اهم نصايح فن الأتيكيت في حياتك اليومية والاجتماعية

آية حسان
آية حسان
9520

زى ما اتكلمنا قبل كده عن أهمية فن الأتيكيت فى مجالات حياتنا المختلفة زى أتيكيت العلاقات، الاكل، الشغل، والأتيكيت فى الخروج و حتى قواعد الأتيكيت فى الجيم، فى المقال ده هنقولك على نصايح سريعة لكن مهمة وهتفرق فى تعاملاتك كل يوم بشكل كبير، لانه اوقات كتير بيبقى صعب علينا نعرف ايه اللى المفروض عمله او نقوله فى المواقف المختلفة وده ممكن يحطنا فى مواقف محرجه ، اعرفى معانا اهم نصايح فن الأتيكيت في حياتك اليومية و الاجتماعية ..

اهم نصايح فن الأتيكيت في حياتك اليومية و الاجتماعية

قواعد الأتيكيت الاجتماعية الأساسية : 

1- خليكى دايما لطيفة فى تعاملاتك مع كل الناس من حول حتى لو كانوا اطفال ، لازم تتعاملى بقدر من الـ common sense و تقدمى المساعدة لاى حد يحتاجها طالما تقدرى تساعدى.

2- خليكى حريصة انك دايما توصلى فى ميعادك و متتاخريش او تبقى سبب فى تأخير الناس لو مستنيينك.

3- احترمى المساحة الشخصية للناس من حواليكى و احترمى خصوصيتهم و ماتدخليش فى امورهم الشخصية.

– قواعد الأتيكيت فى التعاملات : 

اثناء الحوار : 

حاولى تلتزمى بآداب الحوار و ماتدخليش فى مناقشات حادة او يبقى صوتك عالى او تستخدمى الفاظ مش مناسبة، خليكى هادية فى كل مناقشاتك و حاولى تديري الحوار بطريقة متحضرة و تستوعبى و تتقبلى آراء الناس من حواليكى.

الـ gossip :

ابعدى عن الـ gossip  وماتدخليش ابدا فى نميمة ، لانه زى ما احنا مابنحبش حد يتكلم علينا كمان مايصحش نتكلم عن الناس و هما مش موجودين.

أسماء الاشخاص : 

مهم تفتكرى اسماء الناس من حواليكى خصوصا اللى ممكن تقابليهم اكتر من مرة او تجمعك بيهم مواقف و لو كانت على فترات متباعدة ، ولو وقفتى تتكلمى مع شخص جديد لاول مرة لازم تعرفى نفسك و تعرف اسمه .

الموبايل : 

حاولى تقللى من استخدامك للموبايل لما تبقى فى مكان عام او قاعدة مع مجموعة من الاشخاص، لانه مش من قواعد الاتيكيت انك تتكلمى مكالمات خاصة وسط الناس ، فلو المكالمة مش ضرورية ماتروديش او ممكن تردى برسالة . و لو انتى واقفة على الكاشير فى سوبر ماركت مثلا حاولى ماتنشغليش بالشات علشان ماتعطليش الناس من وراكى.

السوشال ميديا : 

facebook ، twitter  و applications السوشال ميديا المختلفة بقت جزء من حياتنا و من حياة الناس من حوالينا، اعملى حساب للى بتكتبيه او تحطيه عن نفسك او حياتك على السوشال ميديا لانه ممكن بكل بساطة يتاخد copy  او يتعمله share .

الايميل :

وانتى بتكتبى ايميل خاص بالشغل، راجعى الايميل و اقريه مرة تانية قبل ما تدوسي send لانه اللى هيتبعت مش هايرجع تانى .

الاسئلة : 

كلنا بيبقى عندنا اسئلة عايزين نعرف لها اجابة، فاختارى دايما الوقت المناسب لطرح اسئلتك و لو اتعرضت لسؤال سخيف او موقف محرج و ماعرفتيش تردى عليه ابتسمى او حاولى تغيرى الموضوع .

قواعد الأتيكيت على الاكل : 

لما تيجيى تقعدى مع حد على الاكل ، مهم تبقى عارفه ايه هى قواعد و فن الأتيكيت وقت الاكل زى انه مثلا ماينفعش نتكلم و الاكل فى بقنا او انه تاكلى بصوت ..

على السفرة : 

اتبعى قواعد الذوق العام الخاصة بالاكل، يعنى لو مثلا ساندة بايدك على السفرة فبتخلى السفرة تتهز او تعمل صوت يبقى تشيلى ايدك، افردى منديل السفرة على رجليكى، ماتكليش بصوت و كلى و الفم مقفول و لو اضطريتى تتكلمى اثناء الاكل يبقى اشربى مية قبل ما تردى او تبدأى الكلام.

