

كتير مننا جربوا طرق مختلفة علشان نخسر الوزن الزيادة اللى بنكسبه، وكتير بنجرب وصفات و انظمة ريجيم مختلفةو بنتعب اثناء الدايت لكن فى الاخر ممكن مانوصلش للنتيجة اللى بنبقى مستنينها حتى لو كان الدايت علشان تخسري وزن قليل، حتى لو كنتى عايزة تخسى 5 كيلو ! علشان كده فى المقال ده هنعرفك على طرق مختلفة تساعدك لما تيجى تعملى دايت وبالتحديد لو عايزة تخسى 5 كيلو ، وممكن كمان على المدى الطويل يبقوا جزء من يومك.

17 طريقة مختلفة علشان تخسى 5 كيلو بسهولة ..

فى المقال ده هنقولك ازاى تقدرى تخسى 5 كيلو بسهولة وسرعه من خلال 17 طريقة مختلفة وبسيطة من غير اى تعقيد، علشان تبقى جاهزة لمناسباتك القريبة و تلبسي الفستان اللى انتى حاباه وكنتى مأجله لبسه لما تخسي شوية، شوفى معانا النصايح دى وحاولى تنفذيها علشان توصلى للنتيجة المطلوبة فى اقرب وقت ممكن .

1- كلى أقل واحرقى سعرات حرارية أكتر :

احسن طريقة تراقبى بيها الـ Calories اللى جسمك بيكتسبها هى انك تبقى عارفة كمية الأكل اللى بتستهليكيها، لانه ساعتها هتقدرى تحسبى انتى محتاجة كمية اكل قد ايه علشان توصلى لعدد السعرات الحرارية اللى جسمك محتاجها من غير زيادة، وبكده تقدرى تحققى اول قاعدة بأنك تأكلى كمية اكل قليلة وتحرقى سعرات حرارية اكتر.

– جسمك بيحتاج للأكل علشان يقدر ينفذ عملية حرق الدهون والسعرات الحرارية، لكن مهم انك تحرقى كمية سعرات اكتر من اللى بتكتسبيها.

– بالطريقة دى ومع الوقت بيبقى عندك فرصة اكتر انك تحافظى على وزنك ثابت من غير زيادة او تقليل غير مرغوب، لانه كمية السعرات اللى هتحرقيها هتبقى متناسبة مع كمية الكالوريز اللى اكتسبتيها.

– القاعدة دى بتحتاج وقت على ما جسمك ياخد عليها ويقدر ينفذها علشان تقدرى تخسرى الوزن الزيادة وبعد كده تثبتى وزنك.

2- ابعدى عن الكربوهيدرات :

تقريبا محدش فينا مابيحبش البطاطس المحمرة و الاكل المقلى والاكلات دى غنية جدا بالكربوهيدرات، لكن علشان الطريقة دى تجيب نتيجة معاكى ضرورى انك تتحكمى فى استهلاكك للكربوهيدرات لانها بتتخزن فى الجسم على صورة مادة اسمها triglycerides او الدهون الثلاثية ، والمادة دى بتحتاج وقت طويل جدا علشان الجسم يقدر يكسرها ويتخلص منها وبالتالى بتتسبب فى زيادة الوزن، مهم تبعدى عن الكربوهيدرات.

3- اشربى كميات اكتر من المية :

جسم الانسان بيتكون تقريبا من 70% مية، علشان كده المية مهمة جدا لصحة الجسم بشكل عام لانها الوسيلة اللى الجسم بيكتسب من خلالها الجلوكوز و الفيتامينات والمعادن وكمان هى اللى بتتخلص من المواد السامة و الدهون الضارة اللى بتتكون فى الجسم، وكمان بتزود من عملية التمثيل الغذائى للأكل اللى بنستهلكه، المية بتلعب دور ايجابى فى تقليل درجة حرارة الجسم والحفاظ على ترطيبه وكمان بتتحكم فى عملية افراز العرق، شربك لكميات كبيرة من المية خلال اليوم هيساعدك تخسى 5 كيلو بسهولة وتحافظى على صحة جسمك بشكل عام.

– كوباية من المشروبات الغازية الغنية بالكربونات بيكسب جسمك calories كتيرة جدا، علشان كده مهم انك تستبدليها بالمية.

– لو كنتى من محبى المشروبات الغنية بالكافيين حاولى تتجنبيهم، واستبدلى المشروبات دى بالشاى الاخضر بدون سكر.

