13 اكلة سهلة ممكن تعمليهم في مج لو مش عايزة تاكلي كتير

لو معنديش وقت او بتكسلي تقفي كتير في المطبخ عشان تعملي اكلة او لو هتعملي وجبة لنفسك بس ومش عايزة تاكلي كتير يبقى اكيد هتختاري وجبة من الوجبات دي, جايبين النهاردة لكل بنات حوا اكلات سهلة تعمليها في مج الميزة انها سريعة ومش هتاخد منك وقت ولا مجهود وفي نفس الوقت كمية صغيرة مش هتخليكي تاكلي كتير.

اكلات سهلة تعمليها في مج:

1- نوتيلا كيك:

المقادير:

• – 4 معالق كبيرة دقيق.

– 4 معالق كبيرة سكر.

• – بيضة.

– 3 معالق كبيرة كاكاو.

• – 3 معالق كبيرة نوتيلا.

– 3 معالق كبيرة لبن.

• – 3 معالق كبيرة زيت زيتون او اي زيت نباتي.

الطريقة:

اخلطي المكونات كلها مع بعض في مج وحطيه في الميكروويف على درجة حرارة عالية لمدة من 1 ½ – 3 دقايق ولو مش متوفر ميكروويف حطيها في الفرن العادي ووقت الخبز هيعتمد على درجة الحرارة اللي بتخبزي فيها وبعدين تطلعيه وممكن تضيفي على الوش كريم شانتيه او صوص شوكولاتة حسب ما تفضلوا, وكده يبقى الكيك خلص ومخدتش منك 5 دقايق في تحضيره وخبزه.

2- فطيرة القرع بالتوفي والكراميل:

المقادير:

• – ¾ كوباية قرع مسلوق ومهروس.

– ¼ كوباية كريمة.

• – 1 صفار بيضة.

– ¼ كوباية سكر.

• – ¼ معلقة صغيرة قرفة.

– شوية جنزبيل “كمية حسب الرغبة”.

• – شوية قرفة “كمية حسب الرغبة”.

– شوية ملح.

• – ½ معلقة صغيرة فانيليا.

صوص الكراميل:

المقادير:

• – ½ كوباية سكر.

– 2 معلقة كبيرة شربات خفيف.

• – 3 معالق كبيرة زبدة.

– 1/3 كوباية كريمة.

طريقة صوص الكراميل:

اخلطي السكر والشربات على نار متوسطة مع التقليب المستمر لحد ما يوصل للون الكراميل البني الفاتح ضيفي الزبدة وقلبي لحد ما تدوب وبعدين ضيفي الكريمة وقلبي الخليط كويس لحد ما يمتزج وميبقاش فيه اي كتل وارفعيه من على النار, ولو مش هتستخدميه في ساعتها حطيه في التلاجة لحد وقت الاستخدام.

طريقة الفطيرة:

اخلطي المكونات كلها مع بعض في مج كبير ولو مج صغير ممكن تقسمي الكمية على مجين وحطيها في الميكروويف او الفرن على درجة حرارة متوسطة من 6 – 8 دقايق او لحد ما تستوي ممكن تختبريها بالسكينة تحطيها في نص الكيك ولو خرجت نضيفة تبقى كده استوت, طلعيها من الفرن وسيبيها تبرد شوية وحطيها في التلاجة او في الفريزر وحطي على وشها قطع توفي وصوص كراميل.

3- كيكة الكراميل:

المقادير:

• – 2 معلقة كبيرة زبدة.

– 2 معلقة كبيرة شوكليت شيبس.

• – 1/8 معلقة صغيرة ملح.

– 2 معلقة كبيرة دقيق.

• – ¼ معلقة صغيرة بيكنج بودر.

– بيضة كبيرة.

• – ½ معلقة صغيرة فانيليا.

– ½ معلقة صغيرة قهوة او نسكافية.

• – 2 معلقة كبيرة سكر.

– 1 معلقة كبيرة كاكاو.

