10 حاجات لازم تتخلصي منهم عشان تحافظي على صحتك

بقلمريهام محمود فيصحة visibility7416

في حاجات ممكن نكون بنستخدمها بشكل يومي في البيت لكن هي ممكن تبقى خطيرة على الصحة وتضرنا على المدى البعيد واحنا مش عارفين ولازم اننا نتخلص منها, النهاردة هنقول لكل بنات حوا على 10 حاجات لازم تتخلصي منها عشان صحتك.

10 حاجات لازم تتخلصي منها عشان صحتك:

1- العلب والزجاجات البلاستيك:

اول حاجة لازم تتخلصي منها هي العلب البلاستيك اللي بتحفظي فيها الاكل والازايز البلاستيك كتير مننا بنجيب مثلا مية معدنية ولما تفضى نملاها مية تاني ونستخدمها لكن ده غلط جدا لان البلاستيك بيتصنع من مادة كيميائية ضارة جدا على الصحة ولما بتشربي اي حاجة فيها المادة دي بتتنقل للمشروب بشكل مباشر وممكن تسبب لك امراض القلب والاوعية الدموية والسكر, وبتزود خطر الاصابة بسرطان الثدي والبروستات والغدة الدرقية, عشان كده افضل حاجة اننا نتجنب استخدام الازايز والعلب البلاستيك ونتخلص منها فورا ونستبدلها بالزجاج.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

2- الصابون والمنظفات المضادة للجراثيم:

الصابون والمنظفات المضادة للجراثيم هي مش مفيدة ولا امنة على الصحة زي ما احنا متخيلين او فاكرين, ادارة الغذاء والصحة الامريكية اوصت باستخدام الصابون العادي والمية لغسل الايدين لان الصابون والمنظفات المضادة للبكتيريا بتحتوي على مادة اسمها التريكلوسان ودي ما دة كيميائية ضارة بالاضافة لمواد تانية كيميائية ضارة جدا بالصحة, ومادة التريكلوسان دي ممكن تغير في تنظيم هرمونات الجسم وخصوصا للستات الحوامل وده ممكن يتعارض مع نمو الجنين, كمان ممكن تسبب الحساسية, اضطراب الغدد الصماء, زيادة الوزن.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

3- معطر الجو:

معطرات الجو كمان من الحاجات اللي ممكن تضر بصحتنا لانها بتحتوي على مادة كيميائية مضرة والافضل اننا نتجنب استخدامها, ممكن نستبدلها بالمعطرات الطبيعية المصنوعة في البيت من الزيوت العطرية, او تحطي فازة تمليها بالورد المجفف, او تملي اكياس صغيرة بالورد والزهور المجففة وتوزعيها في البيت, ممكن تحطي على نار هادية جدا طبق فيه مية وتحطي فيه برتقان او توت بري او ليمون وقشر ليمون, او زيت الافندر, او القرفة والنعناع, اكليل الجبل, اوراق الغار, الينسون هيعطرلك البيت بريحة حلوة جدا يعني قدامك اختيارات كتير ممكن تستخدميها لتعطير البيت كبديل للمعطرات اللي ممكن تضرك.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

4- اسفنجات المطبخ:

الاسفنجات اللي بنستخدمها في غسل الاطباق او تنضيف رخامات المطبخ لازم تتخلصي منها كل اسبوعين تقريبا, لانها من اكتر الحاجات اللي بتتراكم عليها البكتيريا الضارة اللي ممكن تكون سبب لكتير من الامراض, لان تقريبا الاسفنج ممكن يحتوي على اكتر من 10 مليون بكتيريا لكل بوصة واحدة مربعة, يعني المفروض تغيريها خلال الشهر من 2 – 4 مرات, وكمان خلال من انتي بتستخدميها المفروض تغسليها اكتر من مره ممكن تغليها في مية, او تغسليها في غسالة الاطباق عشان تتخلصي من البكتيريا, والافضل كبديل للسفنجة ممكن تستخدمي فوطة مطبخ لانها ارق وبتنشف اسرع من السفنجة وبالتالي ده بيبطيء نمو البكتيريا, لكن بردوا لازم تتغسل باستمرار.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

5- الطاسات التيفال القديمة:

الطاسات التيفال او اللي ضد الالتصاق مع الوقت بنلاحظ انها بتقشر ومع ذلك بنستمر في استخدامها وده غلط جدا لان اول ما تقشر المفروض اننا نتخلص منها فورا لان المواد المصنوعة منها في الحالة دي بتبدأ تتفاعل مع الاكل اللي بيتعمل فيها ده غير ان البخار حتى اللي بيطلع منها وبنستنشقه بيكون مضر للصحة, والمادة الكيميائية الموجودة فيها مرتبطة بخطر الاصابة بالاورام, من الافضل انك تستبدلي الطاسات والاواني المصنوعة من مادة ضد الالتصاق بالاواني الحديد لانها اامن على الصحة.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

6- حافظة العدسات اللي مش نضيفة:

على الرغم ان العدسات امنة جدا ومافيش اي خطورة من استخدامها لكن لو مافيش اعتناء بنضافتها بشكل كويس جدا ممكن تسبب لك اضرار ومضاعفات في العين ممكن توصل لفقد الرؤية, عشان كده لازم نهتم بنضافتها كويس جدا ومن نضافة الحافظة بتاعتها عشان متتنقلهاش اي بكتيريا, والمفروض اننا نستبدل الحافظة تقريبا كل 3 شهور مع التنضيف المستمر ليها ونخليها تنشف كويس في الهوا بعد التنضيف قبل استخدامها مرة تانية, وتغيير المحلول يوميا.

