اعرفي وشك ممكن يقولك ايه عن صحتك !
الوش يعتبر انعكاس لصحتنا الداخلية اي خلل في نظام الجسم او حتى الحالة النفسية بنلاقيها بتنعكس بشكل مباشر على الوش والبشرة لان اجزاء الوش المختلفة مرتبطة مع مختلف اجهزة الجسم وبتعكس الحالة الصحية, يعني ممكن نلاقي في خطوط في البشرة, علامات معينة في الجلد, العين شكلها متغير وهكذا, عشان كده دايما لما بنروح للدكتور بنلاقيه بيبدأ كشفه انه يفحص العين او اللسان واجزاء تانية من الوش عشان يعرف منها بشكل مبدأي انتي ممكن تكوني بتعاني من ايه, والنهاردة هنعرف مع بعض وشك ممكن يقولك ايه عن صحتك من خلال تفسير كل علامة بتظهر عليه.
اعرفي وشك ممكن يقولك ايه عن صحتك:
1- اصفرار الجلد والعين:
لو لاحظتي لون اصفر على بشرتك او بياض العين لونه اصفر ده بيدل على مرض اليرقان او “الصفار” وده بيحصل نتيجة تراكم مادة صبغية بنية مايلة للاصفرار في انسجة الدم والجسم اسمها البيليروبين والمادة دي بتتراكم تحت الجلد وبتسبب اللون الاصفر اللي بيظهر على البشرة ودي بتتكون من انهيار خلايا الدم الحمرا الميتة في الكبد.
ممكن كمان اللون الاصفر يكون علامة لامراض في الكبد, زي التهاب الكبد او تليف الكبد, او مشاكل في المرارة او البنكرياس.
وبيحصل مع اصفرار الجلد والعين اعراض تانية زي التعب, الصداع, الحمى, فقدان الشهية, الغثيان, القيء, فقدان الوزن, الم في البطن, حكة في الجلد, وبيكون لون البول والبراز شاحب او فاتح اوي.
وبالتالي لو ظهر اصفرار البشرة او اي حاجة من الاعراض دي لازم تستشيري الدكتور.
2- طفح جلدي على شكل فراشة:
اي طفح جلدي على البشرة ده يعتبر علامة مؤكدة ان في مشكلة في الجسم, الطفح الجلدي اللي بيكون احمرار على شكل فراشة على الخدين بيشبه حروق الشمس كده, دي ممكن تكون علامة انك بتعاني من مرض الذئبة, والذئبة هو عبارة عن اضطراب في جهاز المناعة بيأثر على الجلد والمفاصل والدم والرئتين والكلى.
والاعراض التانية اللي ممكن تحسي نتيجة المرض ده هي التعب, آلام المفاصل, تورم والم في العضلات, انخفاض درجة حرارة الجسم, تضخم الغدد الليمفاوية, الم في الصدر, ضيق في التنفس, احتباس السوائل, الصداع المتكرر.
لو بتعاني من النوع ده من الطفح الجلدي واي حاجة من الاعراض دي لازم تستشيري الدكتور عشان الاهمال فيه ممكن يسبب مضاعفات تانية زي امراض القلب والاوعية الدموية, والكلى.
3- شعر الوجه الزائد:
في بنات كتير بيعانوا من مشكلة الشعر الزائد في الوش وخصوصا عند منطقة الدقن وخط الفك والشفة العليا وبتكون مشكلة محرجة جدا ده بيكون من اعراض متلازمة تكيس المبايض اللي بتأدي لخلل في توزان الهرمونات وارتفاع في مستوى هرمون الذكورة, والمرض ده بيكون بشكل خاص عن الستات بعد سن اليأس بسبب التغييرات الهرمونية المفاجئة اللي بتحصل في الجسم.
وممكن تحصل اعراض تانية مع الشعر الزائد منها اضطراب الغدة الكظرية, وفي حالات نادرة جدا ممكن يكون الشعر الزائد ده بسبب ورم او سرطان الغدة الكظرية او المبايض.
4- الجلد الشاحب:
لو جلدك شاحب وحاسه ان مافيش فيه حياة ده بيدل على نقص الحديد وفقر الدم وبالتالي الجسم مش بينتج الهيموجلوبين بشكل كافي اللي يعتبر ضروري جدا عشان يدي اللون الاحمر للدم وبالتالي ده بينعكس على بشرتك وبيخليها وردية ومنورة.
وفي حالات نقص الحديد الشديدة بيكون الجلد لونه شاحب اوي حتى الشفايف كمان واللثة وداخل الجفن لونهم بيكون شاحب.
وممكن تعاني مع الجلد الشاحب من اعراض تانية زي التعب بشكل عام, ضيق التنفس, الصداع, برودة الايدين والقدمين, والضوافر بتبقى هشة وبتتكسر بسرعة.
لو بتعاني من نقص الحديد حاولي تزودي في نظامك الغذائي الاكلات الغنية بالحديد زي اللحوم الحمرا, الرمان, العدس, الفاصوليا, وعشان تتأكدي ان الجسم بيمتص الحديد كويس كلي الاكلات الغنية بفيتامين سي زي الخضار الورقي اللي لونة اخضر, البروكلي, القرنبيط, اللوبيا الخضرا, البقدونس, الزعتر, الفلفل الرومي, البرتقان, الكيوي, الفراولة, الليمون.
