ازاي تختاري وتستخدمي الماسكارا المضادة للمية waterproof

الماسكارا المضادة للمية Waterproof غير انها تعتبر الاختيار المثالي لاظهار جمال العين الميزة الاهم انها ثابتة وبتدوم ساعات طويلة من غير ما تتأثر بالجو او الرطوبة او الدموع او المية, والنهاردة من خلال موضوعنا هنقول لكل بنات حوا ازاي تختاري الماسكارا المضادة للمية Waterproof المناسبة ليكي, وازاي تستخدميها, وازاي كمان تشيليها.

– اختيار الماسكارا المضادة للمية Waterproof:

• – لما تيجي تختاري الماسكارا المضادة للمية اشتري اللي مكتوب عليها Smudge-proof يعني اللي ضد التلطيخ, والميزة فيها انها ثابتة وفي نفس الوقت بتحافظ على الرموش ناعمة وبتديها طول وكثافة بشكل طبيعي, ومكوناتها كريمي بحيث انها مش بتنشف مع الوقت.

– والماسكارا المضادة للمية بتبقى اخف من انواع الماسكارا التانية, لان الانواع اللي بتدي كثافة او حجم اكبر للرموش بتكون اتقل, ولو حابة تدي للرموش كثافة بدل استخدام انواع الماسكارا اللي بتعمل Volume او بتدي كثافة زيادة ممكن تستخدمي بدالها ال Lash Curler او اداة تني الرموش.

• – وبتيجي بكذا نوع منها لتطويل الرموش, او زيادة كثافتها, اختاري حسب احتياجك او اللي انتي عايزاه.

– انواع الماسكارا المضادة للمية:

في منها نوعين رئيسين و كل واحد منهم ليه مزايا مختلفة عن التاني عشان تناسب اللي انتي بتفضليه اكتر.

• – الماسكارا التقليدية: اول نوع هي الماسكارا التقليدية ودي اللي بتكون مكوناتها الاساسية معتمدة على الشمع والدهون عشان تدي الرموش طبقة تحميها من المية, بالاضافة للمكونات التانية زي الميثيكون, والسيليكون والعناصر دي عادة بتستخدم في معظم مرطبات البشرة, وهي مكونات مقاومة للدموع والمية وبتدوم فترة طويلة.

وعادة النوع ده بيتشال بمزيل المكياج الزيتي او اللي مكوناته فيها زيوت, ومزيلات المكياج المخصصة للمكياج اللي ضد المية, لكن منظفات البشرة العادية هيكون تأثيريها ضعيف في ازالة الماسكارا اللي ضد المية وهتحتاجي فرك كتير عشان تتشال وده ممكن يسبب ضرر للرموش والجلد اللي حوالين العين.

• – الماسكارا الانابيب: وده النوع التاني من الماسكارا اللي ضد المية والنوع ده مستخدم فيها تكنولوجيا البوليمر اللي بتعمل طبقة على كل رمش ضد المية وثابتة جدا ومش بتتأثر بالمية خالص لحد ما انتي تشيليها.

والنوع ده بيتشال بانك ترطبي العين بالمية وبالصوابع تبدأي تشيليها من على الرموش, والنوع ده من الماسكارا بيحمي الرموش والجلد لانها مش بتستخدم معاها مزيلات مكياج ولا محتاجة فرك منطقة العين عشان تتشال.

والنوع ده يعتبر ممتاز جدا لتطويل الرموش, وممكن تحطي منها اكتر من طبقة عشان تدي رموشك تأثير اكتر.

– الماسكارا المضادة للمية والعيون الحساسة:

تعتبر الماسكارا المضادة للمية افضل اختيار للعيون الحساسة لانها مش بتسيح ولا بتلطخ العين او الجلد اللي حوالين العين وبالتالي مش هضر العين او الجلد, ومناسبة جدا كمان للبنات اللي بيلبسوا لانسيز او عدسات لانها ثابتة ومش من النوع اللي بيسيح وممكن يدخل جوه العين.

