15 عادة بتعمليهم ممكن يضروا مظهرك وجمالك !
يوميا في خلال اهتمامنا بنفسنا وبمظهرنا في حاجات من اللي احنا متعودين نعملها كل يوم ممكن تضر مظهرنا دلوقتي او على المدى البعيد واحنا بنعملها دايما ومنعرفش انها ممكن تضرنا, والنهاردة هنقول لكل بنات حوا مجموعة عادات بتضر مظهرك وجمالك ممكن تكوني بتعمليها يوميا.
عادات بتضر مظهرك وجمالك:
1- تسريحة ديل الحصان بشكل يومي:
مافيش شك ان تسريحة ديل الحصان من التسريحات السهلة والعملية اللي بتدي لوك حلو ومفضلة عن كتير من البنات, لكن بالرغم من ده الافضل انها متبقاش تسريحتك الدايمة بشكل يومي لان سحب الشعر وشده من الجذور باستمرار ده بيأدي على المدى الطويل لتراجع الشعر وبيسبب الصلع في المستقبل, الافضل انك تغيري التسريحة وتدي شعرك حريته شوية وتعملي تسريحات مرنة مش بتحتاج شد للشعر بشكل قوي يأثر عليه.
2- بتشربي لبن كتير:
اكيد اللبن من الحاجات المفيدة لصحتنا ولكن شربة كتير زيادة عن اللزوم ممكن يأثر علينا بشكل سلبي لان اللبن بيحتوي على الاندروجينات اللي بتثير او بتنشط وظايف الغدة الدهنية وبتكون النتيجة زيادة افراز الدهون في البشرة اللي بتسد المسام وبتسبب ظهور البثور والحبوب وبتخلي البشرة شكلها باهت وتعبان.
3- بتحطي واقي الشمس على وشك بس:
واقي الشمس اكيد من الحاجات المهمة اللي لازم نستخدمها طول السنة عشان نحمي بشرتنا, لكن دايما لما بنحط الواقي بنحطه على الوش بس وبننسى الايد, والايد بتبقى حساسة اكتر للشيخوخة وبتتأثر بسرعة وده اللي بيخلي شكلها يعجز وتظهر فيها عروق بشكل واضح, عشان كده متنسيش تحطي الكريم الواقي على ايدك وخصوصا لو بتسوقي وايدك دايما متركز عليها الشمس, وكمان على الرقبة والصدر لو معرضين للشمس.
4- بتقعدي حاطة رجل على رجل:
لو بتقعدي دايما حاطة رجل على رجل يبقى لازم تغيري القعدة دي لانها واحدة من الاسباب الاساسية لدوالي الساقين لانها بتضغط على الاوعية الدموية وبتسبب اضطرابات الدورة الدموية, كمان بتسبب تراكم الدم في منطقة الحوض اللي بتكون مضره جدا للبنات والستات ومضرة جدا جدا للحوامل بشكل خاص, عشان كده حاولي على قد ما تقدري تتجنبي القعدة دي.
5- بتسرحي شعرك وهو مبلول:
اتجنبي انك تسرحي شعرك وهو مبلول خصوصا بفرشة او مشط ضيق لان ده بيسبب تقصف وتلف وانقسام الشعر, عشان كده الافضل انك تنشفيه كويس الاول بالفوطة او بالسيشوار على حرارة منخفضة وبعد كده تبدأي تسرحيه.
6- تنضيف الحواجب قبل وضع المكياج:
لو هتنضفي حواجبك بالملقاط اعملي ده من بالليل بعد غسل وشك لكن اتجنبي انك تنضفيهم قبل وضع المكياج على طول لان ساعتها المسام هتبقى متفتحة وممكن تدخل فيها بكتيريا تتسبب في تهيج البشرة حوالين الحواجب وظهور الحبوب والبثور.
7- استخدام السيشوار على اعلى درجة حرارة:
تعرض الشعر لدرجة حرارة عالية اوي سواء بالسيشوار او بالمكوى بيضر الشعر جدا لانه بيعمل فقاعات صغيرة جوه جذع الشعرة والفقاعات دي بتخلي الشعر جاف وسهل التكسر, وعشان تتجنبي ده خلي دايما درجة الحرارة متوسطة وخلي السيشوار بعيد عن الشعر بمسافة 15 سم.
