7 اسرار لبشرة صافية خالية من العيوب من النساء الآسيويات

ريهام محمود

في

35603

البشرة الصافية الخالية من اي عيوب اكيد حلم كل بنت, وكلنا بنشوف قد ايه بشرة البنات الآسيويات بتبقى جميلة وصافية وخالية من اي عيوب ودايما تلاقيهم بيبانوا اصغر من سنهم بكتير بسبب انه بشرتهم صحية اوي, واحنا النهاردة جايبين لكل بنات حوا 7 اسرار لبشرة صافية خالية من العيوب بتستخدمهم النساء الآسيويات عشان يحافظوا بيهم على جمال بشرتهم وتفضل شابة وصحية.

7 اسرار لبشرة صافية خالية من العيوب:

1- استخدام طريقة 4-2-4 لغسل البشرة:

النساء الآسيويات بيستخدموا طريقة 4-2-4 لغسل البشرة والطريقة دي عبارة عن غسل الوش بهيدروفيليك اويل “Hydrophilic oil” اللي هو منظف بشرة زيتي لمدة 4 دقايق بيتم تدليك الوش بالمنظف وممكن تستخدموا منظف زيتي من ماك او سيفورا, وبعدها تدليك البشرة بكريم تنقية وتنضيف لمدة دقيقتين وممكن تستخدموا كريم منظف من نيتروجينا او بيوديرما, وبعدها اربع دقايق غسل الوش بالمية العادية, وبعدين تجفيف الوش وبعد عملية التنضيف دي مش هتحتاجوا حتى مرطب للبشرة بس بالنسبة للبشرة الجافة اوي لو محتاجة ترطيب ممكن تستخدم مرطب مناسب.

بالنسبة للمنظف الزيتي “Hydrophilic oil” ممكن نعمله في البيت حسب نوع كل بشرة.

– للبشرة الدهنية: هاتي ازازة فاضية وامليها 1/3 زيت خروع او زيت البندق, 2/3 زيت زيتون او زيت عباد الشمس او اي نوع زيت تاني ممكن زيت جوز الهند.

– للبشرة المختلطة: ¼ زيت خروع او زيت بندق, ¾ زيت زيتون او زيت عباد الشمس او اي نوع زيت تاني.

– للبشرة الجافة: ممكن تستخدمي زيت زيتون بس او تضيفي له كمية صغيرة جدا من زيت الخروع.

او ممكن تستخدمي زيت جوز الهند لوحده. او تخلطي كميات متساوية من زيت الزيتون وزيت جوز الهند وده ينفع مع كل انواع البشرة تقريبا.

2- استخدام اسفنجة كونجك لتنضيف الوش:

اسفنجة كونجك ده نوع اسفنج بيبقى مصنوع من جذور نبات اسمه كونجك وده مفيد للبشرة وفي منها بيبقى داخل فيها شاي اخضر او فحم منشط او طين البشرة يعني في منها انواع كتير, وطريقة استخدامها بتتنقع شوية في مية دافية عشان تطرى وبعدين تبدأي تدلكي بيها بشرتك كلها في حركات دائرية من الجبين للدقن.

3- اعملي روتين اسبوعي لتنضيف البشرة:

حاولي كل اسبوع تعملي روتين تنضيف لبشرتك سواء بتستخدمي منتجات معينة للتنضيف والتقشير, او بتستخدمي ماسكات طبيعية, او تقشير وحمام بخار, لازم تنتظمي على الروتين الاسبوعي ده عشان تحافظي على البشرة.

ممكن تشوفوا من هنا طريقة تقشير البشرة في البيت بمكونات طبيعية كانك في ال SPA

4- احمي بشرتك من الشمس طول السنة:

اغلب النساء الآسيويات هتلاقيهم طول السنة بيلبسوا نضارات الشمس او بيمسكوا شماسي تحميهم من الشمس حتى لو الجو مش مشمس اوي وده عشان يحافظوا على بشرتهم طول السنة, وبيستخدموا طول السنة الكريم الواقي من الشمس سواء في الصيف او الشتا عشان يحموا البشرة من اشعة الشمس اللي ممكن تضرها وتسبب لها تجاعيد وشيخوخة مبكرة.

شوفوا هنا افضل انواع الصن بلوك لكل نوع بشرة

5- استخدام مية الارز عشان تحافظي على بشرتك جميلة ومشرقة:

من آلاف السنين والنساء الآسيويات بيستخدموا مية الارز لجمال بشرتهم وشعرهم, غسل البشرة كل يوم بانتظام بمية الارز بيخليها ناعمة وبيحسن لونها وبيفتحها, وبيغسلوا بيها شعرهم بعد الشامبو كشطفة اخيرة بعد غسل الشعر.

شوفوا من هنا وصفات مذهلة بمية الارز لجمال البشرة والشعر

6- اضافة النعناع والشاي الاخضر لمستحضرات العناية بالبشرة:

النعناع والشاي الاخضر تقريبا من الحاجات اللي بيضيفوها لكل منتجات العناية بالبشرة وللماسكات الطبيعية اللي بيستخدموها لانهم بيخلوا البشرة صحية وبيحافظوا عليها شباب, حتى لو هتشتري منتجات العناية بالبشرة ومش هتعملي ماسكات طبيعية ممكن تحاولي تشتري المنتجات اللي داخل في مكوناتها الشاي الاخضر والنعناع خصوصا الكريمات المضادة للتجاعيد والشيخوخة.

شوفوا هنا 14 وصفة جمالية مدهشة باستخدام الشاي الاخضر

7- حولي منتجات البشرة لرغوة قبل ما تحطيها على بشرتك:

معظم النساء الآسيويات بيتجنبوا فرك منتجات العناية بالبشرة بشكل مباشر على بشرتهم, لكن بيحطوا المنتج على ايديهم الاول ويحولوه لرغوة وبعدين يحطوا الرغوة دي على البشرة ويدلكوها في حركات خفيفة بتساعد على تدفق الدم للجلد وبالتالي ده بيساعد على تجديد البشرة, وهما احيانا بيستخدموا اكياس شبك وبيكون فيها قطع اسفنج معمولة مخصوص عشان يتحط فيها المنتج سواء منظف او غسول عشان يتحول لرغوة بشكل اسرع ويفركوه بايديهم لحد ما يتحول لرغوة وبعدين يحطوها على البشرة, بس طبعا مش لازم استخدام الكيس ده احنا نحط المنتج على ايدينا على طول مافيش مشكلة.