5- الجلد الجاف وتقشر الشفايف:
الجلد الجاف او تقشر الشفايف تقريبا كلنا او معظمنا بيعاني منه من فترة للتانية وده ممكن يكون سببه حاجات بسيطة زي الهواو البارد في الشتا, او استخدام المية السخنة كتير زيادة عن اللزوم وده بيسبب جفاف الجلد وتقشر الشفايف لان الجلد بيحتوى تقريبا على 30% من المية اللي بتحافظ على مرونته وبالتالي اي انخفاض في النسبة دي بيسبب جفاف في الجلد وتشقق الشفايف.
وانخفاض منسوب المية في الجسم ده معناه ان مافيش عرق كفاية بيخرج من الجسم عشان ينضف الجسم من السموم ويزيل الدهون الزيادة من على البشرة وبالتالي بتتراكم وبتسبب حب الشباب وامراض جلدية تانية زي الصدفية والاكزيما.
وافضل حل للمشكلة دي هو ترطيب البشرة عن طريق شرب كمية كافية من المية خلال اليوم, وترطيب الجلد والشفايف بدهنهم بزيت جوز الهند او زيت الزيتون.
وفي بعض الحالات جفاف الجلد ممكن يكون بسبب مشاكل في الغدة الدرقية, او مرض السكر, او نقص فيتامين بي.
6- تلون الجلد:
الستات اللي بيعانوا من تكيس المبايض ممكن يظهر على بشرتهم تلون وتصبغات غامقة في الجلد بتبقى عبارة عن بقع لونها بني او اسود سميكة في الرقبة والجبهة والسرة والابطين والثديين, وده بيحصل بسبب ارتفاع مستويات الانسولين عند الاشخاص اللي بيعانوا من متلازمة تكيس المبايض هي اللي بتسبب ظهور الجلد الغامق السميك على البشرة.
واكتر الاشخاص المعرضين لتكيس المبايض هما اللي بيكونوا عندهم تاريخ مرضي في العيلة من مرض السكر او السمنة.
7- التجاعيد العميقة المبكرة:
التجاعيد اكيد مافيش مفر من ظهورها مع التقدم في العمر لكن احيانا بيحصل انها بتظهر في سن صغير خصوصا في منطقة حوالين الفم والجبهة, وده بيظهر اكتر بشكل خاص للاشخاص المدخنين لان التعرض لدخان السجاير والنيكوتين بيضيق الاوعية الدموية في الطبقات الخارجية للجلد وبيقلل من تدفق الدم وبالتالي ده بيحرم البشرة من الاوكسجين والعناصر الغذائية اللازمة لبشرة صحية وجميلة.
8- تشققات في زوايا الفم:
التشققات اللي بتحصل حوالين الفم ده مرتبط بشكل كبير بنقص فيتامين بي 2 او نقص الريبوفلافين, نقص فيتامين بي في الجسم ممكن يأدي لالتهاب في اغشية الفم والجلد والعينين والجهاز الهضمي.
وممكن تحصل اعراض تانية مع تشقق زوايا الفم زي تورم الاغشية المخاطية والجفون الملتهبة, والقروح على الشفايف والفم, واحمرار الجلد.
ولحل المشكلة دي دخلي في نظامك الاغذائي الاكلات الغنية بفيتامين بي زي الفراخ, سمك السلمون, التونة, البيض, المحار, الطماطم المجففة, السلق, الفول السوداني, الفاصوليا والبقوليات بشكل عام, او تاخدي مكملات غذائية بتحتوي على فيتامين بي لكن بعد استشارة الدكتور عشان يكتبلك الفيتامين المناسب.
وممكن في بعض الحالات بيكون سبب تشققات زوايا الفم هو نقص الحديد او الزنك, يعني لازم يكون نظامك الغذائي صحي والجسم بيحصل على الفيتامينات اللي لزماه.
9- بقع صفرا حوالين العين:
البقع الصفرا حوالين العين ممكن تكون علامة على امراض القلب, بتظهر غالبا حوالين العين والزاوية الداخلية من الجفون وبتكون غير مؤلمة ومالهاش تأثير سلبي على الرؤية او النظر, وغالبا بتكون مرتبطة بشكل مباشر مع تصلب الشرايين, ومرض الشريان التاجي, واضطراب شحوم الدم.
وفي دراسات كتير اثبتت ان البقع الصفرا دي بتظهر اكتر للاشخاص المدخنين او اللي بيعانوا من السمنة او ارتفاع ضغط الدم او مرض السكر وكلها عوامل بتأدي بشكل اساسي لامراض الشريان التاجي.
10- العيون المنتفخة:
العيون المنتفخة او الهالات السودا تحت العين بتحصل لكتير من الناس بسبب السهر او عدم النوم ساعات كافية او العياط كتير, لكن لو عندك المشكلة دي وانتي مش بتسهري وبتنامي كويس يبقى ده اكيد دليل على وجود مشكلة صحية, ممكن تكون في الحالة دي بسبب امراض العيون الدرقية اللي بتسبب تورم في الانسجة والعضلات اللي حوالين العين.
وممكن تظهر اعراض تانية مع انتفاخ العين زي تغيير شكل العين, تحسي كأن في رملة في عينك, العين بتدمع دايما, عدم وضوح الرؤية, الم جوه او خلف العين وخصوصا لما تيجي تبصي فوق او تحت او للجنب.
وفي بعض الحالات انتفاخ العين ممكن يكون سببه اضطراب الغدة الدرقية, او مشاكل في الكلى اللي ممكن تأدي لانتفاخ وتورم في اجزاء تانية من الجسم بشكل عام بما فيهم حوالين العين.
شوفي كمان خريطة حب الشباب على الوش ممكن تقولك ايه عن صحتك !
