16 قاعدة اتيكيت وآداب عامة لازم تنفذيهم في حياتك !
في حياتنا عموما وفي تعاملاتنا مع اللي حوالينا اكيد في اغلب الوقت بنتعامل بطبيعتنا وبحرية ومن غير قواعد او خطوط لكن في حاجات كده لازم ناخد بالنا منها في تعاملاتنا وتصرفاتنا اليومية بره البيت او حتى في البيت و مع الناس القريبين مننا, وهو ده اللي هنعرفه النهاردة من خلال مجموعة قواعد اتيكيت وآداب عامة ضروري تحاولي تنفيذهم في حياتك.
قواعد اتيكيت وآداب عامة لازم تنفذيهم في حياتك:
1- متزوريش حد من غير اتصال:
متروحيش تزوري حد من غير اتصال او دعوة منه كتير مننا ممكن يعمل كده خصوصا مع الناس القريبين الاهل او الاصحاب نقول عادي نروح لهم من غير اتصال هما مش اغراب لكن ده مش صح حتى لو حد قريب منك او واخدة عليه اوي لازم بردو تتصلي قبل ما تروحي لان ممكن يكون مش مستعد لاستقبالك او عنده مشوار هيعمله فعشان متحطيش نفسك او الطرف التاني في موقف محرج الافضل انك تتصلي قبل ما تروحي لزيارة اي حد.
2- متسبيش الشمسية مفتوحة:
لو جاية من بره من جو مطر سواء في المكتب في شغلك او في مكان خاص بشخص تاني متسبيش الشمسية مفتوحة عشان تنشف, حطيها على حامل الشمسية او حطيها على عُلاقة.
3- متحطيش شنطتك على رجلك او على الكرسي:
لما بنكون في اي مكان عام بره البيت غالبا لما بنقعد بنحط الشنطة على رجلنا او على الكرسي, لكن الصح لو ماسكة شنطة صغيرة كلتش ممكن تحطيها قدامك على الترابيزة, ولو شنطة Handbag بايد علقيها على ضهر الكرسي او حطيها جنبك على الارض.
4- استخدمي الاكياس البلاستيك للسوبر ماركت بس:
الاكياس البلاستيك و اكياس العلامات التجارية اللي من المحلات استخدميها وانتي رايحة السوبر ماركت او رايحة تتسوقي بس, لكن متستخدميهاش خالص وانتي خارجة خروجة عادية كبديل للHandbag مثلا تحطي فيها حاجتك لان الشكل هيبقى مش حلو خالص.
5- البسي في البيت لبس مريح ومرتب:
اختاري للبس البيت هدوم مريحة وفي نفس الوقت مرتبة يعني ممكن تلبسي مثلا بنطلون وسويتر مريح وانتي قعدة وبيجامة النوم تلبسيها لما تكوني خلاص داخلة تنامي.
6- خبطي على باب الاوضة قبل ما تدخلي:
طبعا النقطة دي بالذات بتفوت على ناس كتير اوي مننا انك تستأذني قبل ما تدخلي اوضة حد وخصوصا اوضة البنت او الابن كتير بيحصل او اغلب الوقت تقريبا انك ممكن تدخلي عليهم الاوضة من غير ما تخبطي على اساس ان الام والاب عادي يدخلوا لكن احنا لازم نحط في اعتبارنا احترام الخصوصية لان لما انتي هتعملي كده مع ابنك او بنتك هما بالتالي هيتصرفوا نفس تصرفك ويقلدوكي ويخبطوا او يستأذنوا قبل ما يدخلوا اوضتك, وده مش بس من آداب او قواعد الاتيكيت لكن دي تعتبر قاعدة مهمة من قواعد التربية والدين كمان هو الاستئذان.
7- ممكن تلبسي قبعة وجوانتي في البيت:
في الجو البرد اوي بنكون محتاجين ندفي نفسنا بس لازم تفرقي ما بين اللي يتلبس في البيت واللي يتلبس وقت الخروج يعني ممكن تلبسي جوانتي وقبعة للراس في البيت لكن متلبسيش زونط او كاب وMittens اللي هو بيكون جوانتي بصوباع واحد بس والباقي جزء واحد مش متقسم مغطي الايد كلها الافضل ان دول يبقوا للخروج بس.
8- متلبسيش اكسسوارات كتير:
متزوديش في عدد قطع الاكسسوار اللي انتي لبساها المفروض انها متتعداش 13 قطعة والعدد ده داخل فيه كل حاجة بما فيهم حتى زراير اللبس, ولو لابسة جوانتي ممكن تلبسي فوقية اسورة عادي لكن متلبسيش خاتم, والاكسسوارات الغالية او القيمة الافضل تلبسيها لخروجات بالليل, بس زمان كان في قاعدة كده في الاتيكيت ان الست المتجوزة بس ممكن تلبس الماس بالليل لكن في الايام دي القاعدة اتغيرت وبقت عادي ممكن تتلبس الصبح.
