لو بيعمل معاكي الحاجات دي يبقى مش بيحبك كفاية !

ريهام محمود

في

136445

اي بنت اكيد حلمها انه يكون شريك حياتها بيحبها اكتر من اي حاجة في الدنيا وتبقى هي الاهم بالنسبة له وليها الاولوية في حياتة, لكن كل بنت لازم تخلي بالها كويس انه حتى لو انتي حاسه بمشاعر قوية من ناحيته ليكي مش شرط تكون المشاعر دي صادقة يعني مش كل حاجة بيقولها تصدقيها لان الكلام سهل جدا لكن الحكم على صدق مشاعره بيكون بافعاله معاكي, وده اللي هنقوله النهاردة لكل بنات حوا هنعرف مع بعض مجموعة تصرفات تقولك انه مش بيحبك كفاية, يعني لو لقيتي الشخص اللي انتي مرتبطة بيه بيعمل الحاجات دي معاكي تعرفي ساعتها انه حبه مش صادق ومجرد كلام بس.

تصرفات تقولك انه مش بيحبك كفاية:

1- لو طلب منك تغيري شكلك:

اكيد اللي بيحب حد بيحبه زي ما هو بعيوبه قبل مميزاته, فلو لقتيه كل شوية يطلب منك تغيري حاجة في شكلك او طريقة لبسك فتأكدي انه مش بيحبك كفاية لان اللي بيحب بجد هيحبك زي ما انتي ومش هيطلب منك تغيري اي حاجة, وكمان لو دايما تعليقاته سلبية على اي حاجة في شكلك او طريقة لبسك يبقى انتي اكيد مش محتاجة الشخص اللي زي ده في حياتك.

2- لو طلب منك تتخلي عن احلامك:

الشخص اللي بيحبك فعلا لازم يدعمك ويشجعك تحققي كل احلامك وطموحاتك ويساندك ويقدم لك المساعدة كمان لو محتاجاها لكن لو عمل عكس كده ودايما بيحبطك وعايزك تتخلي عن احلامك ومتحققيش حاجة في حياتك يبقى مش بيحبك.

3- بيرفض يقابل اهلك واصحابك:

مقابلة الاهل والاصدقاء من اكتر الحاجات اللي تحسسك او تبينلك انه شخص جاد وبيحبك فعلا لان مقابلة الاهل تعتبر خطوة كبيرة وبتحطه قدام مسئولية والتزام فلو مرحب انه يقابل اهلك ويتعرف باصحابك وعلاقة الحب تبقى معروفة ومش سر يبقى اكيد بيحبك لكن لو رافض انه يقابل اهلك او اصحابك يعرفوا انكم مرتبطين يبقى لازم تفكري تاني وتعيدي حساباتك.

4- بيغشك او بيكدب عليكي:

الشخص اللي بيحبك فعلا اكيد مش هيغشك ولا يكدب عليكي في اي حاجة ودايما هيكون صادق وصريح معاكي فلو مع الوقت دايما بتكتشفي انه كدب عليكي في اي حاجة يبقى اكيد انتي تستاهلي شخص افضل منه.

5- لو دايما بيتعمد يحرجك:

لو حاطك في موقف محرج مرة وهو مش قاصد ممكن تسامحيه, لكن لو متعمد دايما يحرجك او يحكي لاصحابه او لاي حد عن مواقف انتي عملتيها مثلا واحرجك في وسط مجموعة يبقى ساعتها ميستحقش تسامحية ويبقى اكيد مش بيحبك كفاية.

6- لو عايز العلاقة تبقى سر:

لو دايما بيقولك متقوليش لحد اننا مرتبطين وعايز العلاقة تبقى سر يبقى اكيد مش بيحبك, لان اللي بيحب حد اكيد هيبقى فخور بالعلاقة دي قدام اهله واصحابه وكل الناس اللي تعرفوهم, فلو طلب منك الطلب ده يبقى لازم تسألي نفسك هو ليه مش عايز يقول لحد او يخليها سر؟

7- لو تصرفاته معاكي عنيفة:

لو دايما ردود افعالة معاكي عنيفة وبيتعصب عليكي بسرعة وبيعلي صوته على طول او بيغلط فيكي يبقى اكيد وفورا لازم تنهي العلاقة لان الشخص اللي بيحب بجد بيخاف على مشاعر واحساس اللي بيحبه وبيخاف على زعله ومش هيعمل حاجة تضايقه باي شكل.

8- لو دايما بيسخر منك:

اكيد كلنا في بعض الاحيان لما بنكون مع اصحابنا او حد قريب مننا بنقعد نهزر ونضحك وممكن نتريأ على بعض, لكن في خيط رفيع ما بين الضحك والهزار العادي والسخرية من حد يعني لو دايما بتحسي بتعليقاته انه بيسخر منك وبنتقدك بشكل جارح ويخليكي تحسي بشعور سيء ناحية نفسك يبقى اكيد هو مش بيحبك كفاية.

9- مش بيسمعك:

كلنا اكيد مش في كل الاوقات بنبقى مستعدين نسمع بعض لكن اللي بيحبك بجد اكيد هيبذل اقصى ما عنده عشان يسمعك ويحسسك انه مهتم بيكي حتى لو كان مشغول هيحاول على قد ما يقدر انه يوفرلك وقت يسمعك فيه, لكن لو دايما بتحسي انه مش مهتم ومش بيسمعك او لما بتكلميه بيكون مش منتبه لك وتحسي كانك بتكلمي نفسك يبقى اكيد مش بيحبك كفاية.

