10 حاجات صحية ممكن تضيفيهم للمية عشان تخلي طعمها احلى وصحية اكتر

بقلمريهام محمود فيصحة visibility1

المية من الحاجات المهمة جدا لصحة الجسم وبالرغم ان في مشروبات صحية دلوقتي في السوق لكنها متعتبرش بديل للمية لان المية مهمة جدا لصحة انسجة وخلايا الجسم عشان تشتغل بشكل سليم, والجسم دايما محتاج لها لانها بتحافظ عليه رطب, وبتنظم درجة حرارة الجسم, بتعمل تليين للمفاصل, وازالة السموم والفضلات من الجسم, بتساعد على الهضم, وصحة الجلد وكل الفوايد دي على سبيل المثال مش الحصر لان المية فوايدها مش هتنتهي, لكن المشكلة ان في ناس كتير بيهملوا شرب المية وده بيأثر بشكل سلبي على الصحة بشكل عام عشان كده النهاردة جايبنلكم 10 حاجات صحية ممكن تضيفيهم للمية هتخلي طعمها احلى ولذيذ وهتشجعك انك تشربي منها كميات اكبر وكمان هتخليها صحية اكتر.

10 حاجات صحية ممكن تضيفيهم للمية:

1- الليمون:

الليمون من الحاجات اللي ممكن تضيفيها للمية عشان تغيري من طعمها وتديها نكهة مختلفة وفي نفس الوقت هيبقى مشروب منعش وغير انه هيدي نكهة للمية هو مفيد للصحة لانه مصدر غني جدا بالعناصر الغذائية زي الكالسيوم, البوتاسيوم, المغنسيوم, الحديد, فيتامين A وC وB المركب, والبكتين, والالياف, والكربوهيدرات.

والليمون بيحتوي على خصائص مضادة للسرطان, بيساعد على انقاص الوزن, بيحافظ على صحة القلب, بيمنع حصى الكلى, بيعزز الجهاز المناعي, بيعمل توازن بين مستوى درجة الحموضة في الجسم.

املي ازازة كبيرة بالمية وقطعي شرايح ليمون وحطيها معاها وممكن تضيفي لها كمان كام ورقة نعناع وشرايح جنزبيل رفيعة على حسب ما تحبي وممكن تضيفي لها تلج لو عايزاها سقعة اوي, وحطيها في التلاجة من 2 – 3 ساعات وبعدين اشربي منها طول اليوم.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

2- البطيخ:

البطيخ من الحاجات الممتازة جدا اللي ممكن تضيفيها للمية عشان تديها نكهة وتخليها صحية اكتر, والبطيخ بيتكون اصلا من المية بنسبة 92%, بالاضافة للعناصر المضادة للجفاف, والكالسيوم, والمغنسيوم, والبوتاسيوم, وفيتامين A وC, وغير انه بيحافظ على رطوبة الجسم كمان بيساعد على التحكم في ضغط الدم, خفض الدهون في الجسم, تحسين صحة العين, الحفاظ على الكلى صحية, وتحسين المزاج.

املي ازازة كبيرة مية قطعي البطيخ قطع سميكة وشيلي منه اللب وضيفيه للمية, وممكن تضيفي لها اوراق ريحان, وسيبيها في التلاجة من 2 – 3 ساعات وبعدين اشربي منها.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

3- الخيار:

الخيار بيتكون من المية بنسبة 96% وقيمتة الغذائية عالية جدا, ومش بيحتوي على اي دهون او كوليسترول, غني جدا بفيتامين K و B6, والحديد, والنحاس, والاحماض الامينية, والكربوهيدرات, والالياف, والبوتاسيوم, والمنجنيز, والفوسفور, والمغنسيوم, والبيوتين, والسيليكا, كمان الخيار ممكن تضيفيه لاي نظام غذائي لانقاص الوزن لانه بيدي شعور بالشبع, بيساعد على خفض ضغط الدم, بيقي من السرطان, بيحارب الشيخوخة, بيحسن صحة الجلد, بيعزز صحة المخ.

قشري الخيار وقطعية شرايح رفيعة وضيفيها للمية, سيبيه في التلاجة من بالليل للصبح وبعدين اشربي منه عادي وممكن كمان بعد ما تشربي المية كلها تاكلي شرايح الخيار, والافضل اننا نشرب كمية المية كلها خلال اليوم وتاني يوم نعمل جديد.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

4- البرتقان:

البرتقان غني بفيتامين B وA وC, والكالسيوم, والمغنسيوم, والبوتاسيوم, الفوسفور, والالياف الغذائية, البرتقان بيساعد على تعزيز المناعة, بيجدد شباب الجلد, بيساعد على خفض الكوليسترول, بيحسن صحة القلب, بيحسن صحة العين وبيحميها, بيحمي من التهاب المفاصل.

قشري البرتقان وقطعيه شرايح ضيفيها للمية وممكن تضيفي لها عصير ليمون واوراق نعناع, سيبيها في التلاجة ساعتين على الاقل وبعدين اشربي منها على مدار اليوم.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

5- الاناناس:

الاناناس غني جدا بفيتامين A وC, والثيامين, والكالسيوم, والبوتاسيوم, والفوسفور, والمنجنيز, وحمض الفوليك, والاناناس بيساعد على تخفيف الالتهاب, ازالة السموم من الجسم, تخفيف آلام والتهاب المفاصل, تحسين الهضم, تعزيز المناعة, بيمد الجسم بالطاقة من غير اضافة سعرات حرارية كتير.

