افضل واسوأ وضعيات النوم وتأثيرهم على صحتك

ريهام محمود
ريهام محمود
في
صحة
12583

من فينا مش بيبقى نفسها تنام كويس ونوم عميق ! لكن للاسف كتير مننا مش بيعرف يوصل لده وده بيأثر علينا نفسيا وصحيا, ودراسات كتير اثبتت ان قلة النوم مرتبطة بكتير من المشاكل الصحية من اول السمنة لحد الاصابة بأمراض القلب والخرف ومرض السكر وفقدان الشعر وعلامات الشيخوخة المبكرة.

وفي حاجات كتير جدا هي اللي ممكن تكون السبب اننا منامش كويس زي بيئة الاوضة اللي انتي نايمة فيها, السرير مريح ولا مش مريح, مستوى الاجهاد او التعب اللي ممكن تكوني بذلتيه خلال اليوم, حتى النظام الغذائي بتاعك ممكن يأثر على نومك, لكن في حاجة يمكن في كتير مننا مش بياخد باله منها وبتأثر على نومنا وهي وضعية النوم تعتبر من الحاجات اللي بتساهم بشكل رئيسي في التأثير علينا نفسيا وصحيا عشان كده النهاردة هنقولكم على افضل واسوأ وضعيات النوم وتأثيرها على صحتنا بشكل عام.

افضل واسوأ وضعيات النوم وتأثيرهم على صحتك:

1- النوم على الضهر والذراعين جنبك:

  • – الوضع: النوم على الضهر وتكون الايدين جنبك في شكل مستقيم.

– الاثار الصحية الايجابية: يعتبر النوم على الضهر هو افضل وضعية نوم لصحة العمود الفقري لان الضهر بيكون مستقيم وبيقلل الضغط على الفقرات وبالتالي بيمنع آلام الرقبة والضهر, وكمان بيساعد على الحفاظ على شكل الصدر وبيبقوا في وضع مرتاح وانتي نايمة, وبيقلل من تجاعيد الوش.

  • – الاثار الصحية السلبية: النوم على الضهر ممكن يسبب الشخير اثناء النوم ومشكلة في التنفس.

– الحل لمشاكل النوم على الضهر: عشان نتفادى السلبيات اللي ممكن تحصل بسبب النوم على الضهر ممكن نجمع ما بين وضعية النوم على الضهر والنوم على الجنب ده هيساعدك انك تنامي كويس جدا وتصحي تاني يوم فايقة ونشيطة.

وممكن كمان تجربي تنامي على ضهرك من غير مخدة عشان تحافظي على رقبتك في وضع محايد وميحصلش فيها اي الم, وكمان متستخدميش مخدات كتير تحت راسك لان ده ممكن يسبب مشكلة في التنفس, الافضل انك تستخدمي مخدة كبيرة تحطيها ورا الركبتين عشان تدعمي منحنى الضهر ويبقى جسمك مرتاح وانتي نايمة.

افضل واسوأ وضعيات النوم وتأثيرهم على صحتك 1
افضل واسوأ وضعيات النوم وتأثيرهم على صحتك 1

2- النوم على الضهر والذراعين لفوق:

– الوضع: وضع النوم ده بتكوني نايمة على ضهرك بس ايدك لفوق جنب وشك على المخدة.

  • – الاثار الصحية الايجابية: الوضعية دي تعتبر الافضل لصحة الرقبة والعمود الفقري, بيساعد على تقليل نوع معين من الحمض ممكن يسبب مشاكل في المعدة لان الراس بتكون مرتفعة والمعدة مرتاحة تحت المريء وده بيمنع المواد اللي اتهضمت ترجع تاني للمريء واللي ممكن تسبب مشاكل صحية في المريء, كمان بيمنع تجاعيد الوش.
  • – الاثار الصحية السلبية: نفس مشكلة الوضعية اللي فاتت انه ممكن يسبب الشخير, ده غير ان رفع الايد لفوق ممكن يسبب الم بسبب الضغط على اعصاب الكتفين لفترة طويلة.
  • – الحل: عشان نتفاى الاثار السلبية ممكن ننام من غير مخدة عشان نخلي الرقبة والعمود الفقري في وضع محايد ومرتاحين, وده معناه ان مافيش اي ضغط اضافي على المناطق دي وانتي نايمة.
  • افضل واسوأ وضعيات النوم وتأثيرهم على صحتك 2
    افضل واسوأ وضعيات النوم وتأثيرهم على صحتك 2

3- النوم على الجنب وايدك جنبك:

  • – الوضع: وضعية النوم دي بتكون النوم على الجنب سواء اليمين او الشمال وايدك جنبك في خط مستقيم.

– الاثار الصحية الايجابية: الوضعية دي بردو تعتبر مفضلة لصحة العمود الفقري, ومش بس بتمنع آلام الضهر والرقبة كمان بتقلل من مشاكل التنفس اثناء النوم, كمان النوم على الجنب بيقلل مشكلة الشخير, وتعتبر الوضعية دي الافضل للستات الحوامل.

