ازاي تعملي مشروبات الطاقة بنفسك في البيت
اكيد كلنا عارفين مشروبات الطاقة اللي انتشرت من فترة بس منعرفش ايه فوايدها او ايه اللي بيحصل لما بنشربها, مشروبات الطاقة في الاساس بتعتمد على الاملاح, وبتعوض نقص بعض المعادن في الجسم زي الصوديوم والبوتاسيوم والكالسيوم والمغنسيوم والفوسفات والكبريتات والكلوريد والبيكربونات والعناصر دي كلها مهمة لانها بتنظم عمل الاعصاب والعضلات وخلايا الجسم بتستخدمهم عشان تحافظ عليها سلمية.
عشان كده احنا لو اتعرضنا مثلا لحالات مرضية زي الاسهال او العرق الشديد او اي مجهود زيادة ممكن يأدي لخسارة كبيرة في العناصر دي وبالتالي هتحسي بالتعب والمرض وضعف في الجسم وفي الحالة دي هتكوني محتاجة مشروبات الطاقة عشان تعوضلك نقص كل العناصر اللي احنا قولنا عليها دي كلها.
وبرغم ان المشروبات دي متوفرة دلوقتي في كل مكان لكن اكيد بيكون فيها مواد حافظة ممكن تضرنا, عشان كده النهاردة هنقولكم ازاي تعملوا مشروبات الطاقة بنفسكم في البيت بمكونات طبيعية وهتبقوا ضامنين انها صحية مية في المية وطازة.
– تعالوا نتعرف الاول على العناصر اللي بتتكون منها المشروبات وفوايدها:
1- المية : العنصر الاساسي والاول هو المية اللي بيساعد على نقل العناصر المفيدة للجسم كله.
2- الملح: الملح غني بالمعادن زي الصوديوم والبوتاسيوم والكالسيوم والمغنسيوم, كمان بيساعد على تجديد احتياطي الصوديوم في الجسم وده بيخلي الجسم يعرق بشكل اقل وبالتالي بيحافظ على الجهد في الجسم وبيخلي الجسم نشيط فترة اطول, وكمان الملح بيلعب دور اساسي في تحقيق التوازن بين هرمونات التوتر والادرينالين وبالتالي بيقلل الشعور بالتعب.
3- الحمضيات: الحمضيات زي الليمون والبرتقان والجريب فروت بتحتوي على نسبة عالية من فيتامين C والبوتاسيوم والكالسيوم, والسكر الطبيعي اللي موجود في الحمضيات بتزود الطاقة اثناء ممارسة التمارين الرياضية او عمل اي مجهود, كمان فيتامين سي بيحافظ على الجهاز المناعي ن طريق تجديد الطاقة المفقودة من الجسم.
4- عسل النحل: العسل يعتبر عنصر تحلية طبيعي وغني بالانزيمات الطبيعية والمعادن اللي بتساعد الجسم على امتصاص كل العناصر اللي محتاجها الجسم وكمان بيحسن طعم المشروب, بالاضافة كمان ان العسل بيحتوي على مضادات الميكروبات وخصائص علاجية بتساعد على علاج الكحة والتهاب الحلق.
5- الزنجبيل: بيحتوي الزنجبيل على مضادات للغثيان وخصائص مضادة للالتهاب ولما بيتفاعل مع الملح في المشروب بيدي تأثير اقوى وبيخليكي تحسي بصحة ونشاط اكتر, ويعتبر كمان مهديء للمعدة, وبيقلل من وجع العضلات.
– طريقة عمل مشروبات الطاقة:
1- مشروب الزنجبيل:
المكونات:
- – كوباية مية.
– من 3 – 5 شرايح زنجبيل طازة.
- – 1 معلقة كبيرة عصير ليمون.
– ¼ معلقة صغيرة ملح البحر.
- – من 1 – 2 معلقة كبيرة عسل نحل.
الطريقة:
سخني كوباية المية, وبعد ما تسخن ضيفي لها شرايح الزنجبيل, سيبيهم يغلوا لمدة خمس دقايق وبعدين صفي المية من الزنجبيل في كوباية, وضيفي لها عصير الليمون والملح وبعدين ضيفي العسل, قلبي المكونات كلها مع بعض لحد ما يدوب الملح والعسل كويس.
وكده يبقى المشروب جاهز تقدري تشربي منه اثناء وبعد التمارين الرياضية او اي مجهود بدني ممكن يسبب لك تعب زيادة او ارهاق.
2- مشروب البرتقان والليمون:
المكونات:
- – 2 كوب مية.
– ¼ كوباية عصير ليمون طازة.
- – ½ كوباية عصير برتقان طازة.
– من 2 – 4 معالق كبيرة عسل نحل.
- – ¼ معلقة صغيرة ملح البحر.
الطريقة:
اخلطي عصير البرتقان والليمون مع بعض وضيفي عليهم العسل وبعدين ضيفي عليهم المية وقلبي الخليط وامزجيهم كويس مع بعض, وبعدين ضيفي الملح وقلبيهم لحد ما الملح والعسل يدوب كويس في الخليط, وكده المشروب يبقى جاهز عندنا.
– نصايح اضافية:
1- حاولوا تستخدموا مية نقية يعني تكون مية مفلترة كويس, او ممكن تغلوها الاول قبل استخدامها في المشروب عشان تضمنوا انها خالية من اي شوائب.
2- استخدموا الملح البحري الغير معالج عشان الملح العادي اللي بنستخدمه في الاكل العناصر الاساسية بتروح منه بسبب طريقة معالجتة, والملح البحري هتلاقوه في السوبر ماركت او عند العطار.
3- ممكن تستبدلوا المية بشاي اعشاب اي نوع.
4- لو حد عنده اي مشاكل في المعدة ممكن يستخدم شاي اعشاب زي النعناع لانه مهديء للجهاز الهضمي وهيخليكي تحسي بصحة احسن وكمان مرطب ومنعش للجسم.
5- في المشروب الافضل استخدام العسل للتحلية بدل السكر, وممكن بدل العسل تضيفوا مانجا مهروسة او شرايح من اي نوع فاكهة تفضلوها لتحسين الطعم.
6- ممكن تستخدموا مية الزنجبيل اللي عملناها في طريقة المشروب الاولاني في مشروب البرتقان والليمون يعني بعد ما تغلوا الزنجبيل في المية ضيفوا عليها باقي اضافات المشروب التاني, لان الزنجبيل من الحاجات المفيدة جدا اللي بتساعد على التقليل من آلام ووجع العضلات.
25 طريقة تديكي طاقة ونشاط حالا
