اكتر 10 حاجات بتعمليها ممكن يتسببوا في تلف شعرك !

ريهام محمود

في

8701

كل بنات حوا في حالة بحث دايما عن طرق العناية بالشعر ووصفات للاهتمام بيه ونصايح ازاي يبقى شعرنا صحي وبيلمع ومش مقصف, لكن ساعات كتير احنا اللي بنتسبب في تلف شعرنا من غير ما ناخد بالنا ممكن نكون في عادات بنعملها يوميا بشكل مش مقصود تكون هي السبب ان شعرنا مش صحي زي تسريحة شعر معينة او اننا نسرحة بطريقة مش صحيحة وغيرها من الحاجات اللي ممكن تبوظ شعرنا عشان كده النهاردة هنعرف مع بعض ايه هي اسباب تلف الشعر وايه العادات اللي ممكن نكون بنعملها بشكل يومي واحنا مش واخدين بالنا او مش عارفين انها ممكن تضر شعرنا.

اسباب تلف الشعر:

1- غسل الشعر يوميا:

من الاخطاء اللي ممكن يكون في كتير مننا بيعملها هو غسل الشعر كل يوم العادة دي من الحاجات اللي بتضر فروة الراس ومع مرور الوقت بتضعفه لانه بيفقد الرطوبة والمرونة, عشان كده لو انتي متعودة تغسلي شعرك كل يوم يبقى لازم توقفي العادة دي وتغسليه من مرة او واحدة او مرتين بس في الاسبوع, بالطريقة دي هتدي فرصة للزيوت الطبيعية اللي بتفرزها فروة الراس انها تغذي الشعر وتحمي فروة الراس وهتحافظي على شعرك صحي.

2- استخدام الحرارة زيادة عن اللزوم:

من اكتر اعداء الشعر هي الحرارة لو استخدميها زيادة عن اللزوم هتأدي في النهاية لتلف الشعر, يعني حاولي تستخدمي الحرارة بشكل معتدل وعلى فترات مش على طول لان الاستخدام المستمر للحرارة سواء السيشوار او البيبي ليس هيخلي الشعر ضعيف وسهل التكسر وهيبطيء نموه, عشان كده لما تيجي تستخدمي الحرارة حاولي تكون معتدلة مش عالية اوي وتحمي شعرك بقدر الامكان من الحرارة عشان تقللي من الاضرار.

3- مش بتستخدمي حامي من الحرارة:

زي ما قولنا في النقطة اللي فاتت ان الحرارة مضرة ولازم تستخدميها باعتدال وتحمي شعرك, عشان كده ضروري استخدام حامي من الحرارة لانه بيحمي الشعر من اضرار الحرارة وفي نفس الوقت بيدي الشعر لمعة وبيحافظ على رطوبة الشعر ومش بيخليها تتبخر بسبب الحرارة, ولما تيجي تختاري حامي الحرارة اتأكدي انه بيحتوي في مكوناتة على زيوت طبيعية زي زيت الزيتون وزيت جوز الهند وزيت الارجان.

4- بتسرحي الشعر وهو مبلول:

الشعر وهو مبلول بيكون اضعف من وهو ناشف عشان كده من اسوأ الحاجات اللي ممكن تعمليها لشعرك هو انك تسرحيه وهو مبلول لان ده ممكن يسبب في تكسر الشعر, وعشان تتجنبي ده سرحي شعرك قبل ما تغسليه عشان تفكي اي تشابك منه واثناء الغسيل استخدمي مشط خشب باسنان واسعة ومش اي نوع تاني وسرحيه بخفة جدا وانتي بتطبقي بلسم الشعر عشان توزعيه على الشعر.

5- بتستخدمي منتجات غلط للشعر:

من الغلطات اللي بنقع فيها اننا نجرب حاجة على تجربة حد تاني يعني مش معنى مثلا ان نوع شامبو او بلسم حلو على شعر صاحبتك يبقى ممكن يمشي معاكي لانه بيختلف من شعر للتاني فلازم تختاري المناسب ليكي بناء على تجربتك مش تجربة اي حد تاني, او اننا نستخدم نوع شامبو وبلسم لفترات طويلة من غير ما نغيره لان مع الوقت هيقل تأثيره على الشعر ومش هيبقى ليه اي فايدة, وكمان من الحاجات اللي بتتلف الشعر استخدام الشامبو اللي بيحتوي على الكبريتات والمادة دي مش اي شعر بيتحملها عشان كده حاولي لما تيجي تشتري الشامبو انك تبصي في المكونات وتجيبي الانواع الخالية من الكبريتات.

