افضل 10 نصايح لمنع عدوى الاظافر والحفاظ عليها صحية

بقلمريهام محمود فيأظافر visibility3394

ضوافرنا مش دايما بتاخد اهتمام كبير مننا لكن الضوافر بتحتاج عناية زيها زي الشعر والبشرة والاسنان لازم لها روتين للعناية بيها والحفاظ عليها صحية وقوية, وكمان من المشاكل اللي بتقابل كتير مننا هي مشكلة فطريات الضوافر اللي بتسبب تغيير لونها وبتخليها صفرا وبتبقى سميكة وسهلة التكسر, وعشان نمنع كل المشاكل اللي ممكن تحصل للضوافر هنقولكم على اهم نصايح لمنع عدوى الاظافر والحفاظ عليها صحية وايه الروتين اللي لازم تتبعيه عشان تمنعي اي مشاكل ممكن تحصل لضوافرك .

– 10 نصايح لمنع عدوى الاظافر والحفاظ عليها صحية:

1- حافظي على الضوافر نضيفة وجافة:

ضروري اننا نحافظ على ضوافرنا نضيفة بشكل مستمر عن طريق روتين يومي اننا ننقع الضوافر في مية دافية وصابون لمدة 10 دقايق ونفركها باستخدام فرشة اسنان ناعمة عشان ننضفها من بره ومن جوه كويس ونزيل منها اي اتربه عشان نمنع اي عدوى ممكن تحصل بسبب تراكم الجراثيم والاتربة عليها.

تاني خطوة بعد التنضيف لازم نجفف الضوافر كويس جدا وبين الصوابع لان الرطوبة اللي بين الصوابع هي اللي ممكن تكون بيئة لنمو الفطريات والجراثيم فيها عشان كده لازم نجففها كويس من اي مية عشان نمنع اي عدوى فطرية ممكن تحصل.

مع الغسيل اليومي لازم يكون في روتين اسبوعي بانك تعملي تقشير للقدم والكعبين مرة واحدة في الاسبوع عشان نتخلص من الجلد الميت ونحافظ عليها ناعمة.

والجلد الميت اللي حوالين الضوافر ممكن تفركيها بالحجر الخفاف مرة واحدة في الاسبوع.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

2- قص الضوافر بشكل صحيح:

عشان نمنع عدوى الاظافر ضروري اننا نقص الضوافر بشكل صح, اولا لازم نستخدم قصافة نضيفة ونستخدم مبرد خشب لبرد الضوافر بدل المعدن.

متقصيش جوانب الضوافر لانها ممكن تسبب الم, ونمو الجلد بجوانب الضوافر, وفي نفس الوقت منقصش الضوافر قريب اوي من الجلد, لان الضوافر لما تبقى قصيرة اوي وتيجي تلبسي الشوز هيضغط على الضوافر بشكل زيادة ويسبب لك الم.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

3- البسي الشوز المناسب:

لبس الشوز بالمقاس المناسب من الحاجات المهمة جدا لمنع الفطريات وعدوى الاظافر, اتجنبي انك تلبسي مقاس ضيق اوي او واسع اوي, ودايما اختاري الموديلات اللي بيكون فيها وسع من عند الصوابع وتكون مرتاحة فيها يعني متكونش زانقة الصوابع وتسبب لها تشنج, يعني لو عندك اي شوز ضيق من عند الصوابع اتخلصي منه على طول قبل ما يسبب لك مشاكل.

بالاضافة للمقاس المناسب كمان خامة الشوز لازم نختار الخامات اللي تخلي الرجل تتنفس وتخليها دايما جافة وتقلل الاصابة بالفطريات, البسي شوز جلد او قماش وهو الاختيار الافضل والانسب.

متلبسيش الشوز ويكون عرقان او في رطوبة لان ده هيزود خطر الاصابة بالعدوى الفطرية للاظافر, دايما حاولي يكون عندك اكتر من شوز تبدلي بينهم.

