ازاي تختاري البوت المناسب لشكل جسمك
البوت يعتبر قطعة اساسية لموسم الشتا لان غير انه بيدفي كمان بيدي اناقة للوك بتاعنا بس اكيد مش اي شكل بوت بيليق على اي جسم لان كل جسم مختلف عن التاني وممكن استايل معين للبوت يخلي شكلك احلى ويطلع اللوك بتاعك اشيك لو اختارتيه صح عشان كده النهاردة هنقولك ازاي تختاري البوت المناسب لشكل جسمك عشان تظهري بشكل احلى.
ازاي تختاري البوت المناسب لشكل جسمك:
– اتعرفي على شكل جسمك:
اول حاجة عشان تختاري البوت الصح المناسب ليكي انك تعرفي شكل جسمك سواء كمثري او جسم على شكل تفاحة او ساعة رملية او مستطيل واحنا اتكلمنا قبل كده بالتفصيل عن شكل كل جسم تقدروا تشوفوه من هنا.
– اعرفي فئة طولك:
لازم تكوني عارفة انتي طولك كام بالظبط ومن اي فئة يعني طويلة ولا قصيرة ولا طولك متوسط لان ده هيساعدك انك تختاري البوت المناسب ليكي اللي يطلعك بشكل احلى, وحسب الاحصاءات والدراسات اتحدد متوسط طول المرأة حوالي 163 سم يعني لو انتي اطول من الرقم ده تبقي انتي من فئة صاحبات القامة الطويلة ولو اقصر تبقي من فئة صاحبات القامة القصيرة ولو زيه يبقى من فئة الطول المتوسط, لكن طبعا لازم نحط في الاعتبار ان الطول ده ممكن يختلف من بلد للتانية بس تقريبا عندنا في مصر الرقم ده يعتبر مناسب لينا ممكن نقيس عليه.
– البوت المناسب لشكل جسمك:
بعد ما اتعرفتي على شكل جسمك وطولك دلوقتي هنعرف ايه البوت المناسب لكل جسم.
1- الانكل بوت:
الانكل بوت يعتبر اكتر نوع منتشر وعملي جدا وممكن يتلبس على اي لبس وفي اي مناسبة والستايل ده يعتبر مناسب لكل اشكال الاجسام سواء كنتي قصيرة او طويلة او مليانة او رفيعة ايا كان جسمك هيمشي معاكي استايل الانكل بوت, ممكن تنسقيه مع بنطلون جينز نفس لون البوت او مع ليجينج, والافضل تختاريه بكعب عشان يبين الرجل اطول.
2- البوت متوسط الطول:
استايل البوت اللي بيكون اطول شوية من الانكل بوت هيكون مناسب جدا للجسم المستطيل سواء كنتي قصيرة ورفيعة, او طويلة ورفيعة استايل البوت ده هيبقى مناسب ليكي وهيدي حجم اكبر لمنطقة الكاحل والسمانة وهيطلعك بشكل احلى, وممكن تختاري بوت بكعب عشان تديكي طول اكتر لو كنتي قصيرة.
3- البوت الطويل لحد الركبة:
استايل البوت ده مناسب جدا للجسم الكيرفي او المليان والجسم الكمثري, لانها هتظهر شكل الساقين اطول وانحف, ولو لبستيه بكعب كمان هيدي لوك شيك جدا وكلاسيكي, ممكن تنسقيه مع فستان قصير او جيبة, او مع السكيني جينز بيطلع شيك جدا.
4- البوت الطويل فوق الركبة:
استايل البوت ده مناسب للبنت الطويلة بشكل خاص, ولو قصيرة اتجنبي الاستايل ده خالص لانه هيبينك اقصر, كمان لصاحبات الجسم الكيرفي او المليان يبعدوا عن الستايل ده لانه هيبين حجم السيقان اضخم واكبر وهيظهرك اقصر.
– نصايح عامة:
1- الجسم التفاحي مناسب ليهم جدا الكعب الودجز العريض لانه الجسم ده بتبقى منطقة السيقان عندهم رفيعة والستايل ده هيدي حجم اكبر للسيقان ويعمل توازن في شكل الجسم.
2- الجسم الكيرفي مناسب ليه جدا البوت بالكعب المربع لانه بيكمل منحنيات الجسم وبيظهرها بشكل احلى.
3- لو الساقين عندك قصيرين اتجنبي لبس البوت الطويل لحد الركبة مع ابازيم او اشرطة لان التفاصيل دي هتبين رجلك اقصر.
4- البوت اللي بكعب رفيع اوي هيكون مناسب جدا مع الجسم اللي مافيهوش منحنيات او مش كيرفي ومع السيقان الكاحل والسمانة النحيفة او الرقيقة.
5- لو عايزة منطقة القدم والرجل تبان اطول وبحجم اصغر البسي البوت المدبب من قدام اللي بيكون بوزه رفيع هيديكي شكل اطول وحجم اصغر للقدم والرجل.
6- لو قدمك حجمه صغير جربي تلبسي Kitten heels بتدي لوك حلو جدا للاقدام اللي حجمها صغير وبتبقى مريحة في نفس الوقت.
وفي النهاية مهما كان شكل جسمك او طولك اهم حاجة يكون عندك ثقة في النفس وتحبي جسمك وتمشي بثقة هو ده اللي هيخلي اي حاجة تظهر حلوة عليكي.