10 نصايح ازاي تتعاملي مع زوجك بعد الخلاف العنيف

ريهام محمود
ريهام محمود
46082

اكيد مافيش اي حياة زوجية بتخلي من المشاكل بين الطرفين سواء مشاكل صغيرة ممكن تمر بسهولة او مشاكل كبيرة وخلافات عنيفة بين الزوجين بتحتاج وقت في حلها, لكن احنا النهاردة هنقولكم ازاي تتعاملوا مع المشاكل دي عشان تمر بسلام وازاي تتعاملي مع الزوج بعد الخلاف العنيف وترجعي الوضع بينكم مستقر وتتعاملوا بكل حب.

نصايح ازاي تتعاملي مع الزوج بعد الخلاف العنيف:

1- عدي لحد 10:

الحيلة دي بسيطة اوي لكن فعالة جدا لو دخلتي مع الزوج في اي جدال وسمعتي كلمة منه ممكن تكون ضايقتك وحاسه ان المشكلة هتكبر عشان تتفادي ده خدي نفس عميق وعدي لحد 10 في سرك, الطريقة دي هتخليكي تعملي كونترول على نفسك وميبقاش ردك سريع ومش محسوب وتقولي كلام ممكن تندمي عليه بعدين.

2- اتفقوا على اشارة توقف:

ممكن تكوني متفقة انتي وهو على اشارة معينة تعملوها لو حصل بينكم خلاف عشان توقفوا الجدال بينكم والموضوع ميكبرش, يعني لو حسيتي ان المشكلة هتكبر اوي بينكم واحد فيكم يعمل الاشاره دي عشان ينبه التاني انه يوقف الخناق, مثلا اشاره بالايد او كلمة معينة يعني اي لفته تكونوا متفقين عليها من قبل كده توصل رسالة للطرف التاني ان الخناق لازم يتوقف عند الحد ده وميكبرش اكتر من كده.

3- متحاوليش تكسبي:

لو دخلتوا في جدال مع بعض متحاوليش تكسبي باي طريقة لانك مش داخلة حرب! اي طرف ممكن يغلط عادي وانتي اكيد مش دايما صح, يعني متتمسكيش بوجهة نظرك زيادة عن اللزوم حتى لو موقفك قوي او معاكي حجج قوية يعني متحاوليش تثبتي بكل الطرق ان الطرف التاني غلطان وخلاص, لا خليكي مرنة اكتر وتقبلي انك ممكن تكوني غلطانة.

4- في حاجات متستاهلش الخناق:

اكيد طبيعي جدا انه يكون في اختلاف في الاراء بينكم لكن في حاجات بتكون مش مستاهلة الخناق او انك تعملي عليها مشكلة في حاجات ممكن تتناقش بهدوء من غير جدال لانك كده ممكن تعملي توتر في العلاقة بينكم على حاجات بسيطة وصغيرة وممكن تعدي, عشان كده خلي عندك دايما الحكمة في انك تعرفي ايه الحاجات اللي ممكن تستاهل انك تتخانقي عليها او تعملي مشكلة وايه لا.

5- احضنيه:

اكيد هتقولي طبعا ده مش وقت احضان خالص ! لانه لما بيكون في خلاف او سوء فهم مع شريكك اخر حاجة هتفكري فيها انه يكون في اتصال جسدي بينكم, لكن بالرغم من ده الاتصال الجسدي ده او اللمس مهم جدا في اللحظة دي لانك هتوصلي رسالة ليه انك عايزة تكوني معاه مهما كان الخلاف بينكم, ومتخافوش ابدا انكم تعملوا الخطوة دي ويكون كمان الحضن دافي وقوي وبحب لان ده ممكن يساعد جدا في تجنب خناقة اكبر وهيخلكي تحلي المشكلة اللي انتي فيها بشكل اسهل.