كمان الشرابات نختار الخامات اللي بتمتص العرق زي المصنوعة من القطن, ونتأكد من تغيير الشراب بشكل مستمر.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

4- احمي ضوافرك في الاماكن العامة:

الاماكن العامة زي الجيم وحمام السباحة وغيرها من الاماكن بتكون فيها فطريات بنسبة اكبر عشان كده مهم اننا نحمي الضوافر والقدمين, يعني اتجنبي انك تمشي حافية في الجيم او غرفة تغيير الملابس, ولو ممنوع لبس الشوز او الشراب فيها ممكن تلبسي احذية الدش عشان تحمي الضوافر والقدمين.

حتى كمان في صالون التجميل لما نروح نعمل باديكير لازم نتأكد اننا نروح مكان مضمون وبينضف وبيعقم ادواته كويس عشان متحصلش اي عدوى فطرية للضوافرنا.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

5- متقصيش الجلد اللي حوالين الضوافر:

الجلد اللي حوالين الضوافر يعتبر حماية ليها ضد البكتيريا اللي ممكن تدخل لها وبالتالي لازم متقصيش الجلد لان كده هتعرضي الضوافر للعدوى والفطريات.

كمان لو قصيتي الجلد اللي حوالين الضوافر هتخليه معرض انه ينفصل ويطلع من مكانه, حتى دفع الجلد لورا بقوة ممكن يسبب مشاكل.

ولو بتعاني من الم او مشاكل في الجلد اللي حوالين الضوافر ممكن تنقعي ايدك في مية دافية لمدة 10 دقايق وبعدين نشفيها وادهنيها بزيت زيتون او زيت جوز هند ودلكيها لمدة 5 دقايق وبعدين ادفعي الجلد لورا بالراحة بالاداة الخشبية الخاصة بالاظافر “orangewood”.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

وممكن تشتري الزيت الخاص بالاظافر من الصيدلية.

6- رطبي الضوافر والجلد اللي حواليها:

الترطيب مهم جدا عشان نحافظ على صحة الضوافر, حافظي على ترطيب الضوافر بشكل مستمر لان ده بيساعد على نموها بشكل اقوى اكتر وصحي, وبيحمي الضوافر من التكسر والتشقق اللي ممكن يحصل بسبب قلة الترطيب.

اتأكدي انك بترطبي الضوافر كويس ادهني القدمين بالمرطب من فوق ومن تحت بما فيهم الضوافر.

ومن افضل المرطبات للضوافر هو زيت الزيتون, وعشان توصلي لافضل نتايج ادهني البشرة والضوافر بزيت الزيتون قبل النوم عشان الزيت يتغلغل بعمق جوه البشرة, وغير انه مرطب كمان بيعالج الضوافر والبشرة وبالتالي هتحافظي على ضوافرك قوية وصحية, كمان زيت جوز الهند من الزيوت المفيدة جدا للضوافر.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

7- اتجنبي الباديكير والمانيكير زيادة عن اللزوم:

الباديكير والمانيكير اكيد مهم لكن كمان لو عملتيه عدد مرات زيادة عن اللزوم ممكن يعمل نتيجة عكسية ويأذي الضوافر ويضعفها, عشان كده يكون مرة واحدة في الشهر كافي جدا.

كمان الباديكير زيادة عن اللزوم ممكن يأدي لالتهاب الضوافر المزمن وتخلي حوالين الضوافر على طول محمر ومنتفخ لان التعرض الكتير للمواد الكيميائية والمكونات اللي بتستخدم في صالونات التجميل هيخلي الضوافر مش صحية.

والافضل كمان انك تعملي الباديكير والمانيكير بنفسك في البيت بادواتك عشان تضمني انك تحاظفي على ضوافرك وتحميها من اي عدوى فطرية وتحافظي عليها صحية.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

8- متغسليش ايدك ورجلك زيادة عن اللزوم:

اكيد غسل الايد والرجل مهم عشان نحافظ على نضافتهم زي ما قولنا لكن المبالغة في غسلهم غلط لان ده هيعرض الضوافر للعدوى وهيخليها هشة وضعيفة وممكن تتكسر بسهولة.

 ولو انتي بتستخدمي المية كتير حاولي انك كل ما تبليها تنشفيها كويس وترطبيها كل ما تتبل يعني خلي المرطب حاجة اساسية من روتينك اليومي للبشرة والضوافر اكتر من مرة في اليوم.