– بالطريقة دى هتزودى من استهلاكك للمية وكمان هتساعدى جسمك يتخلص من الكالوريز الزيادة.

4- كلى اكلات غنية بالكربوهيدرات المركبة :

مهم تكونى عارفة ايه هو الفرق بين الكربوهيدرات البسيطة و المركبة، الكربوهيدرات البسيطة او الـ simple carbohydrate بيقدر الجسم يهضمها ويمتصها بسرعة، اما الكربوهيدرات المركبة او الـ complex carbohydrate الجسم بياخد وقت اطول علشان يهضمها ويمتصها، كمان الكربوهيدرات البسيطة غنية بالمواد احادية السكريات زى الجلوكوز، الفركتوز، والجلاكتوكوز ، المالتوز و اللاكتوز ودى بتزود الوزن بشكل كبير، علشان كده بننصحك تأكلى أكلات غنية بالكربوهيدرات المركبة زى الرز البنى و الشوفان.

– الكربوهيدرات المركبة المقصود بيها الأكلات اللى بتحتوى على الحبوب الكاملة و الخضروات لانه الجسم بيمتصهم بشكل أبطأ بالمقارنة مع الكربوهيدرات البسيطة و بالتالى سعراتهم الحرارية أقل.

– الكربوهيدرات المركبة غنية بالألياف و المواد الغذائية اللى لما بتتهضم الجسم بيفرزها فى الدم ببطء.

5- ابعدى عن الاكل الجاهز fast food :

خطوة مهمة علشان تقدرى تخسى 5 كيلو بسهولة هى انك تبعدى عن الـ fast food تماما، لانه الاكل الجاهز او الـ fast food غنى بمواد كتير مضرة للجسم و بتزود الوزن زى الكوليسترول و السكر و كمان بيزود معدل مادة الـ LDL فى الجسم و فى نفس الوقت بيقلل من مستويات الكوليسترول الجيد HDL، و ده اللى بيسبب مرض السكر بنسبة كبيرة. كمان النسبة العالية من الصوديوم فى الجسم بتسبب انتفاخ الجسم كله و التورم لانها بتحبس المية فى الجسم و كمان بتسبب ارتفاع ضغط الدم فى حالات كتيرة.

– الاكل السريع زى البرجر والبطاطس المقلية والمشروبات الغازية بتضر جسمك اكتر ما بتنفعه لانهم اكلات فقيرة فى القيمة الغذائية.

– علشان تقدرى تخسى 5 كيلو او اى وزن تحبيه لازم تبعدى عنهم تماما وتعتمدى فى نظامك الغذائى على اكلات قيمتها الغذائية عالية.

6- افطرى فطار صحى واتعشى عشا بسيط :

افطرى دايما فطار كبير ومتكامل و غدا بسيط و عشاء خفيف علشان تعملى لنفسك دايت صحى، لانه لما بتصحى الصبح بتبقى معدتك فاضية تماما لانك بتبقى نمتى على الاقل من 6 – 8 ساعات. علشان كده بنصحى الصبح طاقتنا قليلة و بنبقى محتاجين حاجه تنشط جسمنا. حاولى لما تصحى الصبح تفطرى فطار غنى بالمواد الغذائية المفيدة واللى بيحتاجها جسمك علشان يبدأ يومه.

اما على وقت الغدا بنحتاج نمد جسمنا بكمية تانية للطاقة علشان تقدرى تكملى النص التانى من اليوم بنفس النشاط فمش هتحتاجى الا غدا بسيط مع فاكهة او عصير. وفى العشا بيحتاج جسمك وجهازك الهضمى يسترخى لانه بيبقى بيبذل مجهود طول اليوم ، علشان كده مابتبقيش محتاجة كمية كبيرة من الاكل لانه بيبقى تقريبا وقت النوم، ممكن تكتفى بعلبة زبادى وثمرة فاكهة او طبق سلطة.

– طول اليوم انتى بتتحركى وبتعملى انشطة فجسمك بيحرق سعرات حرارية طول الوقت، وده مفيد لاى دايت تكونى بتعمليه.

– على وقت العشا جسمك بيحرق سعرات حرارية قليلة جدا لانه مابيبقاش بيبذل اى مجهود، علشان كده كمية قليلة من الخضار المشوى او المسلوق او طبق سلطة كفاية جدا علشان تتعشى وفى نفس الوقت ماترهقيش جسمك فى الوقت اللى بيحتاج يرتاح فيه.