قطعي الاناناس قطع صغيرة وضيفي 2 كوب منه على المية وممكن تضيفي لها اوراق نعناع, سيبيها في التلاجة 8 ساعات او طول الليل وبعدين تقدري تشربي منه على مدار اليوم.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

6- الشاي الاخضر:

الشاي الاخضر معروف بفوايدة الصحية الكتير جدا ويعتبر من الحاجات الممتازة جدا اللي ممكن نضيفها للمية لانه بيحتوي على خصائص مضادة للفيروسات, ومضادات للاكسدة, ومضادات للالتهاب, بيساعد على خفض مستوى السكر في الدم, بيزود التمثيل الغذائي وبالتالي بيساعد على انقاص الوزن, بيساعد على خفض الكوليسترول, بيقي من السرطان, تحسين صحة الفم والاسنان.

حضري من 1 – 2 كوباية شاي اخضر بالطريقة العادية وسيبيه لحد ما يبرد وبعدين صبيه في مكعبات التلج وحطيه في الفريزر لحد ما يتجمد, واثناء ما هو بيتجمد حضري المية املي الازازة بمية سقعة وضيفي لها اوراق نعناع وشرايح جنزبيل وسيبيها في التلاجة كام ساعة ولما تيجي تشربي املي ¾ الكوباية من المية دي وحطي عليهم مكعبين شاي اخضر وشوية عصير ليمون.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

7- الفراولة:

الفراولة بتحافظ جدا على رطوبة الجسم لانها بتتكون من المية بنسبة 92%, غير انها بتحتوي على كل انواع الفيتامينات اللي بتعزز النظر عشان كده تعتبر مشروب مثالي جدا للي بيستخدموا الكمبيوتر فترات طويلة, كمان بتحتوي على مضادات اكسدة قوية, وخصائص مضادة للالتهاب, بتكافح الشيخوخة, وبتحافظ على صحة الجلد.

املي ازازة مية وضيفي لها كام ثمرة فراولة مهروسة شوية واوراق مرمرية بعد ما تدقيها شوية يعني متبقاش مطحونة او ناعمة اوي, وحطي المية في التلاجة من 2 – 3 ساعات على الاقل وبعدين اشربي منها.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

8- القرفة:

القرفة غنية جدا بمضادات الميكروبات القوية, ومضادات الالتهابات, وخصائص مضادة للتخثر وده بينعكس بشكل ايجابي جدا على الصحة بشكل عام, كمان غنية بالمعادن زي الكالسيوم, والمنجنيز, والحديد, والالياف الغذائية, والقرفة بتساعد على خفض مستوى السكر في الدم, خفض خطر الاصابة بأمراض القلب, بتساعد على خفض الوزن, بتقي من السرطان, بتحفز قدرة المخ.

املي ازازة بالمية وحطي فيها كام عود من القرفة وسيبيها في التلاجة من بالليل للصبح.

وفي طريقة تانية ضيفي كام عود قرفة لكوباية مية ويبيهم يغلوا على النار لمدة 10 دقايق وبعد لما يبرد حطيه في التلاجة وكل ما تيجي تشربي ضيفي من المحلول ده على المية العادية واشربيها.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

9- التوت:

التوت غني بالعناصر الغذائية المفيدة جدا للصحة, بيحتوي على مضادات الاكسدة, وفيتامينات A وC وE, والريبوفلافين, وحمض الفوليك, والالياف, والنياسين, والمغنسيوم, والبوتاسيوم, والمنجنيز, والنحاس, والحديد, والزنك, التوت بيساعد على مكافحة الشيخوخة, بيعزز قدرة المخ, بيحارب السرطان, بيعزز صحة القلب, وكمان يعتبر وسيلة للمساعدة في انقاص الوزن.

املي الازازة بالمية وضيفي لها كوبايتين من التوت المهروس بس مش ناعم اوي وضيفي لهم بتلات ورد او زهور اللافندر وهتلاقوها عند العطار وسيبيها في التلاجة 30 دقيقة على الاقل, وبعدين اشربي منها.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

10- الكيوي:

الكيوي يعتبر مصدر ممتاز جدا لفيتامين سي وفيتامين اي وايه وكاي, والمعادن زي الكالسيوم, والمغنسيوم, والفوسفور وده بيساعد على تقوية المناعة, بيقلل الاجهاد, بيحارب الشيخوخة, بيعزز من التئام الجروح, بيزود من امتصاص الحديد لصحة العضم, بيخفض مستوى الكوليسترول في الدم, بيساعد على حماية الخلايا من التلف اللي ممكن يسبب السرطان, بيساعد على طرد السموم من القولون.

قشري الكيوي وقطعية شرايح رفيعة ضيفيه لازازة المية وضيفي عليهم اوراق نعناع وسيبيها في التلاجة ساعتين وبعدين اشربي منها.

10 حاجات صحية ممكن تضيفيهم للمية
10 حاجات صحية ممكن تضيفيهم للمية

اعرفي كمان ازاي تعملي مشروبات الطاقة بنفسك في البيت

طريقة عمل مشروبات الطاقة
طريقة عمل مشروبات الطاقة