25 فكرة مبتكرة لتخزين الحاجات الصغيرة الخاصة بيكي
كلنا بيبقى عندنا الحاجات الصغيرة زي الاكسسوارات او بنس الشعر او الميك اب اللي بنكون مش عارفين نحتفظ بيها ازاي بطريقة منظمة من غير ما نقعد ندور عليها في كل مرة نيجي نستخدمها, والنهاردة هنساعد بنات حوا في المهمة دي وهنقولكم على افكار لتخزين الحاجات الصغيرة الخاصة بيكي بطريقة منظمة تقدري توصلي لها بسهولة وفي نفس الوقت من غير ما تاخد مساحة كبيرة.
افكار لتخزين الحاجات الصغيرة الخاصة بيكي:
كل بيت مصري اصيل اكيد موجود فيه النيش :) اللي تقريبا نص الحاجات اللي فيه مش بنستخدمها ممكن بقى نستغل الحاجات المركونة دي بطريقة تانية وتستخدمي فنجانين الشاي القديمة والاطباق بتاعتها تحطي فيها الاكسسوارات زي الحلقان والخواتم او السلاسل او الاساور او توك الشعر.
الشماعة من الافكار العملية والبسيطة جدا اللي ممكن تستخدميها ثبتيها بمسمار صغير على الحيطة وعلقي عليها السلاسل والعقاد الطويلة وممكن تركبي فيها خطافات او عُلاقات صغيرة تحطي فيهم الحلقان, يعني تقدري تستغلي كل جزء في الشماعة تعلقي عليه حاجة.
لو عندك تابلوهات قديمة من اللي كنا بنعملها زمان بالكنافا دي ممكن نستغلها ونعلق عليها الحلقان, او ممكن احنا نجيب اطار خشب ونشد عليه قماش مخرم او دانتيل ونعلقه على الحيطة ونعلق عليه الحلقان, يعني الفكرة بسيطة جدا وسهلة التنفيذ.
ممكن نعمل ماسورة اضافية في باب الدولاب من جوه ونحط عليها عُلاقات صغيرة ونعلق عليها الاكسسوارات.
صواني الفاكهة والحلويات اللي بتكون كذا دور, او صينية كب كيك قديمة ممكن تستغليهم لتخزين الاكسسوارات وبنس الشعر وغيرها من الحاجات الصغيرة اللي عندك.
لو عندك اطارات صور قديمة حطي فيها ورقة واعملي لها خرمين ودخلي فيهم نضارة الشمس, او علقيها على الحيطة وحطي مسامير صغيرة جنب بعض وعلقي عليها الاكسسوارات.
الماسورة زي اللي بنستخدمها في المطبخ والحمام نعلق عليها الفوط ممكن نعمل زيهم في الاوضة ونعلق عليهم الاكسسوارات او الاحزمة او نضارات الشمس او السكارفات والطرح.
ممكن نستخدم لوح مغناطيسي ونحطه في اطار تابلوه قديم نحط عليه كل الميك اب بتاعنا ولو عندك ماجات مش بتستخدميها او منظم الاقلام اللي بيتحط على المكتب ثبتيهم في اللوح من تحت بالغرا وحطي فيهم الفرش, وهتلاقوا في المكتبات او المحلات اللي بتبيع الحاجات الخاصة بالاطفال لوح مغناطيسي بيتعلق على الحيطة ممكن تستخدموه.
الاطباق اللي بتبقى ادوار فوق بعض بنستخدمها للتقديم لو عندك منها مش بتستخدميها ممكن تستغليها وتخزني فيها ادوات المكياج والفرش والمانيكير.
لوح مكعبات التلج ممكن تستغليه وتحطي فيه علب المكياج الصغيرة.
منظم الورق اللي بيتحط على المكتب ممكن تستخدميه تخزني فيه الميك اب والمانيكير, وهو بيكون كذا دور فوق بعض يعني هيشيل حاجات كتير وفي نفس الوقت مش هياخد مساحة.
القطن او اعواد القطن او السفنجات اللي بنستخدمها للمكياج ممكن تحطيهم في برطمانات و تعملي لهم حامل في الحمام وتثبتيهم عليه.
ممكن تستغلي قصاري الزرع الصغيرة الملونة تخزني فيها القطن او السفنجات او اعواد القطن وفي نفس الوقت هتبقى ديكور وهتدي شكل حلو.
او ممكن تشتري ادوات التخزين اللي بتتباع في المحلات مخصوص للحاجات دي بتبقى نازلة على شكل حيوانات واشكال كتير تقدري تستغليها كوحدات تخزين وديكور في نفس الوقت بردو.
مجلد الورق ممكن نستخدمه نخزن فيه المكوى اوالبيبي ليس والسيشوار.
المنظم العادي اللي بيتباع في محلات الادوات المنزلية ممكن تستغليه تعلقيه على باب الاوضة وتخزني فيه فرش الشعر والمشط والمكوى والسيشوار والسبراي او اي حاجة خاصة للشعر بتستخدميها عشان يبقوا كلهم في مكان واحد مع بعض.
ممكن تثبتي في باب الدولاب من جوه عُلاقات او خطافات تعلقي عليها مكوة الشعر.
الاقراص الممغنطة ممكن نستخدمها لتخزين بنس الشعر ودبابيس الطرحة , والقصافة ومبرد الضوافر.
استخدمي شريط مغناطيسي علقيه على الحيطة وحطي عليه البنس والدبابيس او القصافة اي يعني اي حاجة صغيرة معدن ممكن تتعلق عليه.
استخدمي علبة التيك تاك الفاضية حطي فيها بنس الشعر.
ممكن تستغلي علبة نضارة الشمس تخزني فيها فرش المكياج, وبتبقى مفيدة جدا لو مسافرة ومحتاجة حاجة تحطي فيها الفرش بتاعتك.
الكوبايات والكاسات اللي مش بنستخدمها استغليها وخزني فيها فرش المكياج.
ممكن انتي تنفذي فكرة بسيطة لتخزين الفرش استخدمي المنديل الخيزران هنلاقيه في محلات الادوات المنزلية جيبيه وهاتي اي شريط عندك ومرري الشريط بين الفتحات بتاعته وتبثي فيه الفرش واقفليه واربطيه بشريط من بره.
ماسورة طويلة وحبل ومشابك غسيل كل اللي محتاجاه للفكرة دي, ثبتي الماسورة على الحيطة في اي مكان في الاوضة واربطي فيها الحبل وعلقي عليه البرانيط او الكابات بالمشبك, او ممكن تعلقي على الماسورة شماعات وتحطي عليها هدوم او السكارفات والطرح بتاعتك.
او اعملي خطافات وعُلاقات صغيرة على الحيطة بردو علقي عليها الكابات او البرانيط او الشنط بتاعتك.