  • – الاثار الصحية السلبية: من سلبيات الوضعية دي ان منطقة الوركين مش بتبقى واخدة الراحة الكافية وده ممكن يسبب آلام ومشاكل في المنطقة دي في المستقبل, وكمان ممكن تسبب شيخوخة الجلد وتجاعيد الوجه وترهل الثديين لانهم بيبقوا ناحية الجنب ومش واخدين وضعية مرتاحة, وممكن كمان تسبب آلام الرقبة.

– الحل: ولان الوضعية دي ممكن تسبب آلام الرقبة ممكن تستخدمي مخدة سميكة عشان تدعمي الرقبة, واستخدمي دايما مخدة ساتان لمنع تجاعيد الوش, وكمان حطي مخدة ما بين الفخدين عشان تدعمي منطقة الوركين وتمنعي اي آلم ممكن يحصل فيهم.

افضل واسوأ وضعيات النوم وتأثيرهم على صحتك 3
افضل واسوأ وضعيات النوم وتأثيرهم على صحتك 3

4- النوم على الجنب والايد مفرودة لبره:

  • – الوضع: الوضعية دي بيكون النوم فيها على اي جنب, مع انحناء بسيط في الساقين, والايد ممدودة, والراس مايلة شوية.

– الاثار الصحية الايجابية: الوضعية دي بتمنع آلام الضهر والرقبة, بيمنع الشخير اثناء النوم, وبتخفف حرقة المعدة, كمان بتسمح للجسم من تنضيف المخ وبتخليه يشتغل بشكل احسن وبيقلل من خطر الاصابة باضطرابات المخ زي الزهايمر ومرض باركنسون, كمان اللي بيناموا بالوضعية دي هم اقل ناس ممكن يقلقلوا او يصحوا في نص الليل وده بيرجع ان الجسم بيكون مرتاح اثناء النوم.

  • – الاثار الصحية السلبية: من سلبيات الوضعية دي انها ممكن تقيد تدفق الدم بشكل سليم وبتضغط على الاعصاب وده ممكن يسبب الم في الكتفين والذراعين, والضغط على الاعصاب ممكن يعمل ضغط على الاعضاء الداخلية في الجسم زي المعدة والكبدة والرئتين وده ممكن يأدي للشعور بالضيق, كمان النوم على الجنب ممكن يسبب ترهل الثديين والشيخوخة المبكرة للجلد وتجاعيد الوش.

– الحل: عشان نتفادى المشاكل نامي على مخدة ساتان عشان تقللي من مشكلة تجاعيد الوش, ممكن تحطي مخدة ما بين الركبتين, وعشان تقللي من آلام الذراعين ممكن تبدلي لوضعية النوم على الجنب وايدك جنبك.

افضل واسوأ وضعيات النوم وتأثيرهم على صحتك 4
افضل واسوأ وضعيات النوم وتأثيرهم على صحتك 4

5- النوم على اي جنب:

  • – الوضع: النوم على اي جنب اليمين او الشمال.

– الاثار الصحية الايجابية: وضعية النوم على الجنب مفيدة للي بيعانوا من آلام الضهر والرقبة, او مشكلة الشخير ومشاكل التنفس, لانها بتمنع من مشكلة الشخير, وبتحافظ على الممرات الهوائية مفتوحة وبالتالي بتمنع مشاكل التنفس اثناء النوم, وبتقلل من آلام الضهر والعمود الفقري, والوضعية دي مفيدة للستات الحوامل لانها بتساعد على تحسين الدورة الدموية للجنين واثبتت الدراسات ان النوم على الجنب الشمال اثناء فترة الحمل بتزود من تدفق الدم بشكل سليم وبتوفر مستويات الاوكسجين المناسبة ليكي وللجنين.

  • – الاثار الصحية السلبية: النوم على الجنب اليمين ممكن يسبب حرقة المعدة, والنوم على الجنب الشمال ممكن يعمل ضغط على اعضاء الجسم الداخلية زي المعدة والرئتين والكبد, فلو بتعاني من اي مشاكل في الكبد او الرئة او المعدة نامي على الجنب اليمين, كمان ممكن تسبب شيخوخة الجلد المبكرة وتجاعيد البشرة وترهل الثديين.

– الحل: لو انتي بتفضلي النوم على الجنب ممكن تستخدمي مخدة تحطيها ما بين الركبتين, ونامي على مخدة ساتان لتقليل مشكلة تجاعيد البشرة, كمان اتجنبي انك تخلي ضغط راسك او جسمك كله على ذراع واحدة بس, حاولي تحافظي على الايد جنبك عشان تريحيهم.