افطرى فطار صحى واتعشى عشا بسيط

7- اجرى على الـ treadmill :

اجرى على الـ treadmill بشكل منتظم ويفضل يكون يومى، و كل ما تجرى اسرع كل ما هتحرقى كالوريز اكتر وكمان الـ treadmill الميزة اللى فيها انها بتحرك تقريبا كل عضلات الجسم فى نفس الوقت فبتبقى وكأنك بتمرنى جسمك كله.

– لو كنتى لسه مبتدأة هتبقى محتاجة تبدأى الجرى على سرعة قليلة و كل 10 دقايق تزودى سرعتك.

– حاولى وانتى بتجري يبقى جسمك مستقيم مش مايل، لانه الميل هيشكل عبء على الاطراف و الركبتين وده ممكن يسببلك الم.

8- قللى استهلاكك للصوديوم :

متوسط كمية الصوديوم اللى بيحتاج الجسم يكتسبها كل يوم هى حوالى 2300 ملليجرام او اقل، الصوديوم مسؤول عن انقباضات العضلات و استرخائها و كمان بيعادل كمية السوائل فى الجسم، علشان كده حاولى تقللى من استهلاكك للصوديوم فى نظامك الغذائى كل يوم لانه الزيادة منه مضرة جدا للعضلات و ممكن تسبب الجفاف.

– الاستهلاك الزايد للصوديوم بيسبب الانتفاخ لانه بيسبب احتباس المية فى الجسم.

– لما تكونى بتحاولى تخسي او عايزة تبانى ارفع حاولى تبعدى عن الملح فى اكلك.

9- ابعدى عن المشروبات الغازية :

المشروبات الغازية سبب اساسي فى زيادة الوزن السريعه خصوصا لو كنتى بتشربيها كتير، لانها غنية بالكربون ومش بس بتزود الوزن ولكنها كمان مضرة للصحة العامة، خطوة اساسية علشان تقدرى تخسى 5 كيلو بسهولة وسرعة هى انك تتخلصى من المشروبات الغازية.

– الصودا بتؤدى الى زيادة الوزن وضعف الاسنان، الدراسات بتقول انه 2 Cans من الصودا كل يوم بتساوى زيادة وزن حوالى من 10 لـ 15 كيلو كل سنة، الزيادة بتختلف حسب العمر و النوع و طبيعة النشاطات اليومية.

– المشروبات الغازية بتساعد على تقوية وربط خلايا الدهون و ده بيخليها صعب انها تتحرق فالجسم بيبقى مش قادر يتخلص منها.

– المشروبات دى كمان بتدخل الهوا للجسم وبتسبب انتفاخ الامعاء وده بيخلى عملية الهضم بطيئة و صعبة و بالتالى بتقلل من خسارة الوزن.

10- العبي سباحة :

انك تسترخى فى حمام السباحة حاجه حلوة ، لكن كمان ممكن تستغلى وقتك فى حمام السباحة فى انك تخسي، السباحة بتعتبر وسيلة ممتازة لشد عضلات الجسم وخسارة الوزن الزايد.

– السباحة من افضل التمرينات اللى بتساعد فى حرق الكالوريز بمعدل سريع.

– العبى سباحة ساعة كل يوم علشان تساعدك توصلى لهدفك فى انك تخسى 5 كيلو بسرعة وكمان تتحكمى فى الدايت بتاعك.

11- كلى بروتينات :

البروتينات بتساعدك تملى معدتك وتحسي بالشبع من غير ما تكسبى وزن زيادة، ومهمة جدا كمان لنمو العضلات وقوتها. خلى البروتينات جزء اساسى من النظام الغذائى بتاعك.

– السمك من البروتينات الغنية بالاوميجا 3 وفيه نسبة منخفضة جدا من الدهون المشبعة.

– الفراخ الفيليه “صدور الفراخ” كمان بتعتبر من البروتينات اللى الدهون فيها قليلة وغنية بالبروتينات.
– منتجات الصويا غنية بالبروتينات.

12- كلى وجبات صغيرة :

الدراسات بتقول انه الناس اللى بتاكل وجبات متكررة صغيرة خلال اليوم او يعنى ” نظام اللقيمات ” بيخسروا وزن اسرع من اللى بيعتمدوا فى نظامهم الغذائى على 3 وجبات اساسية، بشرط انه تقللى عدد السعرات الحرارية فى الوجبات دى.

– الطريقة الصحيحة هى انك تقللى عدد السعرات الحرارية اللى اتعودتى تكسبيها فى اليوم لحوالى 300 – 400 كالورى.

