نصايح و قواعد أتيكيت اختيار ستايلك فى المناسبات المختلفة

اوقات كتير بنحتار ازاى نقدر نحدد  ستايل اللبس المناسب للمناسبات المختلفة، زى الأفراح و العزومات ومقابلات الشغل. ولانه مهم تبقى عارفة ازاى تلبسي وعلشان ماتحتاريش كتير، النهاردة هتتعرفى معانا على أهم نصايح و قواعد أتيكيت اختيار ستايلك فى المناسبات المختلفة اللى تقدرى تحددى بيها بعد كده الستايل الصح لكل مناسبة.

نصايح و قواعد أتيكيت اختيار ستايلك فى المناسبات المختلفة

1- فى معظم المناسبات:

فى معظم المناسبات التقليدية بيبقى سهل تحددى ستايل اللبس وتختارى المناسب، زى السفر او الزيارات اليومية او العزاء مثلا، فى المواقف اللى زى كده ابسط واحسن حل هو انك تمشى مع القاعده المتعارف عليها زى انه مثلا تلبسي هدوم لونها اسود وانتى رايحة العزاء، ولبس بسيط مافيهوش بهرجة او تفاصيل كتيرة وانتى رايحة تزورى قرايبك او صحباتك.

2- اللبس الكاجوال:

اللبس الكاجوال بيدخل فيه قطع ملابس كتيرة ومختلفة من اول البنطلونات الخفيفة والتيشيرت لحد الشيميز و البلوزات مع الشوز او الـ slipper، علشان كده فى حاجات لازم تحدديها قبل ما تقررى ايه هو أتيكيت اختيار ستايلك المناسب، زى هتكون المناسبة indoors ولا outdoors، والناس التانية هتلبس ازاى.

وحتى لو قررتى تلبسي كاجوال وانتى رايحة الشغل لازم تاخدى بالك انه اللبس الكاجول اللى بتلبسيه وانتى خارجة مع اصحابك مثلا ممكن مايبقاش مناسب انك تروحى بيه الشغل، لانه طبيعة المكان و الناس من حواليكى مختلفة.

3- ستايلك فى الشغل business casual:

ستايل الـ business casual مهم يبقى متناسق و مرتب جدا، حاولى تتجنبى قطع الملابس اللى فيها تفاصيل كتيرة زى التطريز الكتير والألوان ، واعتمدى فى ستايلك على قطع بألوان هادية وسادة من غير نقاشات، وحاولى تبقى دايما مقاسها مظبوط عليكى مش ضيقة اوى ولا oversized، شوفى هنا ستايلات سمارت كاجوال للعمل .

ستايلك فى الشغل business casual

3- اللبس الـ business formal :

الستايل ده فى لبس الشغل مهم مايبقاش باين فيه انه الهدوم غالية جدا وسعرها مبالغ فيه او انها رخيصة زيادة عن اللزوم، لانه اللى بتعتمد على الستايل ده فى لبسها بتبقى بتحاول تدى الانطباع انها professional وبتهتم بشغلها بكل تفاصيله بكل جدية حتى فى اللبس. ممكن تلبسي بدلة formal سعرها مناسب مع شوز بلون nude او شوز اسود.

4- اللبس الـ semi- formal :

لو بتحضرى حفلة semi- formal زى عيد ميلاد او خطوبة او احتفال بتخرج او نجاح، يبقى فستان بسيط من الستان او الشيفون مناسب ، او حتى بلوزة بلون زاهى مع اكسسوار مناسب وبنطلون كلاسيك.

5- اللبس الـ formal :

اللبس الـ formal ممكن يبقى محير شوية، بس خليكى دايما مع الطريق الاسهل والابسط. لو هتعملى لوك فورمال يبقى البسي بدلة من جاكت وبنطلون او جاكت مع جيبة بلون واحد ويفضل يكون غاملق زى الاسود او الكحلى او الرمادى مع قميص ابيض، اللوك ده مش هتحتاجى تعمليه الا فى مناسبات قليلة زى المؤتمرات او اجتماعات الشغل الكبيرة والمهمة.

6- ستايلك فى الأفراح :

أتيكيت اختيار ستايلك المناسب بيعتمد على انك لما تبقى هتحضرى فرح يفضل تختارى فستان بسيط لكن فى نفس الوقت شيك بعيدا عن البهرجة، و ابعدى تماما عن الفستان باللون الابيض لانه الابيض فى اليوم ده لازم يكون للعروسة لوحدها، ومن اهم قواعد الأتيكيت هى لو انه فى دعوة الفرح العروسة والعريس محددين ستايل اللبس او الـ dress code يبقى ضرورى تلتزمى بيه.

7- ستايلك فى الأفراح النهارية:

الأفراح النهارية او  حفلات الزفاف اللى بتتعمل بالنهار بتعتبر من المناسبات الجديدة علينا واللى بتبقى محيرة فعلا فى اختيار الستايل المناسب ليها، لو هتروحى فرح بالنهار فى مكان مفتوح البسي فستان نهارى بطول الركبة او اطول منها حاجة بسيطة بلون زاهى مع صندل او شوز مفتوح، وابعدى عن الفساتين السواريه و الاكسسوارات الكتيرة و حاول تخلى اللوك بتاعك بسيط على قد ما تقدرى.

8- ستايلك فى المصيف او الـ resort :

فى ايام المصيف او لو رايحة تقضى اجازة فى resort بنبقى محتاجين نلبس هدوم فضفاضة ومريحة، اعتمدى فى الوقت ده على الـ beach dresses مع hat مناسبة ، و لرجليكى البسي صندل او slippers، وممكن تلبسي بنطلون قماش خفيف مع تيشيرت قطن.

شوفى كمان اهم نصايح فن الأتيكيت في حياتك اليومية والاجتماعية