9- لو عازمة حد ادفعي الحساب:
لو وجهتي دعوة لحد او عازمة شخص في مكان تشربوا او تاكلوا حاجة يبقى ده معناه انك انتي اللي لازم تدفعي الحساب, لكن لو الاقتراح كان في مجموعة يعني مثلا مجموعة اصحاب وواحد قال ياللا بينا نروح نشرب حاجة او ناكل في مكان ده معناه ان كل واحد هيدفع لنفسه لان العزومة متوجهتش لشخص معين هو كان اقتراح على الكل, ولو راجل عرض عليكي هو اللي يدفع الحساب ممكن توافقي وتسيبيه هو يدفع.
10- الاتيكيت في الاسانسير:
الشخص اللي بيكون موجود في الاسانسير الاول عادة بيكون هو اقرب شخص للباب.
11- اقعدي في العربية ورا الشخص اللي سايق:
الكرسي اللي المفروض الست تقعد فيه في العربية هو الكرسي اللي ورا الشخص اللي سايق و الراجل يقعد في الكرسي اللي جنبها, ولما ينزل من العربية المفروض من الاتيكيت انه ينزل الاول ويفتح لها الباب ويمسك ايدها وهي نازلة وبرغم ان القاعدة دي تقريبا اختفت والحياة اتغيرت كتير لكن لازم نحاول اننا نرجعها تاني.
12- الاتيكيت في السينما او المسرح:
لو رايحة السينما او مسرح او قاعة حفلات وانتي بتتحركي لمكانك او للكرسي بتاعك لازم يبقى وشك هو اللي مواجه للناس اللي قعدين مش ضهرك.
13- حاجات متسأليش عليها:
في حاجات كده او محرمات مينفعش نسأل فيها وهي السياسة والدين والصحة والمال, الحاجات دي المفروض اننا منسألش حد عليها عشان منحطش نفسنا والطرف التاني في موقف محرج لانه ممكن يكون مش حابب يتكلم فيها او تسأليه على حاجة تعتبر خاصة بالنسبة له, يعني مثلا لو حد سألك على سعر حاجة انتي لبساها وانتي مش عايزة تقولي ممكن تبتسمي ابتسامة خفيفة وتقولي انها هدية, او تغيري الموضوع وتتكلمي في حاجة تانية, لكن لو الشخص اللي قدامك مصمم يعرف ممكن تردي بلطف وتقولي له انك مش حابه تقولي بكل بساطة.
14- متاخديش على اللي حواليكي زيادة عن اللزوم:
ساعات كتير بنشيل الحواجز بينا وبين اللي حوالينا بسرعة وبنتعامل بود وعشم اوي ومبيبقاش فيه اي قواعد في التعامل لكن ده مش صح, لانه انتي المفروض تعاملي اللي قدامك زي ما انتي حابه يعاملك عشان كده لازم يكون في دايما حدود للتعامل واحترام حتى لو شايفة ان الشخص ده قريب منك اوي لكن لازم الاحترام بردو يكون موجود في كل الاحوال.
15- متتكلميش على حد مش موجود:
“النميمة” او انك تتكلمي على شخص مش موجود دي من اسوأ الحاجات اللي ممكن تتعمل, يعني متتكلميش على حد او تشتكي منه وهو مش موجود نهائيا, او تقعدي مع قرايبك او اصحابك وتشتكي من زوجك لان ساعتها هيبدأو يتدخلوا في خصوصياتك وممكن يقولوا لك حاجات توتر العلاقة بينكم زيادة او ينصحوكي نصايح تأذيكي.
كمان لو مثلا عايشة في بلد غير بلدك متتكلميش على بلدك او اهلها بشكل سيء مع الناس لان في النهاية دي بلدك الاصلية والناس دي في النهاية انتي واحدة منهم ومهما بعدتي هترجعي لها.
16- احتفظي ب9 اسرار في حياتك:
في 9 حاجات لازم يكونوا اسرار في حياتك ومتتكلميش فيهم وهما العمر, الثروة او المال, المشاكل العائلية, الدين, المشاكل الطبية او الصحية, علاقات الحب, الهدايا, الشرف, او حاجة تمس السمعة, الحاجات دي المفروض متتكلميش فيها مع حد بتفاصيل ولا تسألي حد عنها.
في النهاية قواعد الاداب العامة او الاتيكيت كتيرة جدا زي مثلا لو قعدة في عزومة تمرري الطبق للي جنبك, انك متناديش على حد بصوت عالي وانتي في اوضة تانية, متفتحيش باب مقفول على حد من غير ما تخبطي او تستأذني, في اي مكان خلي الست هي اللي تمر الاول او تقعد الاول , كلها حاجات بسيطة جدا بس ضروري اننا نحطها في اعتبارنا في تعاملاتنا اليومية عشان نخلي حياتنا افضل وفي دايما احترام متبادل مع اللي حوالينا.
اهم نصايح فن الاتيكيت في حياتك اليومية والاجتماعية
