10 بدائل طبيعية لمعجون الاسنان

عشان نحافظ على اسنانا بيضا ونحافظ على صحة اللثة لازم نمشي على روتين يومي للعناية بيهم ما بين معجون الاسنان او الخيط والتقليل من السكريات اللي ممكن تضر اسنانا وبرغم ان معجون الاسنان مفيد عشان يحمينا من التسوس لكن كمان بيكون فيه مواد ممكن تسبب ضرر للاسنان زي ثاني اكسيد التيتانيوم, وكبريتات لوريل الصوديوم, ومواد التحلية الصناعية, عشان كده النهاردة هنقولكم على بدائل طبيعية لمعجون الاسنان وكلها حاجات بسيطة ومش مكلفة ومتوفرة في كل بيت وفي نفس الوقت هتحافظ على اسنانك بيضا وصحية.

10 بدائل طبيعية لمعجون الاسنان:

1- صودا الخبز “الكربوناتو”:

صودا الخبز او الكربوناتو يعتبر من افضل البدائل لمعجون الاسنان اللي ممكن تستخدميها بانتظام عشان تحافظي على الاسنان لانها بتساعد على تبييضها جدا وكمان بتمنع الاحماض في الفم وبالتالي ده بيقلل من رائحة الفم الكريهة, فعالة جدا في ازالة البلاك, وبتمنع تسوس الاسنان.

• – وطريقة استخدامها زي المعجون بالظبط بلي فرشة السنان واخلطي معلقة صغيرة من صودا الخبز مع شوية مية لحد ما تتكون عندك عجينة وخدي منها على الفرشة وادعكي بيها سنانك بالطريقة العادية, وممكن تضيفي للخليط كمان كام نقطة من زيت النعناع عشان تديكي نفس منعش.

– او ممكن تخلطي معلقة صغيرة من صودا الخبز مع عصير الليمون لحد ما تتكون عجينة افركي بيها السنان.

• – او تخلطي صودا الخبز مع فراولة مهروسة وشوية ملح وتاخدي من الخليط على الفرشة وتدعكي بيه سنانك.

ملحوظة: متاكليش او تشربي حاجة بعد ما تغسلي سنانك بصودا الخبز لمدة 30 دقيقة على الاقل, كمان متستخدميش صودا الخبز يوميا لانها ممكن تضعف مينا الاسنان ممكن تستخدميها من مرة واحدة بس في الاسبوع.

2- اوراق النيم الهندي:

اوراق النيم ومتوفرة عند العطار يعتبر بديل فعال لمعجون الاسنان لان ليها خصائص مضادة للجراثيم ومطهر, وبيتقل البكتيريا اللي بتسبب تسوس الاسنان , وبتحمي من التهاب اللثة وغيرها من امراض اللثة, وبيحافظ على ريحة النفس حلوة لوقت طويل.

هاتي اوراق النيم واطحنيها واستخرجي منها العصير وافركي بيه اسنانك وسيبيه لمدة دقايق وبعدين استخدمي فرشة اسنان ناعمة لتنضيف الاسنان وبعدين اغسليها بمية دافية.

وممكن تجيبي النيم ستيك بيبقى عصاية خشب شبة السواك, اندغي اخر الستيك لحد ما يطرى وادعكي بيه سنانك.

3- الكركم:

الكركم بيحافظ على صحة الفم بشكل عام مش بس الاسنان, لان فيه خصائص مضادة للجراثيم بتساعد على حماية الاسنان من اوجاع الاسنان والتهاب اللثة, وبيمنع تكون البلاك.

• – اخلطي ¼ معلقة صغيرة كركم مطحون مع زيت المسطردة “زيت الخردل” لحد ما تتكون عندك عجينة خدي منها على الفرشة وافركي بيها السنان.

– او اخلطي معلقة صغيرة كركم مع صودا الخبز وزيت جوز الهند لحد ما يتكون عندك عجينة خدي منها على الفرشة وادعكي سنانك.

• – ممكن كمان تضيفي معلقة صغيرة كركم لكوباية مية دافية واستخدميها كغسول للفم ومضمضي بيها لمدة 30 ثانية وبعدين اتخلصي منها واغسلي الفم كويس بالمية الدافية.

4- زيت جوز الهند:

زيت جوز الهند الطبيعي يعتبر بديل لمعجون الاسنان لانه بيحتوي على خصائص مضادة للفطريات ومضادة للجراثيم, وبيساعد على منع تكون البلاك على الاسنان, وبيمنع آلام الاسنان, وامراض اللثة, ورائحة الفم الكريهة, ويعتبر زيت جوز الهند عامل واقي من امراض الاسنان واللثة وبيحسن صحة الفم والاسنان.

خدي معلقة من زيت جوز الهند ومضمضي بيها الفم كويس لمدة 15 دقيقة لحد ما يتحول الزيت ويبقى رغوة ولونه ابيض زي اللبن كده وبعدها اتخلصي منه واشطفي الفم كويس بالمية العادية, بعدها ممكن تفركي الاسنان بفرشة سنان رطبة.

ملحوظة: اعملي المضمضة بزيت جوز الهند الصبح على الريق.

5- الفحم المنشط:

الفحم المنشط يعتبر بديل تاني لمعجون الاسنان, بيقلل من البقع والبلاك على الاسنان, بيحسن درجة الحموضة في الفم وبيزيل السموم وبالتالي ده بيساعد على منع رائحة الفم الكريهة.

