10 قواعد اساسية لاختيار الاكسسوارات بطريقة صح

بقلمريهام محمود فيموضة وأزياء visibility6213

زي ما كلنا عارفين ان الاكسسوارات جزء مهم في اي لوك عشان يحسنه ويكمله ويطلع بشكل احلى, واحنا اتكلمنا قبل كده عن ازاي تختاري الاكسسوارات المناسبة للبسك ولوشك, وازاي تختاري الخاتم المناسب لايدك, النهاردة هنقولك على 10 قواعد اساسية لاختيار الاكسسوارات بطريقة صح من خلال مجموعة افكار هتعرفي منهم ازاي تجمعي ما بين الاكسسوار واللبس بتاعك بشكل انيق.

قواعد اساسية لاختيار الاكسسوارات بطريقة صح:

1- متلبسيش اكتر من 3 – 4 قطع اكسسوار بحجم كبير:

اول قاعدة معانا هي خاصة بلبس الاكسسوارات اللي بيكون حجمها كبير, ممكن تلبسي اكتر من قطعة مع بعض بس المهم ميزدش عن من 3 – 4 قطع كبيرة مع بعض, ولازم تكون متناسقة او متطابقة في الالوان والستايل والمواد المصنوعة منها الاكسسوارات.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

2- ماتخفيش اللياقة الكبيرة بسكارف كبير:

لو لابسة بالطو او جاكيت بلياقة كبيرة في الحالة دي انتي مش محتاجة تلبسي سكارف كبير فوق اللياقة, ممكن تكتفي بسكارف صغير على الرقبة تحت طبقات الهدوم.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

3- البسي طقم اكسسوارات كامل بحجم صغير:

في بنات كتير مش بتفضل تلبس طقم كامل وبتشوف انه ممكن يكون مافيهوش ذوق وده صح بشكل جزئي لان الموضوع بيعتمد على حجم الاكسسوارا انتي ممكن تلبسي طقم اكسسوارات كامل يعني يكون الكوليه او العقد والحلق والخاتم والاسورة لكن بشرط يكون حجمها صغير هتطلع بشكل انيق لكن لو حجمها كبير هيبقى الشكل اوفر ومش حلو.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

4- انسي قاعدة الشنطة لازم تكون لون الشوز:

من زمان احنا ماشيين على قاعدة ان الشنطة لازم تكون لون الشوز لكن انسي القاعدة دي لان اتجاه الموضة اتغير دلوقتي وبقى مش شرط انك تلبسي شنطة وشوز بنفس اللون, وبالعكس كمان لو انتي لابسة شوز بلون فاقع اوي هيكون اشيك انك تمسكي شنطة بلون اهدى او متناقض مع لون الشوز اللوك هيطلع احلى, او ممكن تلبسي الشوز والشنطة بلون واحد مع اللبس الكلاسيك او الفورمال اوي.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

5- حددي اولوياتك ياما ملابس زاهية او اكسسوارات ملفتة:

دايما في اللوك بتاعك حدديي انتي عايزة تظهري ايه اكتر لبسك او مكياجك او اكسسواراتك اختاري حاجة واحدة منهم تظهريها عن الباقيين ويكون التركيز عليها, يعني متجمعيش بين التلاتة مع بعض ميبقاش مكياج صارخ مع ملابس زاهية واكسسوارات ملفتة لان اللوك هيطلع اوفر جدا يعني مثلا انك تلبسي لياقة عالية او ضخمة ومعاها حلق كبير اوي هيطلع اللوك مش حلو لان في عنصرين في اللبس ملفتين, الافضل اننا نختار التركيز على حاجة واحدة بس.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

6- متلبسيش ساعة مع فستان سهرة:

لو رايحة مناسبة ولابسة فستان سهرة متلبسيش معاه ساعة, الافضل ان الساعة تتلبس مع اللبس الكاجوال او الفورمال.

 وكان في قاعدة اتيكيت قديمة جدا بتقول انه متلبسيش الساعة في مناسبة او سهرة عشان لما هتبصي في ساعتك كل شوية هتحسسي اللي حواليكي انك حاسة بالملل من المكان وانتي المفروض تكوني مستمتعة ومبسوطة ومتبصيش للوقت.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

7- الخواتم الكبيرة مش بتناسب الكل:

نخلي بالنا لما نيجي نختار الخواتم ان الخواتم الكبيرة مش مناسبة لكل الصوابع يعني لو صوابعك قصيرة مينفعش تلبسي خواتم كبيرة لانها هتقصرها اكتر لكن ممكن تلبسي خواتم رفيعة هتبين الصوابع اطول, واحنا اتكلمنا قبل كده بالتفصيل عن اختيار الخواتم المناسبة لشكل ايدك ممكن تشوفوه من هنا..دليلك لاختيار الخاتم المناسب لايدك.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

8- الجوانتي لازم يكون لونه نفس لون اي قطعة في لبسك:

لو هتلبسي جوانتي في طريقة سريعة تختاري بيها لون الجوانتي المناسب انه يكون لون حاجة من اللي انتي لبساها زي الحزام, او الشوز, او حتى لون الروج, وكقاعدة عامة لازم يكون الجوانتي متناسق على الاقل مع قطعة واحدة من اللبس بتاعك.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

9- اتجنبي الشوز الاسود لو لابسة الوان باستيل:

الالوان الباستيل من الالوان الموضة والتريندي اوي, لو انتي لابسة الوان باستيل الافضل تنسقي معاها شوز بألوان فاتحة, لان الالوان الغامقة مش بتطلع حلوة معاها وهتبوظ اللوك بتاعك.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

10- البسي الاكسسوارات التراثية مع لبس بألوان محايدة:

لو هتلبسي اكسسوارات تراثية او خاصة بثقافة معينة وفيها تفاصيل كتير وخرز الافضل انك تنسقيها مع لبس بألوان محايدة زي البني, البيج, الاسود, الرمادي, الابيض لكن متلبسيش معاها لبس بألوان زاهية اوي او مشجر.

قواعد اساسية لاختيار الاكسسوارات بطريقة صح
قواعد اساسية لاختيار الاكسسوارات بطريقة صح

دليل هيساعدك تختاري الاكسسوارات المناسبة مع لبسك وشكل وشك

اختيار الاكسسوارات المناسبة للبس
اختيار الاكسسوارات المناسبة للبس