• – مربع من اي نوع شوكولاتة تفضليها.

للتزيين:

• – صوص كراميل.

– شوكليت شيبس.

• – ايس كريم فانيليا.

– مكسرات محمصة مطحونة خشن.

• – كوكيز مطحون خشن.

– كريم شانتيه.

الطريقة:

اخلطي الزبدة مع الشوكليت شيبس في المج على درجة حرارة متوسطة لمدة 15 ثانية لحد ما يدوبوا مع بعض وبعدين في طبق تاني اخلطي الدقيق والبيكنج بودر والملح والبيض والفانيليا والقهوة والسكر والكاكاو وقلبيهم مع بعض كويس وبعدين ضيفيهم لخليط الزبدة والشوكولاتة في المج وقلبيهم مع بعض, حطي المج في الميكروويف او الفرن على درجة حرارة متوسطة لمدة 30 ثانية وقلبي الخليط تاني وبعدين حطيه على درجة حرارة متوسطة لمدة 35 ثانية كمان لما تلاقي الوش بتاع الكيكة عمل طبقة هاتي مربع الشوكولاتة حطيه في نص الكيك وبعدين سيبيها في الميكروويف 40 ثانية كمان وبعدين طلعيه.

واثناء ما انتي سيباه يبرد شوية حضري التزيين بتاعك سيحي الشوكليت شيبس, هاتي الكيك حطي على الوش معلقة كبيرة ايس كريم ورشي عليها من صوص الشوكولاتة وصوص الكراميل والكريم شانتيه, وبعدين ضيفي من فوق الكوكيز والمكسرات المطحونة.

4- بيض مخفوق في دقيقتين:

المقادير:

• – 2 بيضة.

– 2 معلقة كبيرة لبن.

• – 2 معلقة كبيرة جبنة مبشورة “اي نوع تفضلوه”.

– ملح – فلفل واي اعشاب تانية تفضلوها ممكن تضيفوا زعتر او ريحان.

الطريقة:

ادهني المج بشوية زيت, اخلطي البيض مع اللبن واضربيهم مع بعض بالمعلقة وحطيه في الميكروويف لمدة 45 ثانية على درجة حرارة عالية, لما البيض يستوي طلعيه ورشي على الوش الجبنة المبشورة وتبليه بالملح والفلفل واي اعشاب تختاريها.

5- مافن التوت:

المقادير:

• – ¼ كوباية دقيق.

– 1 معلقة كبيرة سكر.

• – 1/8 معلقة صغيرة بيكنج بودر.

– 3 معالق كبيرة لبن.

• – 1 معلقة كبيرة زيت جوز الهند.

– ¼ توت طازة او مجمد “ممكن تستبدلوا التوت بالفراولة”.

للتزيين:

• – 1 معلقة كبيرة زيت جوز الهند.

– 1 معلقة كبيرة دقيق.

• – 1 معلقة كبيرة سكر.

الطريقة:

في المج هنخلط كل المكونات مع بعض ونقلبها ونحط التوت او الفراولة على الوش, وبعدين نحضر طبقة التزيين هنخلط زيت جوز الهند مع الدقيق مع السكر ونرشه على التوت من فوق, بعدين نحط المج في الميكروويف على درجة حرارة عالية لمدة 90 ثانية لحد ما يستوي.

6- فرنش توست في دقيقتين:

المقادير:

• – توست مقطع مكعبات.

– معلقة كبيرة زبدة.

 – بيضة.

• – 3 معالق كبيرة لبن.

– رشة قرفة.

الطريقة:

حطي الزبدة في المج وسيحيها في الميكروويف وبعدين حطي عليها التوست المتقطع, وفي طبق اخلطي البيض مع اللبن والقرفة وقلبيهم كويس مع بعض وبعدين ضيفي الخليط على التوست حطي المج في الميكروويف لمدة دقيقة وبعدين رشي عليه من فوق عسل ابيض.

