8 فوايد للعياط مكنتيش تعرفيها قبل كده!
العياط مشاعر عاطفية مافيش حد اكيد مش بيمر بيها سواء في موقف حزين او حتى موقف سعيد احنا طبيعتنا عاطفيين وبنعيط في الحزن والفرح يعني اي موقف مؤثر بيمر علينا بيكون اول رد فعل لينا هو العياط.
والمسئول عن الدموع دي هي الغدد الدمعية ودي بتنتج في اليوم تقريبا 283 جرام من الدموع يوميا يعني حوالي كوباية وربع وحوالي 113 لتر في السنة, ودراسات كتير اثبتت ان النساء بتبكي اكتر من الرجال وان النساء بتعيط بمعدل من 3 – 5 مرات في الشهر تقريبا والرجال في المتوسط من 1 – 3 مرات في الشهر.
والدموع ممكن تكون لا ارداية, او نفسية وعاطفية نتيجة موقف معين, والدموع العاطفية بتحتوي على مستوى اعلى من هرمونات التوتر, بس اكيد احنا هنقول اننا لما بنعيط عينينا ممكن تنتفخ من كتر العياط او تحمر وهنسأل نفسنا يبقى ايه هي فوايد العياط اللي ممكن تعود علينا او تأثر علينا بشكل ايجابي ؟
لكن العياط ليه فوايد كتير منها انها بتزيل السموم والهرمونات الضارة اللي بتتراكم في الجسم نتيجة الاجهاد, الدموع بتساعد على تهدئة قزحية العين وبتريحها, بتطهر الطاقة السلبية من الجسم وبتسمح ان الطاقة الايجابية تتجدد, وغيرها من الفوايد اللي هنعرفها النهاردة من خلال المقال بتاعنا.
تعالوا نعرف مع بعض فوايد العياط ليكي !
1- طرد السموم من الجسم:
العياط او الدموع بتساعد على تخليص الجسم من السموم والمواد الكيميائية الضارة اللي ممكن ترفع مستويات هرمون الكورتيزول وده الهرمون المرتبط بالتوتر.
والعياط زيه زي اي افرازات تانية بتحصل في الجسم زي العرق او التبول او الزفير كلها حاجات بتساعد على تطهير الجسم من المواد الكيميائية اللي بتسبب التوتر وبتزيل السموم غير المرغوب اللي بتتراكم نتيجة في الجسم نتيجة التوتر العاطفي واللي بدورها ممكن تأدي لمشاكل صحية لو متخلصناش منها, والدموع بتساعد في التخلص من السموم والمواد المضرة دي وتعتبر كمسكن طبيعي للجسم يعني تقريبا الدموع بتساوي في تأثيرها جلسات العلاج الطبيعي او المساج ولكن من غير تكاليف.
ولكن الدموع بتساعد على تطهير الجسم في حالة لما تكون دموع عاطفية لانها دي اللي بتكون مرتبطة بشكل مباشر بالتوتر, مش الدموع اللي بتكون بسبب اي مؤثر او مهيجات مادية للعين او اي حاجة سببت نزول الدموع.
2- التخلص من التوتر:
العياط يعتبر وسيلة آمنة وفعالة للتخلص من التوتر, لان الدموع العاطفية زي ما قولنا بتطرد هرمون الكورتيزول الزيادة من الجسم وبالتالي ده بيخفف من التوتر والضغط وبيخليكي تحسي انك احسن.
ومش بس كده كمان الدموع بتحتوي على 30 مرة اكتر من نسبة المنجنيز الموجود في الدم والمعدن ده مسئول عن تغيير المزاج وبالتالي انتي لما بتعيطي بتخرجي جزء كبير منه في الدموع وبيخليكي تحسي باجهاد اقل.
العياط ممكن يحميكي من خطر الاصابة بالنوبات القلبية وتلف الدماغ لانه بيخفف من التوتر اللي ممكن يسبب كتير من المشاكل الصحية زي امراض القلب وارتفاع ضغط الدم, ومرض السكر من النوع التاني, والبدانة.
كمان العياط بيزيل المواد الكيميائية المضرة زي مادة اي سي تي اتش اللي بتتراكم في الجسم اثناء التوتر ودي زيها زي مادة الكورتيزول ازالتها من الجسم بيحميكي من كتير من المشاكل الصحية اللي ممكن تحصل.
العياط بيخفف الشعور بالاجهاد وبيساعدك تتعاملي مع المشاعر السلبية والاحباط.
3- تحسين المزاج:
العياط بيفرز مادة الاندروفين وده الهرمون اللي بيخليكي تحسي بشعور كويس او بيخليكي مبسوطة, وكمان الاندروفين ليه تأثير مسكن بيساعد على النوم بشكل افضل بعد العياط.
