افضل 10 انواع اكل هتخلي ريحتك حلوة !

في كتير من البنات بيعانوا من مشكلة ريحة الجسم وبتكون حاجة محرجة جدا وبتسبب اكيد عدم ثقة في النفس, والمشكلة دي بترجع لاكتر من سبب ممكن يكون نتيجة تغيرات هرمونية في الجسم, او افراز عرق زيادة, او النظافة الشخصية, واحيانا بتكون وراثة, او بسبب نظام غذائي غير صحي لان اي حاجة بناكلها بتنعكس ريحتها على جسمنا, وبرغم ان مزيلات العرق والمعطرات متوفرة كتير وممكن نستخدمها لكن الحاجات دي بتعالج المشكلة بشكل مؤقت لكن مش بتعالج السبب الاساسي, وحل المشكلة ممكن يكون بسيط جدا وهو عن طريق نظام غذائي صحي وايه اللي تاكليه وايه اللي تبعدي عنه عشان تتجنبي المشكلة, وده اللي هنعرفه النهاردة مع بعض هنقولك افضل انواع اكل هتخلي ريحتك حلوة وهتساعد انك تتخلصي من الروايح الكريهة في الجسم وهتطهر الاجهزة بتاعتك, والاكلات دي فعالة كمان في علاج مشكلة رائحة الفم الكريهة.

افضل انواع اكل هتخلي ريحتك حلوة:

1- الليمون:

الليمون من الحاجات اللي بتلعب دور اساسي في ريحة الجسم لانه مطهر طبيعي وبيحتوي على خصائص مضادة للجراثيم بتساعد على التخلص من ريحة الجسم ورائحة الفم الكريهة.

وكمان الخاصية الحمضية اللي موجودة في الليمون بتساعد على خفض مستوى الرقم الهيدروجيني للبشرة وده بيساعد على قتل البكتيريا اللي ممكن تسبب ريحة للجسم, والليمون غني بفيتامين C اللي بيساعد على تقوية المناعة وازالة السموم الضارة من الجسم, والميزة في الليمون ان الجسم بيمتصه بسرعة وبسهولة وبالتالي بيحسن ريحة الجسم بسرعة جدا.

ابدأي يومك كل يوم بكوباية مية دافية وعليها ليمون عشان تساعد على تنضيف اجهزة الجسم.

كمان ممكن تستخدمي الليمون لريحة القدمين وتحت الابطين, افركي نص ليمونة على المناطق اللي فيها ريحة وسيبي العصير لحد ما ينشف وبعدين اغسلي المنطقة بالمية ورطبيها, وكرري الوصفة مرة واحدة في اليوم.

2- الطماطم:

كمان من انواع الاكلات اللي بتساعد في التخلص من ريحة الجسم هي الطماطم, لانها بتحتوي على خصائص مضادة للجراثيم ومطهر طبيعي بتساعد على خفض كمية البكتيريا اللي ممكن تسبب ريحة الجسم.

كمان الطماطم تعتبر قابض طبيعي وبتساعد على تقليل مسام البشرة وبتمنع افراز الدهون وبالتالي بتسيطر على التعرق الزيادة, وشرب عصير الطماطم بيخفض درجة حرارة الجسم وده بدوره بيقلل من العرق.

اشربي كل يوم نص كوباية عصير طماطم, او دخليها في طبق السلطة.

ممكن قبل الحمام تدهني اماكن الجسم اللي بيبقى فيها عرق زيادة بعصير الطماطم وتسيبيه من 10 – 15 دقيقة وبعدين تاخدي الحمام بتاعك, كرري الوصفة دي حسب الحاجة.

3- الشاي الاخضر:

الشاي الاخضر غني جدا بالمواد المضادة للاكسدة وده بيساعد انه يمنه ريحة الجسم ورائحة الفم الكريهة وكمان ريحة القدمين, كمان بيساعد على ازالة السموم لانه بيزود انتاج الجلوتاثيون وده يعتبر الناقل للاكسدة اللي بتزيل السموم الضارة من الجسم, ومادة البوليفينول في الشاي الاخضر بتساعد على انعاش النفس وتدمير المركبات اللي بتسبب رائحة الفم الكريهة.