وشغل البيت واستخدام مساحيق الغسيل والمية باستمرار من الحاجات اللي بتأثر بشكل سلبي على البشرة والضوافر, عشان كده حاولي انك تلبسي جوانتي وانتي بتعملي شغل البيت عشان تقللي على قد ما تقدري تعرض البشرة والضوافر للمواد الكيميائية المضرة الموجودة في المنظفات.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

9- اتجنبي انك تداري مشاكل الضوافر بالمانيكير:

لو ضوافرك شكلها سميك ولونها اصفر ده معناه انك بتعاني من فطريات الاظافر ولو حطيتي مانيكير عشان تداري المشكلة ده هيزودها اكتر في الحالة دي افضل حل انك تروحي للدكتور عشان تاخدي مضادات للفطريات تعالج لك المشكلة.

وبشكل عام الافضل انك متحطيش مانيكير بشكل مستمر لان ده مع الوقت بيغير لون الضوافر وبيخليها تغمق لازم تدي راحة لضوافرك من المانيكير وتديها فرصة تتنفس.

ومن الحاجات اللي ممكن تأذي الضوافر على المدى الطويل هي الضوافر الاكريليك لان المواد الكيميائية المستخدمة فيها مش صحية وبتأذي الضوافر وبتضعفها.

كمان اتجنبي استخدام مزيل المانيكير اللي بيحتوي على الاسيتون لانه بيخلي الضوافر هشة وسهلة التكسر, والافضل انك تستخدمي المزيلات اللي اساس مكوناتها من الزيت لانها اقل ضرر على الضوافر.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

10- راقبي ضوافرك بانتظام:

دايما الوقاية خير من العلاج يعني اننا نلحق اي مشكلة قبل ما تحصل, وعشان كده لازم نراقب ضوافر الايد والرجل بشكل مستمر مرة واحدة في الاسبوع على الاقل ولو لاحظتي اي تغير في شكل او لون الاظافر ده ممكن يكون دليل على الاصابة بفطريات الاظافر, كمان شوفي القدم من تحت لو فيه تقشر كمان دي علامة من علامات التعرض لفطريات الاظافر.

ولو لاحظتي اي تغيير في لون الاظافر او الجلد اللي حواليها, او التهاب او احمرار او الم وتورم لازم في الحالة دي تستشيري الدكتور.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

– نصايح اضافية للحفاظ على الاظافر:

1- حافظي دايما على ادوات الاظافر نضيفة ممكن تطهريها بانك تمسحيها بقطنة فيها كحول طبي قبل الاستخدام.

2- كلي اكل صحي عشان تحافظي على قوة الجهاز المناعي وبالتالي ده هينعكس بشكل ايجابي على صحة الضوافر والبشرة بشكل عام.

3- رشي الشوز دايما بمضاد للجراثيم.

4- اغسلي الشرابات بمية سخنة ومبيض عشان تقتلي اي فطريات او اي حاجة ممكن تسبب اي امراض للضوافر.

5- متشاركيش حد في الشوزات بتاعتك يعني متلبسيش شوز خاص بحد او تخلي حد يلبس الشوز بتاعك عشان متتنقلش ليكي اي عدوى.

6- مستخدميش الضوافر الصناعية لانها ممكن تسبب التهابات فطرية وبكتيريا.

7- لو شاكة ان عندك اي عدوى فطرية لازم تستشيري الدكتور.

8- ممكن تعالجي فطريات الاظافر بعلاجات منزلية زي زيت شجرة الشاي او خل التفاح يعتبروا من العلاجات المنزلية الفعالة لعلاج الفطريات, وممكن تستخدمي الكريمات المضادة للفطريات ودي موجودة في الصيدلية.

9- بمجرد ما تعالجي اي فطريات من الضوافر خدي الاحتياطات اللازمة وحافظي على الضوافر بالحاجات اللي قولناها عشان المشكلة متتكررش تاني وتحافظي عليها صحية.

نصايح لمنع عدوى الاظافر والحفاظ عليها صحية
نصايح لمنع عدوى الاظافر والحفاظ عليها صحية

شوفي 7 حاجات ممكن تقولهملك ضوافرك عن صحتك !

صحة الضوافر ممكن تقولك ايه عن صحتك العامة
صحة الضوافر ممكن تقولك ايه عن صحتك العامة