ازاي تختاري القوصة المناسبة لشكل وشك !
القوصة من التفاصيل الصغيرة اللي ممكن تغير شكل الوش خالص وتحدده وتظهره اكتر وتدينا لوك مختلف بس المهم اننا نختارها صح لان لو اختارتي قوصة مش لايقة على وشك هيطلع الشكل في الاخر مش حلو حتى لو انتي قصة الشعر بتاعتك حلوة عشان كده مهم جدا اننا نختار القوصة المناسبة لشكل وشنا عشان يطلع بشكل احلى, والنهاردة هنقول لكل بنات حوا ازاي تختاري القوصة المناسبة لشكل وشك.
القوصة المناسبة لشكل وشك:
1- القوصة المناسبة للوش المدور:
الوش المدور انسب قوصة ليه هتكون هي القصة الجانبية اللي نازلة شوية على الخد عشان بالطريقة دي هناخد شوية من تدويرة الوش وهتداري الخدود المليانة وهتبين وشك بيضاوي اكتر.
وكمان القوصة القصيرة اللي بيكون في مساحة ما بين الحواجب والقوصة لانها هتاخد من تدويرة الوش شوية وهتديه طول والقوصة دي تنفع كمان مع الوش البيضاوي, والوش على شكل قلب.
2- القوصة المناسبة للوش البيضاوي:
الوش البيضاوي تقريبا اكتر وش يعتبر متناسق لان مساحات الوش كلها متناسقة وقد بعض, والقوصة الرش اللي نازلة على القورة كلها ومغطية الحواجب بتطلع حلوة جدا على الوش البيضاوي.
القوصة المتوسطة كمان بتليق على الوش البيضاوي جدا اللي هي بتكون اطول من ستايل القوصة القصيرة شوية ومبينة الحواجب.
3- القوصة المناسبة للوش المربع والمستطيل:
الوش المربع او المستطيل بيكون عريض من عند منطقة الخدين والفك اكتر, وانسب قوصة هتكون اللي واخدة شكل حرف A وبتكون نهايتها حادة ومدببة شوية ناحية الخدين عشان تاخد من عرض الخدين والفك.
القوصة الطبقات اللي بتكون طولها مش متساوي يعني قصير في طويل كمان من الستايلات المناسبة اوي للوش المربع والمستطيل كمان هنلاحظ بردو ان القوصة واخدة شكل حرف A.
4- القوصة المناسبة للوش على شكل قلب:
الوش على شكل قلب بيكون فيه منطقة القورة او الجبين اعرض من منطقة الدقن, انسب قوصة للوش ده اللي بتكون واخدة شكل هلال اللي بتكون من النص قصيرة شوية واطول من الجناب.
لو انتي مش مهتمة اوي تعملي توازن للوش بالقوصة وعايزة تعملي حاجة مختلفة ممكن تجربي القوصة القصيرة الجانبية بتكون جاية من نص الجبين قصيرة بأطراف اطول شوية حادة.
5- القوصة المناسبة للوش الطويل:
الوش الطويل بتكون فيه مساحة الجبين عالية فهيكون محتاج انه يداري من الجزء ده او يبان اصغر عشان كده هتكون انسب قوصة ليها الجانبية اللي نازلة مايلة بزاوية عند الزاوية الخارجية للعين.
كمان القوصة الرش على الجبين ويكون الخط بتاعها نازل حوالين الحواجب الستايل ده مناسب للوش الطويل عشان هتقلل من طول الوش وهتداري مساحة الجبين.