هاتي اقراص الفحم من الصيدلية اطحنيها وبلي فرشة السنان وخدي من مسحوق على الفحم افركي بيه سنانك بالطريقة العادية وبعدها اشطفي الفم بالمية العادية.

ملحوظة: لو عاملة تقويم على الاسنان يبقى متستخدميش الفحم.

6- طين البنتونيت “الطين الابيض”:

طين البنتونيت يعتبر من المكونات الطبيعية الممتازة جدا لتنضيف الاسنان لانها غني بالمعادن المفيدة للاسنان, وبيزيل السموم وبيحتوي على خصائص مضادة للجراثيم اللي بتمنع امراض اللثة وبتحافظ على النفس منتعش, كمان بيقوي الاسنان وبيمنع التسوس.

اخلطي معلقة كبيرة طين مع معلقة كبيرة بيكنج بودر ومعاهم 2 معلقة كبيرة او اكتر زيت جوز هند على حسب ما الخليط يبقى قوامه مناسب معاكي وممكن تضيفي لهم كام نقطة من زيت النعناع, حطي الخليط على الفرشة وادعكي بيه سنانك مرة واحدة في اليوم.

ممكن تضيفي للخليط مكونات تانية زي القرنفل المطحون, او القرفة المطحونة, او حتى كمان ممكن تضيفي قشر بيض مطحون.

7- الملح:

ملح الاكل العادي او ملح البحر ممكن يستخدم كبديل لمعجون الاسنان, والملح في الاساس بيدخل في مكونات كتير من معاجين الاسنان اللي بتتباع في السوق, لانه بيساعد على التخلص من البلاك وده بالتالي بيقلل من مشاكل كتير, وبيساعد على تجديد المحتوى المعدني المفقود من الاسنان وبيحافظ عليها صحية.

• – بلي فرشة السنان وخدي من الملح ادعكي بيه سنانك مرة واحدة في اليوم على الاقل.

– ممكن كمان تخلطي مع الملح بنفس الكمية كربوناتو او فحم منشط.

ملحوظة: لما نيجي ندعك السنان بالملح ادعكيها بحركات خفيفة مش بقوة عشان متأذيش مينا الاسنان او تجرحي اللثة.

8- جذور العرق سوس:

جذور العرقسوس وهنلاقيها موجودة عند العطار تعتبر من البدائل الطبيعية لمعجون الاسنان وبتعزز من صحة الفم بشكل عام لانها بتحتوي على خصائص مضادة للجراثيم ومضادة للميكروبات بتمنع تكون البلاك, وبتمنع نمو البكتيريا اللي بتسبب تجويف الاسنان وبتحافظ على الاسنان واللثة قوية وصحية.

استخدمي جذور العرق السوس المجففة والمطحونة ادعكي بيها الاسنان يوميا, ممكن كمان تستخدمي ستيك جذور العرق سوس زي فرشة السنان لدعكها يوميا وتنضيفها.

9- مية الاكسجين:

مية الاكسجين “بيروكسيد الهيدروجين” من الحاجات المعروفة جدا اللي بتساعد على تنضيف وتبييض الاسنان وممكن تستخدميها كبديل لمعجون الاسنان, لان فيها خصائص مضادة للجراثيم وبتساعد على قتل البكتيريا في الفم, بتزيل البقع والبلاك من على الاسنان.

• – اخلطي معلقة صغيرة من صودا الخبز مع شوية من مية الاكسجين لحد ما يتكون عندك معجون وخدي من الخليط على الفرشة وادعكي بيه سنانك وبعدين اشطفيها بمية عادية.

– او اخلطي صودا الخبز مع زيت النعناع وزيت جوز الهند وضيفي عليهم مية الاكسجين لحد ما يبقى عندك القوام مناسب, افركي سنانك بالخليط لمدة دقيقتين وبعدين اغسليها بالمية.

ملحوظة: متستخدميش مية الاكسجين لو عاملة حشوات في الاسنان لانها ممكن تضر الحشو.

10- قشر البرتقان:

قشر البرتقان من الحاجات الفعالة اللي ممكن تستخدميها عشان تحافظي على السنان بيضا وصحية, وكمان بيساعد على ازالة البقع من على الاسنان, وبيمنع تكون البلاك, وكمان مفيد في ازالة بقع التدخين, ولان قشر البرتقان غني بفيتامين C فده بيساعد على منع نمو الكائنات الدقيقة في الفم اللي ممكن تسبب رائحة الفم الكريهة وتسوس الاسنان واي مشاكل تانية ممكن تحصل للاسنان.

• – هاتي قشر البرتقان الطازة وافركي الاسنان واللثة بالجزء الداخلي من القشر واستني خمس دقايق وبعدين اغسلي الفم بالمية العادية.

– او جففي قشر البرتقان واطحنية وخدي من البودر بتاعه على فرشة مبلولة وادعكي بيها السنان بالطريقة العادية.

• – ممكن تضيفي لمسحوق قشر البرتقان اوراق ريحان اهرسيها كويس واخلطيها مع قشر البرتقان البودر هتتكون عندك عجينة حطيها على السنان وسيبيها من 15 – 20 دقيقة وبعدين اغسليها بالمية.

• 
  

  شوفي كمان كيفية تبييض الاسنان طبيعيا