8 عادات لازم تتخلي عنهم عشان تحمي نفسك من الامراض في الايام البرد
في ايام البرد كتير بنتعرض للانفلونزا او لنزلات البرد لكن احنا ممكن نحمي نفسنا من الامراض ونحافظ على صحتنا بكل بساطة وكمان نقدر نخرج في البرد عادي واحنا مطمنين على نفسنا وده اللي هنعرفه النهاردة مع بعض من خلال 9 عادات لو تجنبتيها هتحافظي على صحتك وتحمي نفسك.
8 عادات لو تجنبتيها هتحافظي على صحتك:
1- استخدام قطرة الانف قبل الخروج:
الجو البارد بيخلي الممرات الانفيه تبقى اضيق وبالتالي في كتير بيستخدموا قطرة الانف عشان تساعدهم اكتر على التنفس لكن ده مش صح لان في الحالة دي الاغشية المخاطية مش هتقدر تدافع عنك ضد الكائنات الدقيقة او تدفئة الهوا البارد اللي بيدخل لك اثناء عملية الاستنشاق, عشان كده اتجنبي انك تستخدمي قطرة الانف لكن بس حاولي تنضفي الانف بالمنديل العادي قبل الخروج.
2- التنفس عن طريق الفم وانتي بره البيت:
لما تتنفسي عن طريق الفم ده هيخليكي مش هتقدري تعملي تدفئة للهوا اللي داخلك او تديه رطوبة وده ممكن يزود نسبة الاصابة بالذبحة الصدرية, عشان كده اتجنبي التنفس عن طريق الفم واتنفسي عن طريق الانف ببطء وبعمق.
3- تغطية الفم والانف بالسكارف:
كتير مننا في الايام البرد اوي بنعمل الحركة دي اننا بنغطي منطقة الانف والفم بالسكارف, لكن ده مش صح لان الزفير اللي بيطلع مننا لما يحتك بالمواد المصنوع منها السكارف او البالطو اللي احنا لابسينه هيكون ابرد من انك تكوني مش حطاه, وده ممكن يسبب ذبحة صدرية او التهاب الشعب الهوائية وتهيج الجلد, واذا انتي محتاجة فعلا تحمي وشك من الهوا البارد ممكن تغطيه عند منطقة القورة او الدقن يعني اي منطقة في الوش لكن ماعدا منطقة الانف.
4- بتروحي البيت جري او بسرعة:
في الايام البرد لما بنكون بره البيت تلاقينا ماشيين بسرعة او بنجري حتى عايزين نوصل للبيت باسرع وقت عشان نبقى في الدفا, لكن الافضل اننا ممكن في طريقنا نقعد في كافية او اي مكان تدفي شوية وتاخدي نفسك وبعدين تكملي طريقك للبيت, لان السرعة زيادة عن اللزوم ممكن يكون ليها تأثير سلبي على الصحة وانتي سقعانة او حاسة بالبرد.
5- لبس ملابس وشوز ضيق:
الملابس الضيقة او الشوز الضيق هتخليكي تحسي بالبرد اكتر في الجو البارد, لكن الصح انك تختاري طبقات الملابس اللي فيها وسع او مرونة شوية لان الهوا اللي بين الطبقات هيساعد انه يحافظ على جسمك دافي.
6- شرب حاجة سخنة قبل الخروج بنص ساعة:
الشاي السخن او اي مشروب سخن بيزود من الدورة الدموية وبيحسن آليات الدفاع عن الجسم ولكن كمان في المقابل ليه عيب وهو انه بيسبب تمدد الاوعية الدموية وده معناه انه لما تخرجي بره في الجو البرد هتفقدي كتير من حرارة الجسم بسرعة جدا, فلو انتي محتاجة تشربي حاجة قبل ما تخرجي الافضل انك تشربي مية بس او اي مشروب دافي بس لكن ميكونش سخن اوي.
7- الجوع في الجو البارد وانتي بره البيت:
الجو البارد طبيعي بيخلينا نحس بالجوع لان الجسم بيكون محتاج طاقة عشان ينتج حرارة تدفينا والا هتسقعي وتحسي بالبرد بسرعة عشان كده احنا محتاجين اننا اول ما نحس بالجوع ناكل على طول عشان ناخد الطاقة اللي لزمانا, ممكن في الحالة دي تاكلي وجبة خفيفة مع اي مشروب سخن في اي مكان او تكوني واخدة معاكي في الشنطة وجبة خفيفة.
8- بتحطي كريم البشرة قبل ما تخرجي على طول:
لما بتحطي اي كريمات على بشرتك في اول 30 او 40 دقيقة بعد ما بتحطيه بيخلي المية تتبخر من بشرتك, وفي الجو البارد ده ممكن يسبب تبريد وضرر في الجلد, عشان كده الافضل انك تحطي اي كريم بشرة او لوشن قبل ما تخرجي من البيت ب30 دقيقة على الاقل, او تتجنبي الكريمات اللي اساس مكوناتها معتمد على المية.
وصفات علاجات طبيعية لما تحسي انك تعبانة