7- سباجيتي بالسجق والجبنة:

المقادير:

• – 1 ½ كوب مكرونة سباجيتي.

– 1 ½ كوب مية.

• – ¼ معلقة صغيرة ملح.

– كوباية كريمة طبخ.

• – 1/8 معلقة صغيرة جوزة الطيب مبشورة.

– ½ كوباية جبنة شيدر مبشورة .

• – 1/3 كوباية جبنة بارميزان او موتزاريلا مبشورة “ممكن تضيفي اي انواع جبن تانية حسب الرغبة”.

– ملح – فلفل .

• – 120 جرام سجق.

– فص ثوم مفروم ناعم.

• – معلقة صغيرة زعتر.

– معلقة صغيرة زبدة.

الطريقة:

كسري السباجيتي قطع صغيرة وضيفي لها المية والملح وحطيها على النار لحد ما تستوي وبعدين صفيها من المية وضيفي عليها الكريمة وجوزة الطيب والجبنة الشيدر والجبنة البارميزان وتبليها بالملح والفلفل وقلبي الخليط كله كويس مع بعض.

 قطعي السجق وضيفي عليه الثوم والزعتر والزبدة قلبيهم مع بعض وبعدين قسمي الكمية على مجين وحطيه في الميكروويف او الفرن لحد ما السجق يستوي وبعدين ضيفي السباجيتي على السجق في المج ورشي على الوش جبنة شيدر وبارميزان او موتزاريلا مبشورة وحطيها في الميكروويف من 3 دقايق ونص لحد ما الجبنة تسيح والمكونات تمتزج مع بعضها.

8- بوريتو:

المقادير:

• – ارز بني او ابيض مطبوخ.

– فاصوليا مسلوقة.

• – صلصة طماطم.

– ملح.

• – رقائق ذرة “ممكن نستخدم دوريتوس اي طعم نفضله”.

– افوكادو مقطع مكعبات “اختياري”.

الطريقة:

هاتي مج حطي فيه الارز وعليه الفاصوليا والصلصة وضيفي عليهم الدوريتوس وتبليها بالملح وحطيها في الميكروويف لمدة دقيقة على درجة حرارة عالية عشان بس المكونات تمتزج مع بعض لان كل المكونات اصلا مستوية, وممكن بعد ما تطلعيها تضيفي على الوش شوية صلصة اضافية ودوريتوس متكسر وقطع افوكادو وشوية كريمة طبخ وعصرة ليمون, الاكلة دي تنفع لو انتي عندك بواقي رز من يوم قبل كده ممكن تجددي طعمه وتعمليه بالطريقة دي.

9- الارز المقلي مع البيض:

المقادير:

• – ارز مطبوخ.

– بسلة مسلوقة او اي نوع خضار تفضلوه وممكن تحطوا اكتر من نوع خضار.

• – طماطم متقطعة مكعبات.

– صويا صوص.

• – بيضة.

– ملح – فلفل .

الطريقة:

هاتي المج حطي فيه الرز وضيفي عليه الخضار المشكل والطماطم, غطيه بورق فويل وخرميه بالشوكة من فوق وحطيه في الميكروويف لمدة دقيقة, خلال الوقت ده هاتي طبق ضيفي البيض مع الصويا صوص ومعلقة زيت وتبلي الخليط بالملح والفلفل واضربيهم كويس مع بعض بالمضرب اليدوي او بالشوكة وبعدين صبي الخليط ده في المج على باقي المكونات وقلبيهم مع بعض كويس وغطيه ورجعيه في الميكروويف تاني لمدة دقيقة ونص كمان, الاكلة دي بردو هتبقى لذيذة جدا لو عندك بواقي اكل عايزة تجدديها.

10- لازانيا بالسبانخ والجبنة:

المقادير:

• – ½ ورقة لازانيا.

– 2 ½ كوباية سبانخ مفرومة.

• – ¼ ثمرة فلفل متقطعة مكعبات.

