8 خطوات بسيطة هتخلي المكياج يثبت فترة اطول ويبقى ضد العرق
عدم ثبات المكياج فترة طويلة من المشاكل اللي بتقابل كتير من البنات وبيعانوا ان المكياج بيروح بسرعة او بيتأثر بالجو والعرق, او البنات اللي بتكون بشرتهم دهنية والمكياج مش بيثبت على بشرتهم فترة طويلة, عشان كده النهاردة هنقول لكل بنات حوا خطوات بسيطة هتساعدك على تثبيت المكياج فترة طويلة وهتخليه ضد العرق او حرارة الجو او الرطوبة او افراز الدهون الزيادة من البشرة يعني ايا كان سبب عدم ثبات المكياج الخطوات دي هتساعدك انه يثبت معاكي فترة اطول.
تثبيت المكياج فترة طويلة:
1- البرايمر:
البرايمر يعتبر هو المفتاح السحري لثبات المكياج وخصوصا لصاحبات البشرة الدهنية اللي بيعانوا من مشكلة افراز الدهون الزيادة وعدم ثبات المكياج, حطي البرايمر قبل مكياجك هيساعدك على تثبيت المكياج فترة اطول وهيقلل من حجم المسام ومتنسيش تحطي البرايمر على العيون كمان عشان تثبتي مكياج العين.
2- استخدمي المنتجات المائية:
استخدمي منتجات البشرة المائية ودي اللي بيكون اساس مكوناتها المية لان في نوعين من منتجات البشرة المنتجات الزيتية ودي اللي بيكون اساس مكوناتها الزيت وبتحتوي على نسبة قليلة من المية, والنوع التاني اللي اساس مكوناتها من المية يعني بيحتوي على كمية كبيرة من المية وده اللي المفروض نستخدمه لانه غير دهني واسهل في الوضع على البشرة ومش بيسيب اثر, يعني لما تيجي تشتري اي منتج بصي على نسب مكوناته وشوفي نسبة الزيوت ولا المية هي الاكتر.
استخدمي كريم الاساس والكونسيلر اللي بيندمج بسهولة على بشرتك وميبقاش شكل الوش كيكي يعني تحسي ان المكياج متكتل عليه, ادمجيهم كويس على البشرة سواء باستخدام السبونج او الفرشة او بصوابعك او بالبيوتي بلندر باي اداة انتي بتستخدميها المهم تدمجيهم كويس جدا على البشرة بشكل متساوي, واستخدمي قبل المكياج كريم مرطب مناسب لنوع بشرتك عشان يسهل اكتر دمج المكياج على البشرة ويطلع شكله مثالي.
3- استخدمي مكياج عيون يدوم فترة طويلة Long lasting:
طبعا مكياج العيون مهم جدا وبيظهر جمال الوش كله ولو مكياج العيون بتاعك باظ او ساح هيبوظ لوك مكياجك كله عشان كده لازم تستخدمي انواع مكياج العيون اللي بتدوم فترة طويلة اللي بيكون مكتوب عليها Long lasting, وعشان تثبتي الايشادو اكتر حطي الاول الايشادو البودر وفوقيه ايشادو كريمي وده هيخليه مش بس يثبت فترة اطول كمان هيظهر الوان الايشادو بتاعتك اكتر, ولو انتي بتستخدمي دايما الايشادو البودر طبقيه بفرشة ايشادو رطبة يعني رشي الفرشة بالمية او بمثبت المكياج وبعدين حطي بيها الايشادو الطريقة دي هتساعدك على ثباتة اكتر وكمان هتخليه يندمج اسهل على العيون.
4- استخدمي آيلاينر وكحل ضد المية Water proof:
بعد ما حطينا الايشادو اللي هيدوم معانا فترة طويلة اكيد هنكمل اللوك بالايلاينر او الكحل, اتأكدي من استخدام الانواع اللي بتكون ضد المية او Water proof وخصوصا لو جفونك دهنية ومش بيثبت عليها المكياج والايلاينر والكحل بيسيح بسرعة فعشان تتفادي عيون الباندا استخدمي الانواع الووتر بروف زي مايبيلين, ولوريال, وماك.
5- ابعدي عن البلاشر الكريمي:
اكيد البلاشر خطوة مهمة جدا لانه بيدي حياة للمكياج بتاعنا, بس الافضل تبعدي عن انواع البلاشر الكريمي خصوصا لو بشرتك دهنية لكن البشرة الجافة مافيش مشكلة من استخدامه, وبرغم ان البلاشر الكريمي مزجه اسهل على البشرة وبيدي لوك طبيعي وحيوي للبشرة لكن مشكلته انه مش بيثبت فترة طويلة وممكن يسيح بسرعة, لكن لو انتي من محبات البلاشر الكريمي ممكن تطبقي البلاشر الكريمي على البشرة وتحطي فوقيه بلاشر بودر عشان يثبته.
6- استخدمي الروج المات:
الروج المات بيتميز عن الروج اللامع ان ثباته اقوى وبيقعد فترة اطول على الشفايف, لكن قبل الروج المات لازم ترطبي شفايفك الاول حطي لها زبدة كاكاو هيخلي الشفايف شكلها ناعم وهيمنع تشققها, وعشان تثبتي الروج فترة اطول حطي على الشفايف طبقة من البودرة الشفافة وبعدين اضغطي بشفايفك على منديل ورق عشان تشيلي اي زيادات وبعدها طبقي فوقيها طبقتين او تلاتة من الروج, الطريقة دي هتخلي الروج يثبت معاكي 24 ساعة كاملة.
7- استخدمي البودرة الشفافة:
بعد ما تخلصي المكياج بتاعك حطي لمسة نهائية من البودرة الشفافة, مش بس هتثبت المكياج كمان هتمنع العرق الزيادة من البشرة.
8- استخدمي التلج:
التلج هنستخدمه مرتين على البشرة الاول قبل وضع المكياج مرري مكعب تلج على البشرة, وبعد ما تخلصي المكياج بتاعك كله هاتي مكعب تلج ومررية على وشك كله وعلى العيون والشفايف بخفة جدا وبعدين هاتي منديل ورق وطبطبي بالراحة على البشرة عشان يمتص المية كلها, الحيلة دي يمكن تشوفيها غريبة لكن هتساعدك على تثبيت مكياجك كله لفترة طويلة يعني تقريبا هتقوم بدور مثبت المكياج.
ملحوظة: عشان تحافظي على اللوك بتاعك كله الافضل انك تلمي شعرك وانتي خارجة تعملي تسريحة كحكة او ضفيرة عشان تخلي الشعر بعيد عن الوش وهتحافظ كمان على شعرك طول ما انتي بره من العرق او الرطوبة.
اعملي مثبت المكياج بنفسك في البيت
