12 قطعة متستغنيش عنها في الشتا عشان تطلعي بلوك احلى

ريهام محمود

في

13983

فصل الشتا متنوع جدا في ستايلاته ونقدر نضيف للوك بتاعنا قطع كتير تخليه يطلع بشكل احلى وده اللي هنعرفه النهاردة من خلال موضوعنا هنقول لكل بنات حوا 12 قطعة تضيفيهم لدولابك في الشتا هتطلعك بلوك احلى واشيك واكتر اناقة.

12 قطعة تضيفيهم لدولابك في الشتا :

1- البلوفر التريكو الواسع “Baggy sweater”:

الباجي سويتر او البلوفر التريكو الواسع من القطع اللي لازم تكون موجودة في كل دولاب في فصل الشتا لانه مريح اوي في اللبس ومناسب لكل الاجسام تقريبا, اختاري البلوفرات اللي فيها تفاصيل, وبرقبة سميكة, واكمام طويلة, واكتاف كبيرة, والنوع ده من البلوفرات يمشي تقريبا مع كل ستايلات وموديلات البنطلونات المختلفة واكيد مع بوت طويل لحد الركبة بيطلع شيك جدا.

2- شرابات طويلة لحد الركبة:

الشرابات الطويلة لحد الركبة من الاكسسوارات اللي لازم تكون في دولابنا لانها مريحة جدا في اللبس وبتدفي وفي نفس الوقت بتدي لوك حلو اوي لما تتلبس مع البوت الطويل ويكون ظاهر جزء صغير منها من البوت, وممكن تلبسيها مع البنطلون او جيبة قصيرة في الحالتين بتطلع شيك اوي.

3- السكارف الكبير “Oversized scarf”:

السكارف تقريبا من القطع الاساسية لفصل الشتا ومن الستايلات الحلوة اوي للسكارف هو الاوفر سايز او النوع الكبير بيدي شكل حلو وتدفئة في نفس الوقت وتقدري تنوعي في لبسه وتلبسيه باكتر من طريقة, وممكن تلبسيه مع اي ستايل لبس عندك وخصوصا لو لبستيه مع البالطو, او البلوفر اللي رقبته واسعة, او كارديجان, او جاكيت جلد.

4- سنود سكارف “Snood scarf”:

القطعة دي من القطع المميزة جدا المناسبة للايام البرد اوي لانه الميزة فيه انه ممكن تلبسيه بطرق مختلفة حوالين الرقبة, وممكن كمان تلبسيه على الراس, ممكن تلفيه على الرقبة بلفات واسعة, ممكن تحطيه على الكتف, ممكن تربطيه عقدة, وفي منه الستايل القصير اللي بيبقى حوالين الرقبة بس, والنوع ده من السكارف يمشي مع اي ستايل لبس.

5- القبعات التريكو:

اكيد فصل الشتا مش ممكن يعدي من غير القبعة التريكو تعتبر من القطع اللي تقريبا منقدرش نستغنى عنها لانها بتدفي جدا في الايام البرد اوي, ونازل منها اشكال وستايلات كتير جدا تقدري تختاري منها اللي يناسبك وتفضليه اكتر, وكمان النوع ده ممكن تلبسيه على اي ستايل لبس.

6- البالطو الصوف الملون:

البالطو الصوف مش بس بيبقى شكله انيق في اللبس لكن كمان من القطع اللي بتدفي جدا, وموضة 2017 في البالطو هي الالوان الزاهية اللي هتخليكي تطلعي بلوك مشرق جدا.

7- جاكيت جلد الغنم:

احنا اتكلمنا قبل كده عن الشيرلينج جاكيت اللي بيكون من بره جلد ومن جوه مصنوع من جلد الغنم او الغزال, والنوع ده تريندي جدا لموسم الشتا ده, مريح في اللبس وبيدفي وفي نفس الوقت بيديكي لوك انيق اوي خصوصا لو نسقتيه مع بوت طويل وبنطلون ضيق سواء جينز او جلد او ليجينج.

8- البونشو:

البونشو كمان من القطع المهمة لدولاب الشتا, هو قطعة كلاسيكة انيقة وممكن تلبسيه على اي لبس عندك, ومن الوانه التريندي اوي اللي تعتبر اشيك الوان ليه هي البيج, الاسود, الازرق الغامق, البني الفاتح, درجات الاحمر, ونازل منه ستايلات بلياقة فرو بتديه اناقة اكتر, وبيبقى مناسب اوي مع البوت الطويل.

9- بوت طويل لحد الركبة:

البوت الطويل لحد الركبة من الموديلات الموضة اوي السنة دي, وممكن تتلبس مع اي ستايل لبس سواء البالطو الطويل, او الشيرلينج جاكيت, او الفساتين, او الجينز الضيق, اوالبلوفرات رقبة السلحفة “Turtleneck sweaters” يعني تقريبا بيمشي مع كل حاجة.

10- البوت الملون بألوان زاهية:

عادة بيبقى غالب في فصل الشتا الوان الشوزات المحايدة زي الاسود والرمادي والبني لكن الموضة واخدة اتجاه مختلف السنة دي ونازل البوت الملون بألوان زاهية موضة جدا الشتا ده.

11- الفساتين التريكو:

الفساتين التريكو من القطع التريندي اوي لفصل الشتا بتبقى شيك جدا في اللبس خصوصا لو لبستي تحتها ستايل الشراب الطويل مع الانكل بوت, او تلبسي معاها البوت الطويل فوق الركبة.

12- البلوفر رقبة السلحفة “Turtleneck sweaters”:

البلوفرات رقبة السلحفة او اللياقة المدورة تقريبا من الستايلات اللي مش بتبطل ومعانا كل موسم شتا, لانها مريحة جدا وهتديكي تدفئة للرقبة من البرد, وممكن تلبسيها على اشكال الجيبات او البنطلونات المختلفة.