وصفات علاجات طبيعية لما تحسي انك تعبانة ..

بقلمآية حسان فيصحة visibility1984

الشتاء دخل علينا خلاص و هيبدأ موسم البرد والانفلونزا و التعب، ولانه اللى ورانا من شغل و بيت او جامعة مابيستناش ولا بيتأجل ، فى المقال ده هنقلك على وصفات علاجات طبيعية لما تحسي انك تعبانة بالصداع او الارهاق او التهاب الجيوب الانفية او الالم عشان تجربيهم و ترتاحى من اى تعب بسهولة علشان تقدرى تكملى و انتى كلك نشاط و حيوية.

وصفات علاجات طبيعية لما تحسي انك تعبانة ..

1- التهاب الحلق : 

العلاج: شاى الكاموميل بالعسل. 

الكاموميل غنى بالمود المضادة للبكتيريا و بيعتبر مضاد قوى للألم. و كمان بيساعد على استرخاء العضلات و الراحة ، ضيفى العسل الابيض لشاى الكاموميل و ده هيساعدك فى علاج التهاب الحلق و يخلى البلع اسهل.

التهاب الحلق

2-  علاج الصداع : 

العلاج : ابعدى عن مسببات التوتر، اطفى الكمبيوتر لو شغالة عليه و خدى اكتر من نفس عميق تشمى فيه زيت عطرى و خدى كام ثانية تحاولى تريخى فيهم دماغك و ماتفكريش فى حاجة. ده ممكن يكون مش علاج فورى لكن الاسترخاء بيعتبر من احسن علاجات الصداع خصوصا الناتج عن التوتر. ممكن تلعبى يوجا لمدة ساعة او تنامى شوية بعد الضهر علشان تخفى التوتر و بالتالى الصداع هيختفى.

علاج الصداع

3- احتقان الجيوب الانفية : 

العلاج : افتحى المجرى التنفسي باستخدام الزيوت العطرية، ممكن تدعكى طرف الانف بزيت عطرى او تشميه على طول من الازازة و هيبقى العلاج ده فعال اكتر لو عملتيه على طول بعد دش سخن.

لما بيبقى فى احتقان فى الانف اول حاجة بتبقى عايزة تعمليها هى انك تستخدمى المنديل لكن الحقيقة انه الحركة دى بتشكل ضغط اكبر على الجيوب الانفية و ده بيديكى احساس انك مش عارفة تتنفسي و ممكن يزود الالتهاب ، لكن استنشاق الزيوت العطرية هيفتح المجرى الهوائي ويساعدك فى تقليل الاحتقان و بالتالى هتقدرى تاخدى نفسك براحة اكتر. 

الاحتقان

4- علاج الالم :

العلاج : حمام سخن بملح الابسوم ” الملح الانجليزى” .

مفيش افضل من انك تاخدى حمام دافى و طويل علشان تريحى جسمك و تقلى منه اى وجع او الم، ” العلاج بالحرارة” بيعتبر طريقة ممتازة لعلاج الالم خصوصا لما تضيفى لمية الحمام كمية مناسبة من الملح الانجليزى، ده هيساعد جسمك يسترخى و هيخفف عنك اى الم او وجع ناتج عن الارهاق و التعب.

الالم

5- علاج الدوخة و الغثيان : 

العلاج : شرب الزنجبيل و النعناع.

الزنجبيل و النعناع ليهم خصائص طبية بتقلل من الدوخة و الغثيان ، ممكن تدخلى الزنجبيل فى الطبخ او تشربية على شكل شاى، الزنجبيل معروف انه مفيد جدا فى التخفيف من غثيان الصباح و الدوخة خصوصا فى حالات العلاج الكيماوى. النعناع و زيت النعناع مفيدين كمان فى علاج حالات الامساك و اضطراب المعدة.

الدوخة و الغثيان

6- علاج الارهاق : 

العلاج : لما تحسي بالتعب و الارهاق حتى بعد ما تكونى نمتى كويس بالليل دى بتعتبر علامة على انه جسمك مرهق لاساب مختلفة، شوية تمرينات بسيطة ممكن تكون هى العلاج اللى انتى محتاجاه و هتعزز من مستويات الطاقة عندك.

الدراسات بينت انه التمارين ممكن تبقى علاج مثالى لحالات الشعور بالتعب و الارهاق، العلاج بالتمرينات المتدرجة هو علاج بيعتمد على انك تبدأى تعملى تمينات خفيفة و بعدين تبدأى تزودى فى قوة التمرينات بشكل تدريجى ، ابدأى بتمرينات الـ streching و بعد كده تدريجيا مع مرور الوقت ابدأى فى تزويد شدة التمارين. الدراسات اثبتت انه الاشخاص اللى بيستخدموا الطريقة دى فى التمارين بدأوا يلاحظوا انهم بيحسوا بالتعب  وا لارهاق بشكل أقل.

الارهاق

بكده تكونى عرفتى معانا وصفات علاجات طبيعية لما تحسي انك تعبانة ، جربيهم وقوليلنا ايه الوصفة اللى ريحتك اكتر :)