تغييرات مودك اللي بتمري بيها في 28 يوم !

ريهام محمود
ريهام محمود
في
صحة
9924

مافيش بنت او ست مش بتمر بتغييرات هرمونية خلال الشهر ومن قبل واثناء وبعد فترة الدورة الشهرية لكن كتير مننا مش بيبقى عارف ايه هي بالظبط التغييرات اللي بتحصل في الجسم خلال الايام دي وايه الاعراض اللي بتحصل وازاي نتعامل معاها عشان تمر بشكل اسهل علينا, وده اللي هنعرفه النهاردة مع بعض هنشوف تغييرات مودك اللي بتمري بيها في 28 يوم وازاي تتعاملي معاها.

تغييرات مودك اللي بتمري بيها في 28 يوم:

تغييرات مودك اللي بتمري بيها في 28 يوم
تغييرات مودك اللي بتمري بيها في 28 يوم

1- من يوم 1 – 2 في الشهر بداية الدورة الشهرية:

في بداية الشهر ومع بداية الدورة الشهرية بتقل نسبة الاستروجين في الجسم وبالتالي بتحسي بحالة تعب واعياء واجهاد في الجسم, وبتحصل تقلصات في الرحم وتشنجات, وده هيكون انسب وقت عشان تمارسي تمارين رياضية خفيفة عشان تقللي من الالم والتقلصات.

2- من يوم 3 – 5 نهاية الدورة الشهرية:

وفي الفترة دي هرمون الاستروجين بيرجع يزيد تاني في الجسم, والطاقة عندك بترتفع وبتحسي بحالة نشاط وتفاؤل وبتبقي مبسوطة, وده انسب وقت تستغليه عشان تنجزي اي حاجة عايزة تعمليها وانتي في قمة نشاطك.

3- من يوم 6 – 9 :

الفترة دي بيكون لسه نسبة هرمون الاستروجين مرتفعة في الجسم, ووشك في الوقت ده بيكون في احسن حالاته وبشرتك بتبقى منورة وخالية من اي عيوب, مع كمان ارتفاع هرمون التستوستيرون فبتكوني في احسن حالاتك, وبتنجزي كل حاجة بسرعة وبسهولة, وده هيكون انسب وقت تاخدي فيه المباردة او الخطوة انك تقومي باي مهمة او تاخدي اي قرار.

4- من يوم 10 – 13:

الفترة دي هرمون الاستروجين بيكون في القمة او في وقت ذروته يعني بيبقى في اعلى نسبة ليه, وده بينعكس عليكي بشكل ايجابي جدا وبيبقى شكلك احلى وسكسي اكتر, وبتبقى نسبة الخصوبة في الفترة دي في اعلى مستوياتها والجسم بيكون مؤهل لاي نشاط, وبتكوني في الفترة دي متفائلة جدا واجتماعية, وده انسب وقت للخروج والانطلاق.

5- يوم 14 في الشهر:

اليوم ده بيبقى اسمه مرحلة الاباضة, وفي الوقت ده بتخرج بيضة واحدة ناضجة او كاملة النمو من المبيض ولو متخصبتش في التوقيت ده بتخرج عادي مع نزول الدورة الشهرية وبتنتهي , وفي الوقت ده بتحسي فيه ان مودك نزل شوية.

6- من يوم 15 – 18:

في الفترة دي هرموناتك بتتغير بشكل مفاجيء وبتحسي بمشاعر مكثفة وملخبطة وبتعب في الجسم.

7- من يوم 19 – 22:

في الفترة دي هرمون الاستروجين بيقل جدا, وهرمون التستوستيرون والبروجسترون بيرتفعوا مع بعض وده بينعكس بشكل سلبي على البشرة وبتفرز كمية دهون زيادة وبتظهر فيها حبوب وبثور وبشرتك بتبقى حساسة, وده انسب وقت عشان تاكلي فيه اكل صحي وتهتمي ببشرتك عشان تستعيدي جمالها.

8- من يوم 23 – 25:

في الوقت ده هرمون البروجسترون بيرتفع وده ممكن يسبب لك شعور بالانتفاخ في المعدة, وخفض الرغبة الجنسية, وبتحسي ان مالكيش نفس تعملي حاجة وهتحسي بكسل وانك بتعملي كل حاجة بالعافية وبشكل بطيء, لكن في نهاية اليومين دول هتحسي بحالة احسن وهتتخلصي من فترة الاحباط بتاع الدورة الشهرية وهتزيد نسبة السيروتونين في الجسم.

9- من يوم 26 – 28:

في الفترة دي حاولي تمارسي تمارين رياضية عشان تخففي من الم الثدي اللي بيحصل قبل نزول الدورة الشهرية, وابعدي عن المشروبات اللي فيها كافيين زي القهوة والنسكافية والشاي, وقللي من اكل السكريات خالص, وحافظي على رطوبة الجسم بشرب مية وسوايل كتير.

دلوقتي استعدي انك تبدأي المرحلة من اول وجديد تاني وكل 28 يوم هتمري بنفس المراحل اللي احنا قولناها كلها.

والفيديو ده بيوضح لنا كل المراحل اللي شرحناها في دقيقتين بس:

شوفي كمان نصائح لتجنب أعراض ما قبل الدورة الشهرية

أعراض ما قبل الدورة الشهرية
أعراض ما قبل الدورة الشهرية

مقالات متعلقه

6 حاجات متعرفيش انها بتحصلك خلال فترة دورتك الشهرية

6 حاجات متعرفيش انها بتحصلك خلال فترة دورتك الشهرية

10 حقائق صادمة عن الدورة الشهرية لازم تعرفيهم

10 حقائق صادمة عن الدورة الشهرية لازم تعرفيهم

ايه اللي بتقوله الدورة الشهرية بتاعتك عن صحتك!

ايه اللي بتقوله الدورة الشهرية بتاعتك عن صحتك!