– الفكرة كلها انك تبدأى تاكلى لما تبدأى تحسي بالجوع، واول لما تحسي انك قربتى تشبعى توقفى اكل.

– المخ بيحتاج حوالى 20 دقيقة علشان يبدأ يحسسك انك شبعتى، علشان كده دايما كلى بشكل بطئ وامضغى الاكل كويس.

13- ابدأى العبى رياضة :

الرياضة برة البيت بتعتبر نشاط صحى مثالى سواء كنتى على دايت او لا ، لازم تحاولى تبقى الرياضة جزء اساسي فى حياتك، لانه الرياضة بتحافظ على جسمك صحى و يؤدى وظايفه بفاعلية.

– الرياضات زى كرة السلة و كرة القدم و التنس بتحرق كميات كبيرة جدا من السعرات الحرارية.

– الرياضات دى هتساعدك تخسري وزن بشكل مثالى وسريع لانها بتجبر الجسم انه ينتج كميات كبيرة من الطاقة فبيحرق سعرات حرارية عالية جدا .

14- اتمشى :

أهم حاجه تعمليها لما تكونى بتعملى دايت هى انك تحافظى على الحركة المستمرة لجسمك، وطبعا اهم وافضل حركة هى المشى. مفيش احسن من انك تنزلى تتمشى الصبح لحوالى 25 دقيقة متواصلين،ومن المعروف انه حركة المشى الصبح بتعتبر من اهم الحركات الرياضية المفيدة لجسمك و بييجى بعدها تمرينات الـ stretch و اليوجا.

– لما تبقى فى مول او فى اى مبنى ابعدى عن الاسانسير ودايما استخدمى السلالم، الحركة دى بتساعد جسمك على زيادة معدلات الحرق.

– انك تمشى 40 خطوة بعد كل وجبة هيساعد جسمك انه يهضم الاكل بشكل اسرع و افضل.

– يفضل ما تفضليش قاعده بعد الاكل او انك تنامى مباشرة، حاولى دايما تتحركى شوية بعد كل وجبة.

15- استخدمى التوابل بدل الصوص :

لو بتحبى تبدأى أكلك بالسلطة يبقى ضرورى تبعدى عن الصوص اللى بيتضاف عليها بكل انواعه و يفضل تستبدليه بتوابل لما بتكونى بتعملى دايت. الصوص دايما بتبقى نسبة السعرات الحرارية اللى فيه عالية بعكس التوابل.

– ممكن تستخدمى ملح وفلفل مع معلقة من الخل و معلقة من زيت الزيتون لتتبيلة السلطة.

– اثناء الدايت اللى بتعمليه علشان تخسى 5 كيلو، يفضل ماتضيفيش الصوص على اى حاجه حتى المكرونة، وتستبدلى صوص المكرونة بالتوابل والاعشاب.

16- نظمى وقتك كويس :

الوقت واحد من اهم العوامل اللى بتأثر فى اى حاجه بنعملها فى حياتنا. علشان كده مهم انك تعرفى ازاى تنظمى وقتك كويس وتستفيدى منه قدر الامكان، اعرفى معانا شوية نصايح علشان تقدرى تنظمى وقتك، وكمان هتأثر فى الدايت بتاعك ..

– لو بتشتغلى فى مكتب و معظم الوقت بتضطرى تبقى قاعدة على كرسي فى تمرين بسيط ممكن تعمليه وانتى قاعدة علشان تبقى بتستفيدى من الوقت بشكل اكبر، وهو تمرين الـ butt clenching ، اضغطى العضلات فى منطقة الـ buttو خليها تنقبض شوية و بعدين سيبيها تسترخى و كررى التمرين ده كل ما تلاقى فرصة ولاطول وقت، التمرين البسيط ده هيعمل فرق هتلاحظيه، وممكن كمان تعمليه وانتى فى العربية.

– وممكن كمان كل مرة تروحى فيها الحمام تعملى 3 حركات squat.

17- ارقصى :

اخر نصيحة علشان تقدرى تخسى 5 كيلو وكمان نصيحة ممتعة هى انك ترقصى ! ارقصى لوحدك فى اوضتك او مع اصحابك وحركى جسمك علشان تحرقى سعرات حرارية اكتر، لانه الرقص بيعتبر من افضل الطرق لتخسيس الوزن و تقليل التوتر وممكن تعتمدى عليه بدل التمرينات الرياضية الخفيفة، ارقصى كل يوم لمدة ساعة مع نظام غذائى مناسب وهتلاقى نتيجة مرضية فى وقت قياسى!