نصايح ازاي تتعاملي مع الزوج بعد الخلاف العنيف
نصايح ازاي تتعاملي مع الزوج بعد الخلاف العنيف

6- حاولي تفهميه:

خلينا نواجه نفسنا اننا ساعات بنفسر تصرفات الطرف التاني بمزاجنا وحسب وجهة نظرنا واللي احنا شايفينه بس عشان كده بندخل في مشاكل كتير لاننا بنشوف الموضوع من زاويتنا احنا بس وبنفكر بطريقة سلبيه دايما, يعني مثلا لو متعاونش معاكي في شغل البيت بتفسريها انه شخص مش متعاون او مش حاسس بتعبك, لو نسي مناسبة خاصة زي عيد ميلادك او عيد جوازكم مثلا هتفسريها انه مش مهتم بيكي ولا بعلاقتكم بشكل كفاية, لكن حاولي بقى تحققي الشيء المستحيل وتفهمي هو بيتصرف كده ليه وتحاولي انك تغيري الامور وده هيأدي انك تغيري طبيعة تعاملك كلها وهتلاقي الحياة بقت احلى واسهل.

7- مافيش مشكلة لو نمتوا زعلانين:

على عكس المتوقع او عكس اللي الغالبية بيفكروا فيه انكوا متناموش زعلانين من بعض, لكن الخبراء بينصحوا انه مش ضروري توصلوا لصلح او اتفاق في نفس اليوم اللي اتخانقتوا فيه, خدي وقتك وخدوا راحة وفترة تفكير, وممكن تحاولوا توصلوا لحل تاني يوم مافيش مشكلة العلاقة مش هتتدمر زي ما انتوا متخيليين لو نمتوا زعلانين من بعض يوم, مافيش حاجة هتحصل بالعكس ده ممكن يكون افضل لانك هتدوا فرصة لنفسكم انكوا تهدوا وتفكروا بشكل عقلاني اكتر.

8- اكسري التوتر بحاجة مرحة او فكاهية:

بعد ما تهدوا والامور تستقر شوية بعد الخناقة ممكن تحاولي تلطفي الجو بانك تقولي نكتة تعملي اي تصرف يضحك الطريقة دي فعالة جدا في كسر التوتر اللي هيكون بعد الخناق, يعني متحاوليش تتعاملي معاه بسخرية او بطريقة قاسية, اعملي لفتة حلوة بريئة او قولي كلمة مضحكة ده هيساعد ان الامور تهدى وتستقر اسرع بينكم.

9- اعرفي موقفك كويس:

كل واحد من الطرفين اكيد اثناء الخناق بيبقى ليه موقف ومتمسك بيه, حاولي كده في النص تاخدي نفس عميق لمدة 10 ثواني وتفكري بالظبط انتي ايه اللي خلاكي تزعلي وتتخانقي وهل فعلا موقفك صح ولا لا, لان الغضب بيخلينا ساعات كتير منفكرش بشكل صح, يعني متخافيش من تحمل المسئولية او انك تكوني غلطانة وتحاولي تهدي الموقف.

10- ابعدي عن الخلاف بطريقة ذكية:

اكيد طبعا المكان اللي انتي موجودة فيه وشريكك بيتحكموا في تصرفاتك وردود افعالك, يعني لو موجودة في مكان حواليكي ناس كتير وفي مشكلة حصلت اكيد في الوضع ده هيكون من المستحيل انك تتكلمي لان المشكلة هتكبر والتوتر بينكم هيزيد, عشان كده في الحالة دي حاولي تبعدي عن الخلاف بشكل ايجابي وبطريقة ذكية ان تقترحي تعملوا اي حاجة تانية تشربوا حاجة تتعشوا وده هيوصل رسالة للطرف التاني كمان ان ده مش الوقت المناسب للخناق وتأجلوا اي كلام لما تكونوا لوحدكوا.

اعرفي كمان 7 نصايح للتعامل مع الشريك العصبي

نصايح للتعامل مع الشريك العصبي

مقالات متعلقه

12 طريقة عملية للتعامل مع الزوج الغاضب

12 طريقة عملية للتعامل مع الزوج الغاضب

11 علامة واضحة تقولك ان زوجك بيتجاهلك

11 علامة واضحة تقولك ان زوجك بيتجاهلك

ازاي توقفي الاساءة اللفظية من شريكك

ازاي توقفي الاساءة اللفظية من شريكك