والدراسات بالفعل اثبتت ان العياط بيساعد على تحسين المزاج, ويتعبر مهديء ذاتي, وبيساعد على رفع المزاج وتحسينه افضل من اي مضادات للاكتئاب, وفي الدراسات لاحظوا الارتباط ما بين العياط وانتعاش وتحسين المزاج وان بعد ما بتخلص نوبة العياط بتحسي ان نفسيتك او مزاجك بقى احسن والمشاعرالسلبية عندك بقت اقل.
4- تحسين النظر:
العياط بيساعد على تنضيف العين وبيحميها من المهيجات, وبيحسن النظر, يعني لو اتعرضتي لاي مادة مهيجة للعين الغدد الدمعية بتنشط وبتنزل الدموع بتغسل العين.
والدموع بتحتوي على الجلوكوز والليزوزيم, ومضادات الجراثيم, والانزيمات المضادة للفيروسات اللي بتحمي وبتغذي الخلايا على سطح وداخل العين, وبتساعد على كسر الجدار الخارجي الواقي للبكتيريا وبالتالي بتقتلهم وبتمنع اي ضرر للعين.
كمان العياط بيساعد في الحفاظ على الاغشية المخاطية للعين وبتخليها رطبة, وبتغسل سطح العين بشكل مستمر من التراب واي حاجة ممكن تضرها, ده غير ان ترطيب العين بالعياط بيساعد على تحسين النظر.
5- بيحافظ على ترطيب الانف:
العياط مش بس مفيد للعين كمان مفيد للانف لانه بيرطب وبيزيل البكيتريا من الانف, عن طريق الافراج عن القنوات الدموع للانف عن طريق القنوات الدمعية, لان الدموع بتنزل من خلال القنوات الدمعية الانفية في مخاط الانف في الممر الانفي وده بيفسر ليه بيحصل سيلان في الانف لما بنعيط, ولما الدموع بتختلط مع مخاط الانف بيشكلوا سائل بيخرج من الانف بينضفها من التراب والبكتيريا وبيرطبها.
6- بيقتل البكتريا وبيحسن المناعة:
الدموع بتحتوي على مضادات للبكتيريا والفيروسات قوية اللي بتساعد بشكل كبير على التخلص من كل الجراثيم المتراكمة خلال اليوم او فترة النهار.
الدموع بتحتوي على الليزوزيم اللي ممكن يقتل من 90 – 95% من البكتيريا في دقايق, والانزيمات المضادة للبكتيريا, ومضادات للميكروبات والفيروسات قوية واللي بتساهم في قتل البكتيريا في العين, وبتعمل طبقة واقية على الاسطح الخارجية والداخلية للعين.
بتساعد على مكافحة امراض العين او اي عدوى ممكن تحصلها, عشان كده الدموع تعتبر وسيلة فعالة جدا لتعزيز المناعة ضد الاجهاد والتوتر.
7- التفريج عن العواطف المكبوتة:
العياط بيساعدك على مواجهة المشاعر المؤلمة بقوة, ويعتبر العياط التنفيس السليم او الصحي والطبيعي لتخفيف التوتر عن العقل وبيساعدك على التعامل مع مشاكلك بشكل اهدى.
والعياط بيساعدك تتخلصي من المشاعر السلبية والغضب, لدرجة ان اليابانيين عملوا علاج بالعياط سموه ” طفرة البكاء” عشان يخلصهم من الضغط النفسي او التوتر اللي بيقابلهم طول اليوم فبقوا بدل ما يروحوا حفلة مثلا يتفرجوا على فيلم في مشاعر او مشاهد تخليهم يعيطوا عشان يخرجوا كل المشاعر المكبوتة جواهم, ومش بس كده ده كمان زاد الطلب في اليابان على الكتب الحزينة والبرامج التليفزيونية المؤثرة اللي ممكن تخليهم يعيطوا.
8- تعزيز التواصل:
في بعض الاحيان العياط ممكن يكون وسيلة اتصال وخصوصا لما تكوني مش قادرة تعبري عن اللي انتي حاسه بيه بالكلام او حاسه بألم اوي ومش قادرة تتكلمي بالتالي بيكون العياط هو وسيلة الاتصال اللي تقدري تعبري بيها عن مشاعرك او عن اللي انتي حاسة بيه.
العياط يعتبر وسيلة اتصال قوية بين الناس افضل مثلا من السكوت اللي ممكن يتفهم غلط, لان الناس لما هتشوفك بتعيطي هتفهم ان في جواكي الم او مشاعر سلبية وهيقدوا اللي انتي فيه.
العياط بيخفف الضغط عنك في المواقف الصعبة زي فراق حد او المرور باي موقف صعب في حياتك مش بتكوني محتاجة فيه اكتر من انك تعيطي بس عشان تخففي الالم او الضغط اللي انتي حاسة بيه.
شوفي 5 خطوات للتعامل مع الشخص العدواني