– ¼ كوباية جبنة ريكوتا.

• – 3 اوراق ريحان مفرومة ناعم “اختياري”.

– ¼ معلقة صغيرة ملح.

• – 1/8 معلقة صغيرة ثوم بودرة.

– 6 معالق كبيرة صلصة مكرونة او صلصة طماطم عادية.

• – 1/3 كوباية جبنة موتزاريلا مبشورة.

الطريقة:

قطعي ورقة اللازانيا لنصين وبعدين قطعي كل نص نصين كمان وحطيها في طبق وغطيها بمية مغلية وسيبيها على جنب.

 هاتي السبانخ حطيها في طبق وغطيها بفويل وخرميه بالشوكة للتهوية وحطيها في الميكروويف لمدة دقيقة وبعدين طلعيها اخلطي معاها الجبنة الريكوتا والفلفل المتقطع والثوم والملح وقلبيهم مع بعض وسيبيهم على جنب.

هاتي المج صبي فيه معلقتين كبار من الصلصة وحطي فوقيها قطعة لازانيا وفوقيها شوية من خليط السبانخ ورشي فوقيها معلقتين جبنة موتزاريلا, وارجعي حطي طبقة صلصة تاني وبعدين اللازانيا وفوقيها السبانخ والجبنة تاني واعملي طبقات لحد ما تخلصي المكرونة والخليط اللي عندك وتبقى اخر طبقة فوق هي اللازانيا ورشي عليها الموتزاريلا على الوش وحطيها في الميكروويف لحد ما الجبنة تسيح على الوش, والاكلة دي مناسبة جدا للنباتيين او اللي مش بيحبوا اللحوم.

11- كوكيز الشوكولاتة في دقيقة واحدة:

المقادير:

• – معلقة كبيرة زبدة.

– 2 معلقة كبيرة سكر.

• – ½ معلقة صغيرة فانيليا.

– 1/8 معلقة صغيرة ملح.

• – 1 صفار بيض.

– 3 معالق كبيرة دقيق.

• – من 1 – 2 معلقة كبيرة شوكليت شيبس.

الطريقة:

حطي الزبدة في المج وحطيها في الميكروويف لحد ما تسيح وبعدين طلعيها وضيفي عليها السكر والفانيليا والملح وصفار البيض واضربيهم كويس مع بعض بالمعلقة وبعدين ضيفي الدقيق وقلبيهم لحد ما يمتزجوا مع بعض كويس وبعدين ضيفي الشوكليت شيبس, حطي المج في الميكروويف على درجة حرارة عالية لمدة من 40 – 50 ثانية, وممكن بعد ما تطلعيها تضيفي على الوش ايس كريم.

12- فطيرة الفراخ بالزبدة:

مقادير عجينة الفطيرة:

• – 1 معلقة صغيرة خميرة جافة.

– 2 معلقة صغيرة سكر.

• – 2 كوباية دقيق.

– معلقة صغيرة ملح.

• – 1/8 معلقة صغيرة بيكنج بودر.

– ¼ كوباية زبادي.

• – 2 معلقة كبيرة زيت زيتون.

– 2 معلقة كبيرة زبدة.

• – كزبرة خضرا.

مقادير الفراخ:

• – 1 ½ كوباية زبادي.

– عصير ليمونة.

• – 2 معلقة كبيرة اي خلطة توابل مفضلة.

– 2 معلقة كبيرة كمون.

• – معلقة كبيرة كركم.

– معلقة صغيرة بابريكا.

• – معلقة صغيرة ملح.

– ½ معلقة صغيرة قرفة.

• – وركين فراخ من غير عضم مقطعين مكعبات.

– 4 معالق كبيرة زبدة.

• – 2 معلقة كبيرة زيت.

– بصلة كبيرة متقطعة مكعبات.

• – 4 فصوص ثوم مفرومين.

– 2 معلقة كبيرة جنزبيل.

• – ثمرة طماطم مقطعة مكعبات.