حطي من 1 – 2 معلقة شاي اخضر في كوباية وصبي عليها مية سخنة وغطيها وسيبيها من 2 – 3 دقايق وممكن تضيفي لها عسل نحل وتشربيه, اشربي المشروب ده يوميا من 3 – 4 مرات.

4- زيت جوز الهند:

زيت جوز الهند يعتبر مزيل عرق طبيعي رائع جدا بيدي الجسم ريحة حلوة لانه بيحتوي على خصائص مضادة للميكروبات  لانه غني بالاحماض الدهنية اللي بتساعد في السيطرة على البكيتريا اللي بتسبب ريحة الجسم, كمان زيت جوز الهند بيدعم صحة الجهاز الهضمي وبيساعد في التخلص من رائحة الفم الكريهة.

خدي معلقة من زيت جوز الهند واعملي بيها مضمضة لمدة من 15 – 20 دقيقة, وبعدين اتخلصي منه واغسلي سنانك بالفرشة بالطريقة العادية, كرري الوصفة يوميا الصبح على الريق.

ممكن تدهني زيت جوز الهند على الاماكن اللي بتعرق في الجسم هتقلل العرق وهتديكي ريحة حلوة.

5- اكليل الجبل “الروز ماري”:

عشبة اكليل الجبل او الروز ماري من انواع الاعشاب العطرية اللي بتساعد في التخلص من ريحة الجسم لانها بتقتل البكتيريا المسببة للريحة, كمان مركبات المنثول والكلوروفيل اللي موجودة في الروز ماري بتدي ريحة حلوة للجسم.

حطي من 1 – ½ معلقة من الروز ماري في كوباية وصبي عليه مية سخنة وغطيه وسيبيه 5 دقايق وبعدين اشربيه, اشربي منه كوبايتين في اليوم.

ممكن تضيفي من 8 – 10 نقط من زيت الروز ماري لربع كوباية مية وتمسحي الاماكن اللي بتعرق في الجسم بقطنة من الخليط ده, كرريها من 2 – 3 مرات في اليوم, بس لو لقيتي بشرتك حساسة منه او سبب اي تهيج في الجلد وقفيه.

6- المرمرية:

المرمرية كمان من الاعشاب اللي بتساعد انها تدي ريحة حلوة للجسم لانها بتحتوي على مركبات عطرية زي الابيجينين, والوتيولين, كمان بتمنع البكتيريا انها تتكاثر على الجلد وبالتالي بتقضي على ريحة الجسم, كمان المرمرية بتقلل من نشاط الغدد العرقية وبتخليكي تعرقي اقل, وبتساعد على طرد السموم الضارة من الجسم, وبتساعد على تحسين صحة الفم والاسنان.

حطي معلقة صغيرة من المرمرية الطازة او الجافة في كوباية وصبي عليها مية سخنة وغطيها وسيبيها 5 دقايق وبعدين اشربيها وممكن تضيفي لها كام نقطة عصير ليمون, اشربي منها من 1 – 2 مرة في اليوم.

او ممكن تضيفي 2 معلقة مرمرية مجففة كبيرة ل 4 كوبايات مية سخنة وسيبيها لمدة 10 دقايق لحد ما تبرد شوية واستخدميها لشطف الجسم او على الاماكن اللي بتعاني من العرق الزيادة, واستخدميها حسب الحاجة.

ملحوظة: مش بننصح الحوامل او اللي بيرضعوا انهم يشربوا منها, وكمان بالنسبة للعاديين الافضل متشربوش منها كميات كبيرة لانها ممكن تسبب دوخة يعني بالكتير زي ما قولنا كوباية او اتنين في اليوم مش اكتر من كده.