وقبل استخدام العدسة لازم نغسل الايد كويس بالمية والصابون, ونحاول نتجنب استخدام اكتر من نوع محلول تطهير الافضل اننا نستخدم نفس النوع في كل مرة.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

7- مستحضرات التجميل المخصبة كيميائيا:

مستحضرات التجميل من اول احمر الشفايف للمانيكير لواقي الشمس والكريمات والمستحضرات اللي بنستخدمها تقريبا بشكل يومي لو استخدمتي المنتج الغلط اللي بيحتوي على المواد الكيميائية زي الرصاص والبريليوم والثاليوم والكادميوم والزرنيج وغيرها من المواد الكيميائية الضارة اللي ممكن تكون موجودة في المكياج ومستحضرات التجميل بشكل عام اكيد ده هيسبب لك اضرار على المدى البعيد, عشان كده لما تيجي تشتري اي مستحضر تجميل اختاري الانواع اللي مكوناتها قايمة على المعادن والزيوت الطبيعية, اختاري الصابون والشامبو الخالي من العطور والمواد الكيميائية الصناعية زي التريكلوسان, ابعدي عن واقيات الشمس المصنوعة من الاوكسي بنزون اللي ممكن تضر الجلد واستخدمي الكريمات المصنوعة من المعادن زي اكسيد الزنك وثاني اكسيد التيتانيوم, واكيد طبعا لازم ناخد بالنا من تاريخ انتهاء صلاحية اي حاجة بنستخدمها وبمجرد ما تنتهي لازم تتخلصي منها فورا.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

8- فرشة الاسنان القديمة:

فرشة الاسنان مع الوقت الشعيرات بتاعتها بيقل تأثيرها في تنضيف الاسنان ومش بتشيل البلاك ومش بتنضف الاسنان كويس وبالتالي الافضل اننا نتخلص منها عشان نحافظ على صحة الفم والاسنان, ولو بتستخدمي الفرشة بانتظام مرتين في اليوم يبقى في الحالة دي انتي محتاجة تغيري فرشة الاسنان تقريبا كل 3 شهور ولو لاحظتي قبل ال3 شهور ان الشعيرات بتاعتها مش زي الاول الافضل تغيريها, وعشان تحافظي على الفرشة سليمة حطيها دايما وقفة وتكون ناشفة والافضل تخزنيها في حافظة خاصة بيها لمنع العفن ونمو البكتيريا عليها, وقبل تخزينها لازم تتغسل كويس بالمية.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

9- الاحذية الرياضية القديمة:

معظم الاحذية الرياضية المفروش تستبدليها كل من 300 – 400 ميل يعني لو بتستخدميها او بتمشي بيها 30 ميل في الاسبوع يبقى في الحالة دي لازم تستبدليها كل 3 شهور, كمان مع الاستخدام فترة طويلة بيخلي تأثيرها اقل في حمايتك من الصدمات وبالتالي هتعرضي العضلات والعضم لصدمات اكتر, وممكن كمان تسبب الم في القدمين والركبتين, ولو مش بتستبدلي الحذاء الرياضي بتاعك كل 6 شهور مثلا ولقيتي انه وانتي لبساه مش مريحك او مش زي الاول يبقى في الوقت ده لازم تستبدليه.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

10- حمالات الصدر القديمة:

مع الوقت حمالة الصدر بتتمط وقماشها بيرخي مع الغسيل عشان كده الافضل انك تستبدلي حمالة الصدر بمجرد ما تحسي انها بقت مش مريحاكي في اللبس او بتتعبك يعني تقريبا المفروض تتغير كل 6 شهور, لانها لما بترخي او بتتمط بتخلي الصدر مش محكوم كويس فيها وده ممكن يأدي لترهل الثديين وكمان بيسبب الم الرقبة والضهر, وعشان تحافظي عليها اكبر فترة ممكنة اتجنبي انك تغسليها في الغسالة او تجففيها في المجفف لان ده بيفكك النسيج بتاعها بسرعة, الافضل انك تغسليها على ايدك بمية باردة وتنشريها في مكان ضل بعيد عن الشمس.

10 حاجات لازم تتخلصي منها عشان صحتك
10 حاجات لازم تتخلصي منها عشان صحتك

– نصايح اضافية:

1- لو عندك ملابس مركونة مش بتلبسيها ممكن تتبرعي بيها او تديها لحد محتاجها يستفاد بيها احسن ما هي مركونة.

2- لو عندك اكل متخزن في التلاجة في علب بلاستيك بقاله كام يوم الافضل انك تتخلصي منه.

3- متحاوليش تخزني مشروبات غازية كتير في التلاجة والافضل انك تتجنبي شربها لانها مضرة وبتسبب زيادة الوزن.

4- بدل ما تشتري المنظفات الصناعية اللي كلها مواد كيميائية مضرة ممكن تستخدمي البدائل الطبيعية للتنضيف زي صودا الخبز. الخل, الليمون والمية السخنة.

5- لو عندك في البيت جهاز تنقية الهوا متنسيش استبدال الفلتر بتاعه من فترة للتانية عشان ميطلعش هوا ملوث تستنشقيه ويضرك مع الوقت.

6- اتخلصي اول بأول من الادوية منتهية الصلاحية او لو عندك ادوية مش محتاجاها ممكن تديها لحد محتاجها بدل ما تركنيها لحد ما صلاحيتها تنتهي وبعدين ترميها.

7- ارمي التوابل القديمة اللي بقالها فترة طويلة عندك وحاسه انها فقدت نكهتها او ريحتها اتغيرت.

10 حاجات لازم تتخلصي منها عشان صحتك

شوفي 8 عادات لازم تتخلي عنهم عشان تحمي نفسك من الامراض في الايام البرد

عادات لو تجنبتيها هتحافظي على صحتك