افضل واسوأ وضعيات النوم وتأثيرهم على صحتك 5
افضل واسوأ وضعيات النوم وتأثيرهم على صحتك 5

6- وضع الجنين:

  • – الوضع: الوضعية دي بيكون الجسم واخد شكل كورة والركبتين عند منطقة الصدر والدقن مايلة لتحت.

– الاثار الصحية الايجابية: الوضعية دي بتقلل من مشكلة الشخير بشكل كبير,ومفيد للستات الحوامل, والنوم على الجنب الشمال بشكل خاص في الوضعية دي بيقلل مشاكل المعدة والمريء.

  • – الاثار الصحية السلبية: وبالرغم ان الوضع ده ممكن يكون مريح لناس كتير الا انه ممكن يسبب ضغط كبير على الضهر والرقبة وبالتالي ممكن يأدي لمشاكل وآلام الضهر والرقبة, وممكن يأدي لالم العصب الوركي في المستقبل, وآلام المفاصل, ومشاكل في التنفس, والتجاعيد, وترهل الثديين.

– الحل: عشان نتفادى المشاكل دي ممكن تستخدمي مخدة ثابتة لدعم الراس والرقبة وتكون المخدة عالية بشكل مناسب عشان تحافظ على الراس في وضع محايد عشان يخفف من الضغط على الرقبة وبالتالي ده هيمنع آلام الرقبة وآلام العضلات, والافضل انك تبدلي ما بين الجنبين اليمين والشمال اثناء فترة النوم يعني ميبقاش التركيز على جنب واحد بس.

كمان النوم على الجنب الشمال ممكن يسبب ضغط على الاجهزة الحيوية في الجسم زي الكبد والرئتين والمعدة, عشان كده الافضل في الحالة دي انك تنامي على الجنب اليمين.

افضل واسوأ وضعيات النوم وتأثيرهم على صحتك 6
افضل واسوأ وضعيات النوم وتأثيرهم على صحتك 6

7- النوم على البطن:

  • – الوضع: النوم على البطن والوش بيكون ناحية الجنب والذراعين حاضنين المخدة.

– الاثار الصحية الايجابية: النوم على البطن بيساعد على الحفاظ على الجزء العلوي من المسالك الهوائية مفتوح وبالتالي ده بيقلل من مشكلة الشخير, وبيساعد على تحسين الهضم ولكن بحد معين لان النوم على البطن زيادة عن اللزوم او لفترات طويلة ممكن يجيب نتيجة عكسية ويأثر بشكل سلبي على الجهاز الهضمي.

  • – الاثار الصحية السلبية: النوم على البطن يعتبر اسوأ وضعية نوم لانه بيسبب مشاكل العمود الفقري لان الوضعية دي مش بتدعم المنحنى الطبيعي للعمود الفقري وبتعمل ضغط عليه وعلى المفاصل والعضلات واللي بيسبب فيهم آلم, كمان وضعية الرقبة للجنب بترهقها وبتخلي التنفس والدورة الدموية متشتغلش بشكل سليم, يعني اللي بيعانوا من ألام الضهر والرقبة يبعدوا خالص عن الوضعية دي في النوم.

كمان الاشخاص اللي بيعانوا من السمنة المفرطة او زيادة في الوزن وضعية النوم دي بتحط ضغط زيادة على الاعضاء الداخلية للجسم زي الرئتين, وكمان النوم على البطن ممكن يسبب التهاب وتصلب وآلام الرقبة اثناء فترة النهار وهتبقي مش مرتاحة خلال اليوم.

واثبتت الدراسات ان الاشخاص اللي بيعانوا من مرض الصرع وبيناموا على بطنهم اكتر عرضة للوفاة بشكل مش متوقع اثناء وضعية النوم دي.

  • – الحل: لو انتي بتفضلي وضعية النوم دي ممكن تحاولي تجربي اي وضعية نوم على الجنب وتحطي مخدة ما بين البطن والسرير وده هيريحك اكتر وهيمنعك انك تتقلبي وتنامي على بطنك.
  • افضل واسوأ وضعيات النوم وتأثيرهم على صحتك 7
    افضل واسوأ وضعيات النوم وتأثيرهم على صحتك 7

اكتشفي معانا ازاي تعرفي شخصيتك من طريقة نومك !

اعرفي معانا طريقة نومك بتقول ايه عن شخصيتك
اعرفي معانا طريقة نومك بتقول ايه عن شخصيتك

مقالات متعلقه

حيل علمية لحل مشاكل النوم

حيل علمية لحل مشاكل النوم

6 وضعيات نوم مفيدة كتير من الناس ميعرفهاش

6 وضعيات نوم مفيدة كتير من الناس ميعرفهاش

اكتر 3 اوضاع نوم آمنة للحوامل..ووضع النوم اللي المفروض تتجنبيه

اكتر 3 اوضاع نوم آمنة للحوامل..ووضع النوم اللي المفروض تتجنبيه