6- بتستخدمي منتجات كتير:

ممكن تكوني بتستخدمي منتجات مناسبة لكن المشكلة بتكون في انك بتستخدمي انواع كتير زيادة عن اللزوم يعني بتستخدمي الشامبو والبلسم والماسكات ومثبتات الشعر والسيروم وكل منتجات الشعر المتاحة مش هيكون ليها التأثير الايجابي اللي انتي متوقعاه, عشان كده الافضل انك تختاري الحاجات الاساسية اللي فعلا شعرك محتاجها, وكمان في المقابل ممكن تكوني مش بتستخدمي المنتجات الكافية اللي شعرك محتاجها يعني لو شعرك تالف او مقصف يبقى محتاج عناية بمنتجات مناسبة ليه مش مجرد بس استخدام الشامبو لان ده مش هيكون كافي, يعني في النهاية متبالغيش ولا تقللي اوي في استخدام المنتجات استخدمي على قد احتياج شعرك بس.

7- مش بتقصي شعرك:

كتير من البنات بيحبوا الشعر الطويل وبالتالي بيتجاهلوا قص الشعر لفترة طويلة عشان شعرهم يطول لكن للاسف ده مش صح لان قص الشعر كل فترة مفيد وبيمنع انقسام اطراف الشعر لان الاطراف هي اكتر جزء للشعر بيتعرض للتلف عشان كده بنكون محتاجين نقصها كل فترة عشان نجدد الشعر, والمعدل المعقول انك تقصي شعرك كل 8 – 10 اسابيع لكن لو لاحظتي ان حصل انقسام في اطراف الشعر قبل المدة دي يبقى قصيه كل 6 – 8 اسابيع عشان يطول بشكل صحي.

8- الاستخدام الكتير للعلاجات الكيميائية:

كل البنات بيحبوا التغيير والتجديد وكل فترة ممكن نغير لون الشعر عشان نجدد اللوك لكن الصبغة من الحاجات اللي بتتسبب في تلف الشعر وبتخليه جاف وبتقصفه وممكن كمان تكون سبب في زيادة الشيب او الشعر الابيض, وده كله بيحصل لان المنتجات الكيميائية اللي احنا بنستخدمها على شعرنا بتحتوي على بيروكسيد الهيدروجين اللي بتتلف صبغة الشعر او لونه الاساسي, عشان كده الافضل اننا نستخدم الصبغات بشكل معتدل على فترات متباعدة ولما تصبغيه استخدمي دايما الماسكات الطبيعية او منتجات العناية بالشعر عشان تحافظي عليه من التلف.

9- تسريحات الشعر طول الوقت:

كلنا دايما بنحب ننوع في التسريحات عشان نجدد ونخرج من الملل ما بين تسريحة ديل الحصان سواء المنتظم او الفوضوي او الضفيرة او غيرها من التسريحات المختلفة, لكن التسريحات على طول بشكل مستمر ممكن تضر الشعر مثلا تضفير الشعر بشكل مستمر ممكن يقصفه ويضعفه ويضر بمسام الشعر, تسريحة ديل الحصان ممكن تسبب تكسر الشعر واكيد مش معناها متعمليهمش خالص لكن اعمليهم على فترات متبقاش هي التسريحات الاساسية بشكل يومي, عشان كده حاولي بشكل مستمر تغيري ومتعمليش تسريحة واحدة لفترة طويلة واختاري التسريحات البسيطة اللي تخلي شعرك يتنفس.

10- اسلوب حياتك بشكل عام:

اسلوب حياتك بشكل عام ممكن يأثر على شعرك يعني لو انتي بتعاني من اجهاد او ضغط, او ماشية على دايت او بتاخدي ادوية, كل الحاجات دي بتأثر على الشعر بشكل سلبي وبتسبب تلفه وتساقطه, كمان نوعية الاكل ليها تأثير على الشعر لو مش بتاكلي اكل صحي ده هيأثر على صحة شعرك ضروري انك تدخلي البروتين في نظامك الغذائي لان الشعر بيحتاجه عشان يساعده على النمو وحاولي بشكل عام تاكلي اكل صحي وتعيشي حياة صحية لان ده هينعكس بشكل ايجابي على صحة شعرك وهتخليه اقوى وبينمو بشكل اسرع ومش بس الشعر كمان البشرة والصحة بشكل عام.