– انواع فرش الماسكارا المضادة للمية:

فرشة الماسكارا اختيارها مهم جدا عشان الماسكارا تدينا التأثير اللي احنا عايزينه او النتيجة المطلوبة.

1- فرشة مستقيمة: ودي مناسبة جدا للرموش الصغيرة الل بتكون في زاوية العين.

2- فرشة منحنية: دي بيكون شكلها متناسق جدا مع منحنيات الرموش او بتبقى واخدة نفس الشكل وبتدي تأثير كانك حطيتي كذا طبقة من اول مرة.

3- فرشة سميكة: الفرشة السميكة بتدي كثافة للرموش من اول طبقة, ومع ذلك بتكون صعب شوية تطبقي بيها الماسكارا على الرموش الصغيرة اللي في زاوية العين.

4- فرشة حلزونية: الفرشة بتكون شكلها حلزوني وبتدي طبقة مزدجة بتوصل لكل رمش.

5- فرشة بكورة من فوق: شكل الفرشة بيكون مستقيم والجزء اللي فوق منها بيكون فيه جزء على شكل كورة صغيرة عشان توصل للرموش الصغيرة اوي.

6- فرشة صغيرة او دقيقة: بتكون الفرشة بتاعتها صغيرة عشان توصل لزوايا العين او اي مكان صعب.

– مميزات تانية في الماسكارا المضادة للمية:

غير كل المميزات اللي احنا قولناها للماسكارا في مميزات تانية كمان متوفرة فيها.

1- اللون: اللون ممكن يكون طبيعي او دراماتيكي وواضح اوي حسب اختيارك, لو عايزة لوك طبيعي اكتر اختاري اللون نفس درجة لون شعرك, بالنسبة للشعر الاشقر والاحمر افضل درجات ليهم هي البني, اما اللي شعرهم غامق افضل الوان ليهم البني الغامق المايل للاسود او الاسود الصريح, لو عايزة لون ملفت ومختلف ممكن تختاري لون ازرق, او برقوقي, او اخضر للوك مميز ومختلف.

2- التكثيف: زي ما قولنا ان الماسكارا المضادة للمية بتبقى اخف من الانواع التانية اللي بتدي كثافة للرموش بتكون تقيلة وبتعمل تكتلات على الرموش, لكن المضادة للمية هتديكي كثافة من غير تكتلات على الرموش وهتعمل تغطية متساوية للرموش كلها ومثالية جدا للرموش اللي تحت وبتديها لوك ناعم.

3- التطويل: بتدي طول للرموش, لما تطبقيها بشكل صحيح من الجذور لاعلى الرموش.

– ماسكارا برايمر ضد المية:

في نوع ماسكارا برايمر ودي بتتحط قبل الماسكارا عشان تزود فعاليتها وتثبتها اكتر وكمان بتدي نعومة للرموش بتخليكي تطبقي الماسكارا بشكل اسهل بكتير كمان بتساعد على منع التكتلات, وبتحافظ على طول وكثافة الرموش فترة طويلة.

وفي انواع من الماسكارا المضادة للمية بيجي معاها البرايمر بتاعها, او ممكن انتي تشتري الماسكارا برايمر لوحدها وممكن تستخدميها مع كل انواع الماسكارا.

– ازالة الماسكارا المضادة للمية:

بتتشال بسهولة جدا بمزيلات مكياج العين, وده بيقلل من فرك الرموش والعين بشكل ممكن يأذيهم او يعمل تعمل تهيج للجلد الحساس اللي حوالين العين.

– افضل انواع الماسكارا المضادة للمية:

1- لوريال L’Oreal Paris Double Extend.

2- مايبيلين Maybelline New York Great Lash, Maybelline New York Define-a-Lash Volumizing, Maybelline Full ‘N Soft.

3- ماكس فاكتور Max Factor 2000 Calorie Extreme Lash Plumper Waterproof.

4- نيتروجينا Neutrogena Healthy Volume.

5- ماك MAC Extended Play Gigablack Lash.

6- ريميل Rimmel Volumeflash Scandal Eyes Waterproof.

7- نيكس NYX proof it.

شوفي كمان ازاي تختاري الماسكارا المناسبة لرموشك