8- فرك العين:
من العادات السيئة جدا هي فرك العين لانها ممكن تسبب ضرر للرموش وهتخليها ضعيفة وتقع بسهولة, وكمان ممكن تسبب ضرر للبشرة تحت العين وتخليها حمرا وشكلها مجهد, استبدلي عادة فرك العين بطريقة “20-20-20” وهي انك تبصي لبعيد لمدة 20 ثانية كل عشرين دقيقة الطريقة دي بتريح العين جدا من غير ما تسبب لها اي ضرر.
9- تشيلي في قلبك كره لحد:
اثبتت الدراسات ان في علاقة بين التسامح والصحة البدنية, لان شعور الكره او الضغينة ناحية حد ده بيسبب شيخوخة مبكرة ويخليكي تظهري اكبر من عمرك لان هرمون التوتر “الكورتيزول” بيتراكم في الجسم وبيسبب ارتفاع ضغط الدم ومستويات السكر في الدم وبيزود خطر الاصابة بمرض السكر, وكمان ممكن يسبب زيادة في الوزن, عشان كده حاولي تبقي دايما متسامحة.
10- لمس الوش:
لمس الوش بشكل مستمر او طول ما انتي قعدة بتحطي ايدك على خدك او تفركي دقنك او انفك, ده مضر جدا للبشرة لانه بيسبب خطوط وتجاعيد مبكرة في البشرة, وكمان ممكن يسبب حب الشباب لان اي بكتيريا او جراثيم على الايد هتتنقل لوشك لما تلمسيه, حاولي انك تتجنبي العادة دي وكل ما تلاقي نفسك هتلمسي وشك افتكري انك هتضريه ومع الوقت هتتعودي انك متلمسيهوش.
11- بتستخدمي بودرة كتير:
البودرة الكتير على البشرة بتضرها جدا وبتسبب انسداد المسام, فلو انتي بشرتك دهنية ومحتاجة انك تطفي لمعان البشرة باستمرار خلال اليوم بدل استخدام البودرة اكتر من مرة استخدمي الBlotting paper الخاص بامتصاص الدهون من البشرة او ورق الزبدة.
12- بتشيلي حاجات كتير في شنطة ايدك:
طبعا بنات كتير شنطة الايد بالنسبة لهم بتبقى دولاب متنقل :D بيحطوا فيها كل حاجة وخصوصا لو هتقضي يومك كله بره, وتقل الشنطة ده بيأثر بشكل سلبي على الكتف, عشان كده متنسيش دايما تبدلي مكان الشنطة من ايد لايد او من كتف للكتف التاني عشان ميبقاش التركيز على جنب واحد بس ويتعبك.
13- استخدام كريم البشرة بكمية كبيرة:
اكيد الاهتمام بالبشرة بالكريمات المناسبة حاجة مهمة جدا لكن كمان الحاجة اللي بتزيد عن حدها بتضر البشرة, عشان كده لما تيجي تستخدمي اي كريم مغذي للبشرة حطي منه طبقة رقيقة بس لان الطبقة السميكة هتبقى عاملة زي القناع على البشرة وهتخليها متعرفش تتنفس وهتضرها وبالتالي ده ممكن يسبب تورم البشرة وهالات سودا تحت العين وبخلي لون الوش مش صحي, ولو حسيتي انك حاطة طبقة سميكة ممكن تشيلي الزيادة بمنديل ورق.
14- ممارسة الجري كتير زيادة عن اللزوم:
اكيد الجري من الرياضات المفيدة الصبح, لكن كمان لما تكون زيادة عن اللزوم ممكن تضر وتسرع شيخوخة الجلد, عشان كده الافضل انك الصبح تمارسي جري خفيف هيكون افيد.
15- شرب العصير كتير:
اكيد عصير الفاكهة والخضروات الطازة غني جدا بالمواد المضادة للاكسدة اللي بتحارب الجذور الحرة, لكن مع ذلك العصاير بتحتوي على كمية كبيرة من الفركتوز او جزيئات السكر اللي بتمر في مجرى الدم لجميع خلايا الجسم وبتتحد مع الدهون والبروتينات ولما السكر بيتحد مع الكولاجين في الدم بيسبب تجاعيد البشرة, عشان كده الافضل انك تستبدلي العصاير اللي فيها سكريات بعصير الكرنب او العصير الاخضر اللي من الخضروات الخضرا بشكل عام لانها بتحتوي على كمية كبيرة من مضادات الاكسدة والزنك اللي بتمنع التجاعيد.
اعرفي كمان وشك ممكن يقولك ايه عن صحتك !
