6 نصايح عشان تطلعي بلوك رائع في البنطلون السكيني لو جسمك مليان او كيرفي

دايما في المجلات بنشوف الموديلز الرشيقة اللي جسمها نحيف ولكن الجسم المليان او الكيرفي مش واخد نصيب كبير في ده وبرغم انه مؤخرا بدأ الاهتمام شوية بالمقاس الكبير والاستعانة بموديلز لل Plus size لكن لسه مش واخد حقه في عالم الموضة بس ده مش معناه ان صاحبة الجسم المليان متقدرش تلبس على الموضة او تلبس اللي هي عايزاه او تقيد نفسها بلبس معين لا تقدر تلبس على الموضة ولكن المهم تعرف تختار اللبس بطريقة صح عشان تطلع بلوك حلو وده اللي هنتعرف عليه النهاردة مع بعض من خلال موضوعنا هنقولك ازاي تلبسي البنطلون السكيني لو جسمك مليان ويطلع بشكل حلو جدا واستايلش وتطلعي جميلة بغض النظر عن مقاس الملابس بتاعك.

ازاي تلبسي البنطلون السكيني لو جسمك مليان:

1- اختاري المقاس الصح:

اسوأ حاجة ممكن تعمليها هو اختيار مقاس غلط للبس ممكن بنات كتير تفكر وتقول اجيب مقاس لبس اصغر عشان يبين جسمي ارفع لكن بالعكس ده هيظهر ديفوهات الجسم اكتر وخصوصا البنطلون الجينز متحاوليش تشتري مقاس اصغر لانها هتبقى ضاغطة الجسم اوي وهتظهر منطقة الجناب والبطن اكتر, عشان كده الافضل انك تختاري المقاس المناسب ليكي.

2- جربي الMiddle And High Waisted جينز:

خلال الفترة اللي فاتت كان الجينز ال Low-Waisted او الوسط المنخفض هو المتصدر عالم الموضة سواء للبنطلونات او الجيبات لكن من حسن الحظ وخصوصا لصاحبات الجسم الكيرفي ان الموضة دي انتهت ورجع تاني الMiddle And High Waisted جينز او الوسط المتوسط والعالي وده يعتبر انسب موديل للجسم المليان لانه بيخفي ديفوهات الجسم وبيظهره بشكل احلى.

3- لون الجينز:

اللون بيلعب دور مهم جدا في الحجم عشان كده اللون الازرق الغامق الكلاسيكي الصريح من غير الوان تانية معاه ده هيكون انسب لون ليكي لو جسمك مليان لانه هيبين حجم الجسم اصغر وانحف, واللون ده يعتبر من الالوان الاساسية للجينز اللي المفروض تكون موجودة في دولابنا لانه تقريبا ممكن تنسقيه مع اي لبس عندك وفي نفس الوقت بيكون انيق جدا في اللبس.

4- ابتكري في تنسيق طبقات الملابس:

اختاري دايما القمصان او البلوفرات او الجاكيت اللي يكون مغطي لحد نص الوركين بس لان ده هيعمل توازن في شكل الجسم, ومتخافيش من استخدام الاكسسوارات وتقولي انها ممكن تزود الحجم لا استخدمي اكسسوارات مناسبة لانها هتبقى ملفتة وتبعد النظر عن اي عيوب تانية.

جربي البسي الكارديجان, اوالكاب, اوالكيمونو كلها من القطع اللي هتديكي لوك استايلش جدا وهتخليكي تطلعي بشكل احلى.

5- ابرزي منطقة الوسط:

الجسم اللي بيكون على شكل ساعة رملية من اكتر الاجسام الجذابة والانثوية لانه بيكون متناسق ما بين الجزء اللي فوق واللي تحت من الجسم, وعشان تحققي ده لازم تبرزي او تحددي منطقة الوسط والحزام هيكون انسب حل عشان تظهريه بشكل احلى, ولو انتي من محبات اللبس الرياضي او الكاجوال اوي ممكن تربطي القميص على وسطك عشان تحدديه.

6- اختيار الشوز المناسب:

الكعب الودجز او البوت الضخم او High boot من الحاجات اللي ممكن تخلي اللوك يطلع مش حلو وتبينك اضخم, عشان كده انسب اختيار ليكي هي الاحذية الناعمة الاليجانت بألوان طبيعية ومحايدة, او يكون لون الشوز نفس لون الجينز بتاعك, واتجنبي الاحذية الضخمة اللي فيها شرايط او تفاصيل كتير.

افضل 10 افكار لموضة الـ Plus size في شتاء 2017