– ثمرة فلفل حار “اختياري”.

• – ½ كوباية شوربة فراخ.

– 1 ½ كوباية خضار مشكل.

• – كوباية كريمة طبخ.

– معلقة كبيرة صلصة طماطم.

الطريقة:

هنحضر الاول عجينة الفطيرة, هنخلط الخميرة مع معلقة سكر ونحطها في ¾ كوباية مية دافية ونسيبها 10 دقايق, في نفس الوقت ننخل الدقيق ونضيف عليه معلقة سكر والملح والبيكنج بودر لما الخميرة تفور وتبقى جاهزة نضيف عليها الزبادي وزيت الزيتون ونصبها على المكونات الجافة اللي هي الدقيق اللي جهزناه ونعجنهم كويس مع بعض بالايد لحد ما تبقى عندك عجينة طرية غطيها وسيبيها في مكان دافي لمدة ساعتين عشان تخمر.

خلال الوقت ده هنجهز الفراخ, في طبق اخلطي الزبادي مع عصير الليمون وخلطة التوابل والكمون والفلفل والبابريكا  والكركم والملح والقرفة ونضيف لها قطع الفراخ المتقطعة ونتبلها كويس بالخليط ده ونسيبها في التلاجة لمدة ساعة.

بعد الساعة ندوب 4 معالق زبدة مع معلقتين زيت في طاسة على نار متوسطة ونضيف البصل ونقلبه لحد ما يطرى ولونه يصفر بس وبعدين نضيف الثوم والجنزبيل ونقلبهم شوية مع بعض لحد ما تشمي ريحة المكونات طلعت ضيفي عليهم الطماطم المتقطعة والفلفل الحار والفراخ وسيبيهم 10 دقايق وبعدين ضيفي لهم شوربة الفراخ وسيبيها تغلي وبعدين قللي درجة الحرارة على اقل حاجة وسيبيها تستوي على نار هادية لمدة 30 دقيقة, بعدين ضيفي لها الخضار المشكل وكريمة الطبخ وصلصة الطماطم وسيبيها على النار 5 دقايق.

سخني الفرن على 400 درجة فهرنهايت, جيبي مجات ادهنيها بالزيت او بالزبدة وقسمي فيهم خليط الفراخ, وهاتي العجينة قسميها لقطع متساوية على قد المجات اللي عندك وافردي كل قطعة على مج وغطيه من فوق بالعجينة واضغطي عليها من الجناب بالراحة عشان تمسك في المج, حطيها في الفرن لحد ما يبقى لونها دهبي تقريبا حوالي 15 دقيقة, لما تطلعيها ادهني الوش بالزبدة السايحة بفرشة ورشي عليها كزبرة خضرا للتزيين.

13- كيكة الكراميل:

المقادير:

• – 3 معالق كبيرة زبدة.

– بيضة مخفوقة.

• – 3 معالق كبيرة لبن.

– 4 معالق كبيرة دقيق.

• – 3 معالق كبيرة سكر.

– ½ معلقة صغيرة بيكنج بودر.

• – ½ معلقة صغيرة ملح.

– 2 معلقة كبيرة صوص الكراميل.

الطريقة:

حطي الزبدة في المج وحطيها في الميكروويف لحد ما تسيح, بعدين ضيفي عليها البيض واللبن وقلبيهم كويس مع بعض وبعدين ضيفي الدقيق والسكر والبيكنج بودر والملح وقلبيهم لحد ما يمتزجوا مع بعض كويس وبعدين ضيفي معلقة كبيرة من صوص الكراميل على الوش حطي المج في الميكروويف على درجة حرارة متوسطة لمدة دقيقة او اكتر لحد ما الخليط يعلى او يتنفخ وفي نفس الوقت يبقى طري من جوه, طلعيه من الميكروويف ورشي على الوش معلقة من صوص الكراميل.

10 وصفات حلويات سهلة وسريعة ولذيذة جدا