10 افكار مكياج سهلة لمكياجك كل يوم مياخدوش منك وقت
لكل البنات اللي بيحبوا المكياج ومش بيقدروا يستغنوا عنه يوميا لكن بتيجي عليهم ايام بيبقوا مكسلين يحطوا مكياج او بيحسوا بملل من الروتين اليومي للمكياج وكمان للبنات اللي بيحبوا اللوك الطبيعي البسيط في المكياج, النهاردة جايبين لكم 10 افكار مكياج مختلفة تناسب كل الاذواق عشان تقدري تختاري منها اللي يناسبك لمكياجك اليومي والميزة في الافكار انها سهلة ومتاخدش منك وقت.
10 افكار مكياج سهلة:
1- مكياج خوخي:
اعتمدت في اللوك ده على اللون الخوخي بستايل بسيط جدا ومش محتاج اي مجهود, ابدأي الاول بطبقة كريم BB او كريم اساس سائل, وبعدين حطي الكونسيلر تحت العين عشان تداري الهالات السودا, وحطي ايشادو خوخي على الجفن كله والروج كمان باللون الخوخي الفاتح, واخر حاجة حطي البلاشر, ولو حابة تعملي اضافة بسيطة ممكن ترسمي عينيكي بالكحل وكده يبقى اللوك خلص من غير ما ياخد منك اي وقت ولا مجهود.
2- مكياج بينك:
في اللوك ده استخدمت اللون البينك وركزت على الشفايف عشان تظهرها, استخدمت الوان فاتحة وطبيعية لمكياج العين, ابدأي بكريم BB, وبعدين حطي الكونسيلر تحت العين, واستخدمت للخدود برونزر على عضمتين الخد, واخر حاجة احمر شفايف باللون البينك.
3- مكياج طبيعي:
لو انتي مش من محبات المكياج اوي او مش بتعرفي تحطي مكياج باحتراف اللوك ده هيبقى مناسب ليكي جدا لانه طبيعي اوي وبيظهرك كانك مش حاطة مكياج, حطي الBB او كريم اساس سائل, والكونسيلر, وبرونزر على عضمتين الخد, والوان فاتحة لمكياج العين, وبينك فاتح لاحمر الشفايف.
4- كونتور سهل:
في اللوك ده عملت كونتور سهل باستخدام الستيك كونتور اللي بيكون ناحيتين ناحية لون غامق وناحية هايلايت, حطي الاول كريم الاساس, وبعدين حددي الوش باللون الغامق والهايلايت بالطريقة المعتادة للكونتور عشان تحددي ملامح الوش وادمجية على البشرة, وحطي البلاشر والروج باللون المفضل ليكي, وممكن ترسمي العين رسمة بسيطة بالايلاينر مع الوان ايشادو فاتحة.
5- مكياج نيود “مكياج كيم كاردشيان”:
المكياج النيود من انسب اللوك لمكياجك اليومي لانه بسيط وطبيعي جدا وفي نفس الوقت بيدي لوك حلو ودايما بتعتمد عليه النجمة كيم كاردشيان لمكياجها, استخدمت فيه ايشادو باللون البني الفاتح, وبلاشر بينك نيود, واحمر شفايف بينك او ممكن تستخدمي ليب جلوس بينك.
6- كات ايز Cat Eyes:
التركيز في اللوك ده على العيون برسمة Cat Eyes, استخدمت الوان فاتحة للايشادو والبلاشر باللون البينك الفاتح, وليب جلوس بينك فاتح او احمر شفايف بينك.
7- مكياج عيون نيود مضيء:
لو عايزة تركزي على مكياج العيون بس يبقى اللوك ده مناسب ليكي اوي, استخدمت فيه ايشادو مضيء باللون البني الفاتح, حطي الاول برايمر على جفون العين عشان تثبتي المكياج, حطي اللون الشامبين عند الزاوية الداخلية للعين, وعلى الزاية الخارجية حطي اللون البينك المضيء, واستخدمي افتح لون ايشادو حطيه على عضمة الحاجب عشان تديها اضاءة وتظهريها وادمجيها كويس, اخر خطوة الماسكارا وقلم العيون الابيض عشان تدي وسع للعين.
8- مكياج اودري هيبورن:
لوك المكياج ده مستوحى من الممثلة الامريكية اودري هيبورن كانت دايما بتعتمد عليه في مكياجها, رسمة الحاجب بتبقى تقيلة وتخينة, واستخدمت لون ايشادو فاتح على الجفن كله وعلى الزاوية الخارجية للعين رسمتها بايشادو بلون اغمق تحت الجزء بتاع عضمة الحاجب بس, واعتمدت على رسمة ايلاينر كات ايز, واستخدمت رموش صناعية, وروج باللون البينك, وبلاشر بينك فاتح.
9- مكياج الربيع:
اكيد فصل الربيع خلص لكن مكياجه مستمر معانا, اللوك ده طبيعي اوي, حطي الاول كريم BB او كريم اساس سائل, وبعدين الكونسيلر تحت العيون, وماسكارا, وبلاشر وروج او ليب جلوس بلون بينك فاتح.
10- مكياج برونزي:
حطي كريم الاساس, وبعدين الكونسيلر, والبرونزر على عضمتين الخد عشان تظهريهم, وطبقي الايشادو باللون البني البرونزي المضيء, حطي بلاشر واحمر شفايف باللون البينك او الخوخي.
شوفي لوك مكياج وشعر رائعين مناسبين لفصل الشتا
