افضل واسوأ الاكلات اللي ممكن تاكليها على معدة فاضية !

كلنا لما بنقوم الصبح ممكن ناكل اي حاجة على الريق كوجبة فطار من غير ما نفكر هل الاكل ده مناسب للوقت ده ولا لا ومش كتير مننا يعرف ان في اكلات لو اكلناها على معدة فاضية هتكون مضره لينا او مش كويسة, وفي اكلات تانية مفضلة اننا ناكلها على الريق في وجبة الفطار, وده اللي هنعرفه النهاردة مع بعض من خلال موضوعنا ايه هي افضل واسوأ الاكلات على معدة فاضية هتساعدكم بعد كده تختاروا اكلاتكم بشكل صح لانها هتفرق جدا معاكم باقي اليوم.

تعالوا نعرف مع بعض افضل واسوأ الاكلات على معدة فاضية:

– اسوأ الاكلات على معدة فاضية:

1- الفطاير والمعجنات:

المعجنات او الحاجات اللي داخل في مكوناتها خميرة بشكل عام بتبقى مضرة اننا ناكلها على معدة فاضية لان الخميرة بتسبب تهيج جدار المعدة وده ممكن يسبب في انتفاخات البطن.

2- الحلويات:

اكل الحلويات على الريق بيعزز مستويات الانسولين ودي بدورها بتزود العبء بشكل كبير على البنكرياس اللي بيكون لسه في اول اليوم بيستعد للعمل وبالتالي ده ممكن يأدي لمرض السكر.

3- الزبادي ومنتجات الالبان المخمرة:

الزبادي ومنتجات الالبان المخمرة مش مضره بس ليها فايدة لا تذكر للجسم او فايدتها قليلة جدا لما بناكل المنتجات دي على الفطار بتكون حمض الهيدروكلوريك اللي بدوره بيساعد في قتل بكتيريا حمض اللاكتيك.

4- الكمثرى:

الكمثرى بتحتوي على نسبة من الالياف الخام اللي ممكن تضر الاغشية المخاطية الحساسة في المعدة لو اكلتيها على الريق.

5- الطماطم:

الطماطم بتحتوي على نسبة عالية جدا من حمض التانيك اللي بيزود حموضة المعدة وده ممكن يأدي للاصابة بقرح المعدة لو اكلناها على معدة فاضية.

6- الخيار والخضروات الخضرا:

الخضروات الخام تعتبر مصدر غني جدا بالاحماض الامينية ومع ذلك ممكن تسبب حرقة في المعدة, وانتفاخ, وآلام البطن لو اكلتيها على معدة فاضية.

7- الموز:

اكل الموز على معدة فاضية ممكن يسبب زيادة حادة في كمية الماغنسيوم في الدم وده ممكن يأدي لضرر في القلب.

8- التوابل والشطة:

التوابل الكتير والشطة او الاكلات الحراقة بشكل عام لو اكلتيها على معدة فاضية بتسبب ضرر وتهيج في الغشاء المخاطي في المعدة, وبتزود انتاج الحامض في المعدة, وده بدوره بيسبب معظم امراض والآم الجهاز الهضمي.

9- المشروبات الغازية الباردة:

شرب المشروبات الغازية على الريق الصبح ده ممكن يسبب تلف الغشاء المخاطي, وبيخفض امدادات الدم في المعدة وبتكون النتيجة ابطاء عملية الهضم وبيحصل عسر هضم.

10- الفواكة الحمضية:

الاحماض الموجودة في الفواكة الحمضية زي البرتقال واليوسفي وغيرها من الفواكة لما تاكليها على معدة فاضية ممكن تسبب حرقة المعدة, وبتزود مخاطر الاصابة بالتهاب المعدة وممكن توصل كمان لقرح المعدة.

– افضل الاكلات على معدة فاضية:

1- الشوفان:

الشوفان من الحاجات المفيدة جدا اللي ممكن تاكليها على الريق او كوجبة فطار لانه بيخلق طبقة واقية حوالين جدار المعدة بتحميه وبتمنع حمض الهيدروكلوريك انه يسبب اي ضرر للمعدة, الشوفان بيحتوي على الالياف القابلة للذوبان المفيدة في خفض نسبة الكوليسترول الضار في الجسم.

2- دقيق الذرة:

اي حاجة مصنوعة من دقيق الذرة تعتبر مفيدة جدا كوجبة فطار لانه بيساعد على ازالة السموم والمعادن التقيلة  من النظام الخاص بيكي, وبتخلي الامعاء الدقيقة تشتغل بشكل سليم, وكمان غير كده بتملى المعدة او بتديكي احساس بالشبع لوقت طويل.

3- جنين القمح:

معلقتين من جنين القمح يوميا بتمد الجسم بحوالي 15% من نسبة فيتامين E اللي محتاجها الجسم بشكل يومي, و10% من حمض الفوليك, وكمان بيساعد على تسهيل عمل الجهاز الهضمي وبيخليه يشتغل بشكل سليم وصحي.

4- البيض:

البيض من الاكلات اللي اكدت الابحاث انه بيساعد على خفض الكالوري او السعرات الحرارية بشكل ملحوظ جدا وبالتالي ده بيساعد على انقاص الوزن, وده لان البيض غني جدا بالبروتين اللي بيدي احساس بالشبع لوقت طويل لو اكلناه في وجبة الفطار.

5- البطيخ:

اكل البطيخ على الريق او على معدة فاضية بيمد الجسم بكمية كبيرة من السوائل, وغير كده مفيد جدا لصحة العين والقلب, لانه بيحتوي على نسبة عالية من عنصر الليكوبين.

6- التوت:

اثبتت الابحاث ان الانتظام على اكل التوت بيحسن من الذاكرة جدا, وبينظم ضغط الدم في الجسم, وبيحسن عملية التمثيل الغذائي خصوصا لو اكلتيه كوجبة فطار.

7- الخبز الاسمر من غير خميرة:

الكربوهيدرات والعناصر الغذائية اللي موجودة في الخبز الاسمر المصنوع من الحبوب الكاملة ضرورية جدا للجسم, وعشان تستفادي منها باكبر قدر ممكن انسب وقت لاكلها هو في وجبة الفطار.

8- المكسرات:

المكسرات من الحاجات المفيدة جدا اللي ممكن تاكليها في وجبة الفطار لانها بتحسن صحة الجهاز الهضمي, وبتعمل توازن للـ PH او الرقم الهيدروجيني في المعدة وبتخليها مرتاحة.

9- العسل:

اكل العسل الصبح على الريق من الحاجات اللي بتصحي الجسم وبتمده بالقوة والطاقة, وبيعزز نشاط المخ, وبيزود من هرمون السيروتنين او هرمون السعادة المسئول عن الحالة المزاجية وبيخلكي تحسي بسعادة وبيحسن المزاج وبيمنع الاكتئاب.

شوفي كمان 15 فايدة صحية وجمالية لزيت الزيتون مكنتيش تعرفيهم قبل كده !