10 اسباب هيخلوكي تستخدمي المكياج المعدني
يمكن يكون في مننا سمع عن المكياج المعدني لكن منعرفش ايه هو بالظبط او ايه فايدته والفرق بينه وبين المكياج العادي, وده اللي هنعرفه النهاردة مع بعض.
التركيبة المعدنية ظهرت في عالم المكياج ومستحضرات التجميل عشان تحافظ على البشرة صحية وخصوصا لصاحبات البشرة الحساسة وفي نفس الوقت بتعمل تغطية عالية للبشرة.
والمكياج المعدني مكوناته بتكون من مجموعة من المعادن زي اكسيد الحديد, اكسيد الزنك, ثاني اكسيد التيتانيوم, بيطحنوا لجزيئات صغيرة جدا, ونقدر نقول ان الفرق الرئيسي او الاساسي بين المكياج المعدني والعادي ان المعدني بيكون خالي من المواد الحافظة, وخالية من العطور ودول اكتر سببين تقريبا ممكن يضروا البشرة او يسببوا تهيج للجلد بعكس المكياج العادي.
تعالوا نعرف 10 اسباب هيخلوكي تستخدمي المكياج المعدني:
1- بيدوم فترة طويلة:
واحدة من اكتر المزايا المهمة جدا للمكياج المعدني انه بيدوم او بيثبت فترة طويلة ولمدة اكتر بكتير من المكياج العادي, وباستخدام كمية قليلة جدا منه بتكون كافية للتغطية والاستمرار مدة طويلة على البشرة, ولتغطية اكبر ممكن بعد ما تحطي طبقة خفيفة من المكياج المعدني تحطي كمية اكتر تركيز من الاساس عشان تخفي اي مناطق في البشرة محتاجة عناية خاصة او تغطية اعلى.
2- بيحتوي على خصائص مضادة للالتهابات:
المكياج المعدني بيتركب من مجموعة من المعادن وواحد منها هو ثاني اكسيد التيتانيوم والمعدن ده بالذات ليه خصائص عالية مضادة للالتهابات اللي بتساعد على تقليل تهيج الجلد والاحمرار, عشان كده المكياج المعدني يعتبر مناسب جدا للي بيعانوا من حب الشباب او احمرار الجلد لانه بيساعد على التخلص من مشاكل البشرة, يعني لما تستخدميه مش هتبقي قلقانة انه ممكن يأذي بشرتك او يزود الحبوب او يعمل اي تهيج للبشرة لانه آمن جدا وهتستخدميه وانتي مطمنة.
3- مناسب لكل انواع البشرة:
المكياج المعدني بيتميز انه مناسب لكل انواع البشرة سواء حساسة او جافة او دهنية, لان مكوناته خالية من المواد الحافظة والمواد الكيميائية والعطور والسيليكون, يعني مش هتبقي قلقانة لما تشتريه وتسألي نفسك هل مناسب ليكي ولا لا لانه آمن تماما على البشرة حتي في حالة تلف بشرتك بردو هيبقى مناسب ليكي ومش هيضرك.
4- ضد المية Waterproof:
من الحاجات اللي دايما بتقلقنا في مكياجنا انه ممكن يسيح بسرعة او يتأثر بالمية او الرطوبة او الحرارة لكن مع المكياج المعدني مش هتقابلك المشكلة دي لانه مقاوم للمية Waterproof يعني ممكن تحطي في اي وقت وفي اي جو مش هيتأثر وهيفضل ثابت.
5- مش بيسد المسام:
مافيش اي حاجة من مكونات المكياج المعدني ممكن تسد مسام البشرة حتى لو نسيتي او كسلتي تغسليه ونمتي بيه مش هيسبب اي انسداد للمسام وهيسمح لجلدك يتنفس وهيحميه, وهو آمن جدا لانه بيلتصق بشكل سريع مع زيوت البشرة الطبيعية ومش بيتسرب للمسام, وتقريبا اي حاجز بين بشرتك وعوامل الجو الخارجية بتكون حاجة كويسة مادام مش بتضر بشرتك وبتحافظ عليها وبتسمح لها تتنفس.
6- بيحتوي على عامل حماية طبيعي من الشمس:
لان المكياج المعدني بيحتوي على عنصر ثاني اكسيد التيتانيوم في الحالة دي يعتبر المكياج المعدني عامل حماية طبيعي من الشمس وبيوفر حماية ضد الاشعة فوق البنفسجية UVA, و UVB, وثاني اكسيد التيتانيوم بيوفر تغطية لانه معدن معتم وبالتالي بيساعد على عكس اشعة الشمس وحماية الجلد من اضرارها, وبيقلل من التجاعيد والخطوط الرفيعة والعيوب.
7- بيدي لوك طبيعي:
الميزة في المكياج المعدني انه بيدي لوك طبيعي كأنك مش حاطة مكياج وفي نفس الوقت بيديكي التغطية اللازمة, هو يعتبر نوع مكياج خفيف جدا على البشرة, ولو عايزة تطبقي مكياج النو ميكب هيكون انسب اختيار ليكي هو المكياج المعدني لانه هيظهرك بلوك طبيعي جدا.
8- صلاحيتة طويلة:
بالاضافة الة انه بيقعد فترة طويلة على البشرة كمان بيتميز ان صلاحيتة طويلة اكتر من المكياج العادي, واكيد كلنا بنبقى عايزين المكياج يقعد معانا فترة طويلة ومش كل شوية نشتري مكياج جديد عشان كده انسب اختيار هيكون المكياج المعدني لان تركيبته المعدنية مش بتسمح بتكون الجراثيم لانه خالي من المواد العضوية اللي ممكن تسمح لنمو البكتيريا فيها.
9- حرية استخدامه:
المكياج المعدني هو اكتر نوع مكياج متنوع من بين انواع المكياج كلها, لانك تقدري تستخدميه باكتر من طريقة ممكن تخلطيه مع المية, او الكريم المرطب عشان تخلي قوامة سائل وكريمي اكتر, وكمان لانه بيحتوي على بودرة شفافة من غير اضافات او اصباغ فانتي مش محتاجة تستخدمي معاه بودرة, وممكن تدمجيه مع اي حاجة مع ايشادو, ملمع الشفايف, الماسكارا, ملمع الجسم, البلاشر يعني بيمتزج مع اي حاجة تقريبا.
10- ممكن تستخدميه على الجلد التالف:
من مميزات المكياج المعدني الهايلة جدا انك ممكن تستخدمي بعد التقشير الكيميائي او العلاج بالليزر لانه لطيف جدا على البشرة وخالي من اي مواد ممكن تضر البشرة التالفة, كمان بيحتوي على خصائص بتعكس الضوء لتقليل ظهور التجاعيد والخطوط الرفيعة وبيحمي البشرة وبيحافظ عليها وبيديها توهج صحي.
ومن الماركات اللي بنقترحها على بنات حوا للمكياج المعدني مايبيلين, بورجوا, ماك, لوريال, ايلف, بوبي براون.
شوفي حيل هتخلي كريم الاساس يدوم معاكي طول اليوم
