7 علامات تقولك انك لقيتي الشخص المناسب !

ريهام محمود
ريهام محمود
في
حب
30699

في بعض الاحيان كتير مننا بيستنى كتير على ما يقابل الشخص المثالي او المناسب وده بيخلي بنات ممكن تتسرع وتختار غلط, او تستنى فترة طويلة ومع الوقت بتقل فرص انها ممكن تلاقي الشخص المناسب لان اي بنت عشان تلاقي الشريك المناسب اللي هتقضي معاه باقي حياتها دي حاجة مش سهلة, واحنا النهاردة هنساعد كل بنات حوا من خلال 7 علامات تقولك انك لقيتي الشخص المناسب ليكي اللي ممكن تقضي معاه بقية حياتك.

7 علامات تقولك انك لقيتي الشخص المناسب:

1- بتحسي ناحيته بشعور مفاجيء:

لما تحسي بشعور مفاجيء ناحية شخص يعني فجأة تلاقي نفسك بتحسي ناحيته بمشاعر مختلفة, ودايما بتفكري فيه وصورته على طول قدامك طول اليوم, هتحسي كانك لقيتي اخيرا المفتاح المناسب اللي هيفتح قلبك من غير اي مجهود, وان روحكم وشخصياتكم زي بعض او بتكمل بعض, ولما بتقضوا وقت مع بعض بتكوني مبسوطة وبيبقى اسعد وقت بالنسبة لك وبتبقي عايزاه هو كمان يكون عنده نفس الشعور وانه يكون قضى وقت حلو معاكي, ولما بتبقي لوحدك بتفتكري كل اللحظات الحلوة والوقت اللي كنتوا فيه مع بعض.

2- مش بتملي منه:

الزوج او الزوجة مش مجرد حبيب او شخص هتشوفيه لفترة وتسيبيه لكن ده بيبقى الشخص اللي هتشوفيه 24 ساعة في اليوم وهتعيشي معاه كل تفاصيل حياتة سواء وهو كويس او مريض او عصبي او في حالة مزاجية مش حلوة او وهو لابس حلو او شكله مش حلو يعني هتتعايشي معاه بكل تفاصيله الحلوة والوحشة, عشان كده لو حسيتي ناحية شخص انك ممكن تقضي معاه وقت ومش بتحسي معاه بالملل, وانتي معاه بتبقي مش عايزة تسيبيه, وانك ممكن تتقبلي تعيشي معاه بكل التفاصيل اللي احنا قولناها دي يبقى اكيد ده هيكون الشخص المناسب.

3- مش بيخلي عليكي ضغط:

الشخص اللي بيديكي الحرية وبيحترم رايك وقراراتك يبقى ده شخص ناضج وعقلة متفتح وهيحترمك ويقدرك ويبقى ده اكيد هيكون شخص مناسب ممكن تكملي معاه حياتك.

الشخص اللي مش بيحاول يفرض وجهة نظره او رايه عليكي, او دايما بيحاول يقنعك ان رايه هو الصح ودايما بتحسي ان ليكي مكان خاص في حياتة.

كمان تصرفاته العامة ممكن تخليكي تقدري تعرفي شخصيتة او اسلوبة في التعامل معاكي في المستقبل يعني مثلا لو في مكان وحصل اي موقف ولقيتيه اتعصب بسرعة او اتنرفز على حد في مكان عام على حاجة بسيطة مش مستاهلة يبقى تعرفي ان ده هيكون رد فعله معاكي في المستقبل لو عملتي اي حاجة مش عجباه, يبقى ساعتها لازم متتسرعيش في قرار الجواز من الشخص ده.

علامات تقولك انك لقيتي الشخص المناسب
علامات تقولك انك لقيتي الشخص المناسب

4- في كل مرة تعرفي عنه حاجة جديدة بتبسطك:

مع الوقت اكيد بنكتشف شخصيات بعض لو كل مرة بتكتشفي فيه حاجة جديدة بتحبيها سواء حاجة في شخصيتة او هوايات مثلا يعني كل مرة بيبهرك بحاجة جديدة وان امكانياته مش بتخلص ودايما متجدد يبقى اكيد دي علامة تقولك انه ممكن يكون الشخص المناسب ليكي لانك مش هتحسي معاه بالملل ابدا وحياتهم هتبقى دايما فيها تجدد.

5- تتقبليه زي ما هو:

انك تتقبلي الشخص ده زي ما هو بكل عيوبة لانك كل المهم عندك انك عايزة تبقي معاه او تكملي حياتك معاه يعني تقبلي شخصيته زي ما هي وافكاره حتى لو بتختلفي معاه فيها في بعض الاحيان, ودايما بتحاولي انك تحلي المشاكل وتوصلي لحل يرضي الطرفين, يبقى اكيد الشخص ده هيكون الشخص المناسب ليكي وتتأكدي ساعتها انك هتفضلي تحبيه على طول والحب مش هيقل مع السنين لكن بالعكس كمان هيزيد.

6- مش بيخبي عليكي حاجة:

النقطة دي مهمة جدا وهي انه يكون مافيش اسرار بينكم وتلاقيه مش بيخبي عنك حاجة لان الاسرار دي بتبعد المسافات بين اي اتنين وكمان لما هتحسي انه مخبي عنك حاجة ده هيزرع الشك جواكي ناحيته ويخليكي ممكن تفكري في افكار غلط او تفسري تصرف معين بطريقة مش صح, لكن الصراحة وانه يجي يقولك على كل حاجة بشكل مباشر ده هيخلق ثقة بينكم وهتبقي مطمنة معاه في المستقبل.

7- تكوني على استعداد تقضي حياتك كلها معاه ودي هتبقى اسعد حاجة بالنسبة لك:

مافيش علامة اكتر من انك تبقى بتعملي كل حاجة عشان تنجحي العلاقة دي وبتصبري وتتحملي عشان تكلمي مع الشخص ده وكمان الطرف التاني يكون نفس الشعور لان الحب اكيد عطاء من الطرفين.

والحياة في النهاية اختبار بنمر فيها بمواقف كتير جدا صعبة لما تحسي انك ممكن تعيشي حياتك معاه في اي ظروف وانك ممكن تتحملي اي حاجة زي ظروف مرض او ظروف مادية او نفسية ايا كانت الظروف, او لو انتي بتمري بظروف صعبة ولقيتي ان هو في اللحظة دي بيساندك وبيدعمك بكل قوته, يبقى ده اكيد الشخص المناسب اللي ممكن تعتمدي عليه في الحياة وتكملي معاه حياتك وتقدروا تواجهوا تحديات الحياة مع بعض.

شوفي كمان 11 علامة تقولك انك مش هتكملي في العلاقة دي

علامات تنبهك لانهاء العلاقة
علامات تنبهك لانهاء العلاقة

مقالات متعلقه

5 حاجات هتحصلك لما تقابلي توأم روحك

5 حاجات هتحصلك لما تقابلي توأم روحك

10 حاجات لازم تكون موجودة في شريك حياتك المناسب

10 حاجات لازم تكون موجودة في شريك حياتك المناسب

10 حاجات لازم كل اتنين متجوزين يعملوها هتزود الحب بينهم !

10 حاجات لازم كل اتنين متجوزين يعملوها هتزود الحب بينهم !