10- لو طول الوقت بيقولك مشغول:

دي كمان من الحاجات اللي تقولك انه مش بيحبك بشكل كافي انه دايما بيقولك انه مشغول ومش بيوفرلك وقت لان اكيد مافيش حد مشغول طول الوقت كلنا مشغولين لكن عندنا اصحاب وعيلة ووقت للترفيه والهوايات يعني مشغول طول الوقت دي مجرد حجه مش اكتر لان اللي بيحب بجد اكيد هيبذل مجهود عشان يلاقي وقت يقضيه مع اللي بيحبه.

11- بيتجاهلك:

لو دايما بيتجاهل مكالماتك ورسايلك يعني لو حتى مثلا وقت اتصالك كان مشغول المفروض لما يفضى يكلمك او حتى يرد عليكي ساعتها برسالة ويقولك انه مشغول وهيبقى يتصل بيكي لما يفضى لكن لو بيتجاهلك تماما ومش بيرد على اتصالاتك ولا رسايلك يبقى اكيد مش بيحبك كفاية.

12- مش بياخد رايك في حاجة:

اكيد كلنا بندور على الراجل اللي بيقدر ياخد قرارت وعارف هو عايز ايه في حياته لكن ده ميمنعش انه يحسسك دايما انه رايك مهم حتى لو في الحاجات البسيطة يعني في لبس معين في قصة شعره في اي حاجة عايز يشتريها ياخد رايك فيها يعني يحسسك دايما انك مشاركاه في القرار, لكن لو دايما بيتجاهل رايك او مش بيقدره يبقى دي علامة تقولك انه مش بيحبك كفاية.

13- مش بيتكلم معاكي على المستقبل:

لو مش بيشاركك افكاره او خططه للمستقبل او مش بيتكلم في مستقبلكم مع بعض يبقى هو اكيد في الحالة دي مش حاطك في مستقبله او سايبك كخطة بديلة لو ملاقاش اختيار تاني او شخص افضل منك.

14- بيبص على بنات تانية:

انه يبص على بنات تانية ده مش بس معناه انه عدم احترام ليكي ولمشاعرك لا دي ممكن كمان تكون علامة قوية انه مش بيحبك فعلا, اكيد في بعض الاحيان كتير من الرجالة بيبصوا على بنات تانية, لكن ميبقاش ده بشكل دايم او على طول او عينه تتنقل من واحدة للتانية قدامك او يتكلم عن بنت تانية معاكي, ده اكيد يبقى شخص مش اهل للثقة خالص.

15- بيتكلم كتير عن الماضي:

اكيد كلنا لازم نفتكر تجاربنا القديمة عشان نتعلم منها للي جاي, لكن لو هو كان مرتبط قبل كده ودايما بيكلمك عن علاقته القديمة او عن البنت اللي كان مرتبط بيها بشكل مستمر يبقى في الحالة دي هو مش بيحبك فعلا وانتي ممكن تكوني بالنسبة له مجرد علاج من تجربته السابقة او صدمته العاطفية.

16- بيقارن بينك وبين غيرك:

المقارنة بينك وبين غيرك من البنات, يعني لما احنا بنعملها مع نفسنا وبنقارن بينا وبين غيرنا بنبقى متضايقين من نفسنا لو كمان المقارنة بقى جت من الشخص اللي انتي مرتبطة بيه اكيد هتكون اسوأ بكتير لو دايما بيقارن بينك وبين بنات تانيين او يحسسك ان اقل من واحدة تانية لو مش بيحبك زي ما انتي في كل حاجة يبقى اكيد انتي تستاهلي شخص افضل منه يقدرك ويحبك زي ما انتي من غير ما يقارنك بحد.

17- لو مش بيحب يقضي وقت معاكي:

اكيد اللي بيحب حد بيبقى عايز يقضي معاه اطول وقت ممكن, واي وقت يكون مش مشغول فيه اكيد هيبقى عايز يبقى معاكي ولو بيعمل عكس ده يبقى اكيد مش بيحبك فعلا.

18- مش بيبقى موجود ابدا وقت ما تحتاجيه:

اكيد اي بنت بتبقى محتاجة في حياتها الراجل اللي تحس انها ممكن تعتمد عليه واللي وقت ما تحتاجه تلاقيه جنبها, فلو انتي بتمري بظرف صعب ومحتاجاه ولقتيه مش جنبك يبقى لازم تسألي نفسك هل الانسان ده يستاهل يكون معاكي في الاوقات الحلوة وهو لما احتاجتيه في الوقت الصعب مكنش جنبك؟

19- بيختفي من وقت للتاني:

واحدة من علامات الحب القوية بين اي اتنين هو انهم بيشاركوا كل دقيقة في يومهم مع بعض يعني كل واحد بيبقى عارف التاني يومه ماشي ازاي او بيعمل ايه لان ده بيعتبر رابط قوي بين اي اتنين بيحبوا بعض ومش بمعنى تأييد الحرية لكن كل واحد بيبقى عارف على الاقل التاني بيعمل ايه وفي نفس الوقت كل واحد ليه وقته اكيد لاهتماماته واصحابه, لكن ده اكيد مختلف من انه بيختفي ومش بيقولك هو فين ولا بيعمل ايه, لازم يقدرك ويحترمك ويعرفك ايه اللي بيحصل في حياته مش يختفي بمجرد ما يحس انه عايز يعمل ده من غير ما يعملك اي حساب.

20- بياخد وقت طويل على ما يرد عليكي:

اكيد دي حاجة بتزعجنا كلنا انك تتصلي او تبعتي له رسالة ومتلاقيش رد غير بعد ساعات او حتى بعد ايام, دي اكيد مشكلة كبيرة ولازم تفكري تاني انك تستاهلي معاملة احسن من كده بكتير وتستحقي راجل ميعملش حاجات تضايقك ولازم تراجعي نفسك ان مش ده الشخص اللي يستاهل حبك.