10 حيل لستايل الشعر هتخليكي تباني اصغر !
الشعر ليه تأثير كبير جدا على شكل الوش ممكن يبين الوش اصغر او اكبر وده بيعتمد على حاجات كتير زي قصة الشعر واللون وغيرها من الحاجات اللي هنعرفها النهاردة من خلال موضوعنا هنتعرف على حيل لستايل الشعر هتخليكي تباني اصغر.
10 حيل لستايل الشعر هتخليكي تباني اصغر:
1- قصة الشعر:
قصة الشعر من الحاجات اللي ممكن تأثر على شكلنا وتبينا بشكل اصغر او اكبر حسب اختيارنا للقصة, ومن القصات اللي بتبين شكل الوش اصغر هي تدريج الشعر طبقات دي من اكتر القصات اللي ممكن تبينك بسن اصغر.
2- لون الشعر:
اللون بيلعب دور مهم جدا في الشكل, ومن الالوان اللي بتدي لوك اصغر هي الالوان الفاتحة, لكن لازم نختار اللون المناسب لينا بعناية جدا, والافضل انك متفتحيش شعرك اكتر من درجتين او تلاتة عن لون شعرك الاصلي, وكمان لازم تحطي في الاعتبار لما تختاري اللون يكون مناسب للون بشرتك وعينيكي.
وللي مش بيحبوا يفتحوا شعرهم او يغيروا لونه كله ممكن تكتفي بس بخصلات فاتحة يعني تدي تاتش لون للشعر هيغيرلك اللوك وهيديكي حياة وهينور وشك.
3- طول الشعر:
طول الشعر كمان مهم جدا, دايما الشعر القصير مرتبط اكتر بالانطلاق والشباب يعني حاولي تختاري قصة شعر قصيرة عشان تباني بسن اصغر, لكن في نفس الوقت ميكونش قصير اوي, ومع التقدم في السن ممكن الشعر يخف شوية في الحالة دي هيكون انسب طول للشعر هو اللي من الدقن لحد نص الرقبة ده هيكون الطول المناسب.
4- حجم الشعر:
الشعر الاملس او الستريت بيدي سن اكبر عشان كده دايما اختاري تسريحات الشعر اللي تدي Volume او حجم اكبر لكن بردو منبالغش في الحجم يعني منعملش حجم كبير زيادة عن اللزوم عشان ممكن يعمل نتيجة عكسية ويبينك اكبر لكن الافضل انك تديه حجم بشكل طبيعي وناعم وممكن تحققي ده بقصة الشعر المدرجة.
5- القوصة:
القوصة من التفاصيل اللي ممكن تبين شكل الوش اصغر خصوصا انها ممكن تداري عيوب في الوش زي تجاعيد الجبهة وفي نفس الوقت هتبرز جمال العيون, لكن ناخد بالنا منخليش القوصة سميكة اوي عشان ميبقاش الشكل اوفر يعني اختاري قوصة مناسبة لشكل وشك عشان تديكي نتيجة حلوة.. ممكن تشوفي من هنا ازاي تختاري القوصة المناسبة لشكل وشك.
6- فرق الشعر:
فرق الشعر ممكن تكون تفصيلة بسيطة جدا وتفتكري انها مش مؤثرة لكن هي ليها تأثير كبير على الشكل, يعني مثلا فرق الشعر اللي بيكون من النص ومتحدد اوي بيدي شكل اكبر ولوك حاد للوش عشان كده الافضل انك مثلا تخلي الفرق جنب اكتر من جنب او تخليه على جنب واحد بس هيبين عينيكي بشكل اكبر واحلى, او ترجعيه على ورا, او تعملي فرق زجزاج مش متساوي هيديكي شكل انعم واصغر للوش.
7- التسريحة اليومية للشعر:
حاولي في اختيار تسريحات الشعر اليومية تبعدي عن لم الشعر اوي عشان هيديكي سن اكبر من سنك وهيكبرك, حتى لو حابة تلمي الشعر ديل حصان مثلا حاولي تخلي خصل شعر من الجناب حوالين الوش مش ملمومة, ومتجعديش الشعر اكتر من اللازم, ولو هتخلي شعرك سايب مش هتلميه ممكن تعمليه كيرلي خفيف عشان يبينه بشكل طبيعي, اختاري دايما قصات الشعر الفوضوية او اللي بيكون فيها طول الشعر مختلف مش كله طول واحد.
8- التسريحة المسائية للشعر:
لو خارجة بالليل او عندك مناسبة حاولي تبعدي عن لم الشعر بطريقة منظمة اوي زيادة عن اللزوم, او تعملي الشعر ريترو ستايل زي موضة الستينات, حاولي دايما تخلي اللوك طبيعي وممكن تضيفي تفاصيل تديكي لوك اصغر زي الضفاير مثلا هتديكي لوك حلو وفي نفس الوقت هتبينك اصغر.
– نصايح اضافية:
- – الاستخدام الزيادة عن اللزوم لمنتجات تصفيف الشعر هيبينك اكبر في السن, وده لاي وقت سواء لتسريحات الصبح او بالليل متبالغيش في استخدام منتجات التصفيف.
– لو هتستخدمي اكسسوارات على الشعر اختاري اكسسوارات جودتها كويسة يعني ابعدي عن الاكسسوار البلاستيك او التوك الخاصة بالاطفال او الباندانات القطيفة.
- – لو هتعملي شعرك كيرلي استخدمي بكر او اي حاجة خاصة بتجعيد الشعر كبيرة عشان تتجنبي تجعيدات الشعر الصغيرة اوي, تجعيد الشعر صغير اوي يفضل انه يكون لسن تحت من 25 – 30 سنة لانه بيدي لوك حيوي اوي, لكن لو اكبر يبقى الافضل يكون التجعيد على واسع شوية.
– طبعا اهم حاجة عشان اي لوك من اللي احنا قولناه ده يطلع حلو انه يكون الشعر صحي يعني لازم نهتم بيه كويس جدا سواء باكل صحي, او وصفات طبيعية, او منتجات العناية بالشعر.
16 قصة من موضة الشعر القصير هيخلوكي تقصي شعرك حالا