فى المطعم : 

لو رايحة تاكلى فى مطعم يبقى حاولى توصلى قبل ميعاد الحجز بتاعك بوقت بسيط علشان تدى فرصة للجرسون انه يبدأ يجهز طلباتك فى وقت كفاية، اتعاملى مع اللى شغالين فى المكان بلطف و ود، حاولى صوتك مايبقاش عالى او تزعقى.

حفلات العشاء الرسمية : 

اختاري outfit مناسب للمكان و المناسبة وحاولى تعتمدى على البساطة فى ستايلك، حاولى مايبقاش ليكى طلبات كتير و اتعاملى بلطف و ذوق مع الناس من حواليكى.

قواعد الاتيكيت فى الشغل : 

بما اننا بنقضى فى الشغل نص يومنا تقريبا و زمايل الشغل بيعتبروا عيلتنا التانية، مهم تهتمى بقواعد الأتيكيت الخاصة بالتعاملات فى الشغل علشان تحسنى من علاقاتك مع زمايلك و مديرك و حطى فى بالك انه تصرفاتك و اسلوبك ليهم تأثير كبير على مستقبلك.

العلاقات فى الشغل : 

حاولى تكونى علاقات صحية مع زمايلك و رؤساءك فى الشغل و يبقى بينك و بينهم جو من الصداقة و التعامل يكون علي المستوي العملي ، ممكن تحاولى تعملي gesture لطيفة بأنك تعمليلهم حاجه حلوة و تاخديها المكتب او تساعدى حد من زمايلك محتاج مساعدة فى شغله و حاولى تفضلى دايما جزء من الteam.

الملابس الخاصة بالشغل : 

خلى فى دولابك جزء خاص بملابس الشغل يبقى formal او semi formal  و بيناسب طبيعة شغلك، يعنى حاولى تبتعدى عن الكعب العالى او الملابس المنقوشة اوى او اللى بتلمع، شوفى هنا افكار ستايلات smart casual للشغل

الهدايا :

شوفى هنا ايه هو نصايح و قواعد أتيكيت الهدايا فى الشغل .

قواعد الأتيكيت فى الاماكن العامة : 

جزء مهم من فن الأتيكيت في حياتك اليومية هو انك تعرفى ازاى تتصرفى فى الاماكن العامة اللى بنتواجد فيها كل يوم و فى المناسبات المختلفة زى الفرح او العزاء و فى الاماكن المختلفة زى المواصلات او الشغل …

وانتى على الطريق رايحة الشغل : 

وانتى راكبة المترو او العربية او اى وسيلة نقل عامة وانتى رايحة الشغل، حاولى تقعدى فى المكان المخصص ليكى و تلتزمي بيه ولو لقيتى حد كبير في السن واقف او ست معاها طفل يفضل تقومى و تخليها تقعد مكانك.

و انتى بتتمرنى : 

اعرفى معانا هنا ايه هى نصايح و قواعد الأتيكيت فى الجيم .

فى الافراح : 

قاعدة كمان من قواعد فن الأتيكيت في حياتك اليومية هى السلوك فى الافراح ، حاولى تبقى بتساعدى على قد ما تقدرى ولو متضايقة او فى حاجه مزعلاكى يبقى ماتبينهاش، لو العروسة محددة لبس معين او dress code للفرح يبقى ضرورى تلتزمى بيه، ولو ممنوع اصطحاب الاطفال حاولى تلتزمى بتعليمات العروسة، نصيحة اخيرة ماتلبسيش فستان ابيض وانتى رايحة الفرح .

فى العزاء : 

آخر حاجه هنتكلم فيها  فى فن الأتيكيت في حياتك اليومية هو ازاى تتصرفى و تتعاملى فى موقف صعب زى موقف العزاء، لانه المواقف دى دايما بتحطنا فى مواقف محرجه و بنبقى مش عارفين نقول ايه او نتصرف ازاى او احسن طريقة نقدر نساعد بيها هى انك تخففى عن اصحاب العزاء بالكلام الخفيف من غير دخول في تفاصيل كتير و انك تقفى جمبهم ماديا او معنويا و تحاولى تصبريهم و ماتضغطيش عليهم فى الكلام .

مقالات متعلقه

نصايح و قواعد أتيكيت العلاقات فى الشغل

نصايح و قواعد أتيكيت العلاقات فى الشغل

16 قاعدة اتيكيت وآداب عامة لازم تنفذيهم في حياتك !

16 قاعدة اتيكيت وآداب عامة لازم تنفذيهم في حياتك !

نصايح و قواعد الأتيكيت فى الجيم

نصايح و قواعد الأتيكيت فى الجيم