7- القرفة:

القرفة من انواع التوابل اللي بتعطر ريحة الفم والجسم وكمان الجسم بيمتصها بسرعة, القرفة بتحتوي على زيوت طيارة بتساعد في التخلص من رائحة الفم الكريهة لانها بتقلل البكتيريا من الفم.

حطي عود خشب متوسط الحجم من القرفة او معلقة قرفة صغيرة في كوباية مية سخنة وغطيها وسيبيها 10 دقايق وبعدين اشربيها, اشربي منه مرة واحدة يوميا على الاقل, وغير انها بتدي ريحة حلوة كمان بتحسن صحة الجهاز الهضمي.

ولرائحة الفم الكريهة استخدمي شاي القرفة بارد كغسول للفم اعملي بيه مضمضة هتخلصك من الريحة بشكل فوري.

8- البقدونس:

البقدونس بيحتوي على زيوت قوية جدا بتساعد في التخلص من الروايح الكريهة, كمان بيحتوي على خصائص مضادة للبكتيريا بتساعد على قتل البكتيريا المسببة لريحة الجسم, وبيزيل السموم من الجسم.

افرمي معلقة صغيرة بقدونس وضيفيها لكوباية مية سخنة وغطيها وسيبيها 5 دقايق واشربيها, اشربي منه كوبايتين في اليوم.

وممكن تستخدمي شاي البقدونس الدافي كغسول للفم عشان تتخلصي من رائحة الفم الكريهة, او تمضغي اوراق البقدونس الطازة كحل سريع.

9- نبات القمح الاخضر:

نبات القمح الاخضر بيحتوي على كمية كبيرة من الكلوروفيل, المركب المسئول عن ريحة الجسم, وغني جدا بفيتامين B والمواد المغذية اللي بتساعد على تنظيم درجة حرارة الجسم.

اخلطي 2 معلقة كبيرة من عصير نبات القمح في كوباية مية, واشربيه كل يوم الصبح على الريق.

10- البرتقان:

البرتقان من الاكلات اللي بتساعد على التخلص من ريحة الجسم وبتخلي ريحته حلوة.

اشربي كل يوم على الفطار كوباية عصير برتقان مضاف ليها معلقة مية ورد واوراق نعناع.

او ممكن تضيفي فنجان مية ورد لمية الشرب واتعودي انها تكون من روتينك اليومي بتدي الجسم ريحة حلوة جدا.

– نصايح اضافية:

1- اتجنبي اكل الثوم والبصل لانه من الحاجات اللي بتسبب ريحة قوية للجسم.

2- حاولي تتجنبي الاكلات اللي بتحتوي على نسبة عالية من الكبريت زي الكرنب, اللفت, البصل, الثوم, البيض.

3- اتجنبي اكل اللحوم الحمرا كتير, والاكلات اللي فيها نكهات صناعية والوجبات السريعة لانها بتحتوي على سموم بتطلع في العرق وبتسبب ريحة الجسم.

4- كتري من اكل الخضروات والفاكهة الطازة عشان تزيلي السموم من الجسم وتسيطري على ريحة جسمك.

5- اشربي كمية كافية من المية يوميا عشان تمنعي تراكم السموم في الجسم.

6- خدي شاور مرة واحدة في اليوم على الاقل وخصوصا لو بتعرقي كتير.

7- اغسلي هدومك بشكل مستمر عشان متتراكمش فيها البكتيريا.

8- متلبسيش الاحذية الضيقة, وحاولي تتجنبي لبس الشوز فترة طويلة.

9- خلي دايما جسمك جاف وبعيد عن الرطوبة اللي ممكن تسبب تكون بكتيريا على الجلد.

10- اختاري دايما الاقمشة القطن بدل الاقمشة الصناعية عشان تتجنبي العرق وتمنعي الرطوبة اللي بتسبب البكتيريا.

شوفي كمان وصفات مزيلة للعرق ومعطرة لرائحة الجسم