فوايد واستخدامات اقراص الفحم الصحية والجمالية لازم تعرفيهم

ريهام محمود
ريهام محمود
في
بشرة
62640

الفحم المنشط هو شكل من اشكال الكربون المنشط المستخرج من الفحم ولكن مش الفحم اللي بنستخدمه في الشوي غالبا بيكون مصنوع من قشور جوز الهند او الخشب او مصادر طبيعية تانية تنفع للاستخدامات الصحية, وبيبقى نازل في كذا شكل اقراص او سائل او كبسولات او مسحوق بودرة , والنهاردة هنقولكم على فوايد واستخدامات اقراص الفحم مش بس استخدامات وفوايد صحية كمان فوايد جمالية للبشرة والشعر.

فوايد واستخدامات اقراص الفحم الصحية والجمالية:

1- علاج حب الشباب:

اقراص الفحم تعتبر من الحاجات الفعالة اللي بتساعد في علاج حب الشباب وده لان الكربون النشط اللي في الفحم بيمتص الشوائب والسموم من مسام الجلد وبينضفها وبالتالي بيعالج وبيمنع حب الشباب والبثور.

  • – اطحني قرص فحم وضيفي عليه 2 معلقة صغيرة من جل الصبار قلبيهم مع بعض كويس وافردي الخليط على بشرتك وسيبيه لحد ما ينشف وبعدين اغسليه بمية دافية, ممكن تكرري الماسك مرتين في الاسبوع.

– او اخلطي معلقة صغيرة من مسحوق الفحم مع معلقة صغيرة جل صبار الالوفيرا, معلقة صغيرة مية ورد, كام نقطة من زيت شجرة الشاي اخلطيهم كويس وحطيهم على البشرة من 7 – 10 دقايق وبعدين اغسلي البشرة بمية دافية.

  • – اخلطي 2 معلقة صغيرة من مسحوق الفحم مع 2 معلقة صغيرة زيت الافوكادة, معلقة سكر بني, حطي الفحم مع السكر وبعدين ضيفي لهم زيت الافوكادو قلبي المكونات كلها كويس مع بعض ووزعيها على البشرة وسيبيها 10 دقايق وبعدين اغسليها بمية دافية, والماسك ده مش بس مفيد في حب الشباب كمان بيغذي البشرة بسبب زيت الافوكادو اللي بيمد البشرة بفيتامين أ.

2- التخلص من لمعان البشرة وحمايتها من الالتهابات:

الفحم ليه فوايد للبشرة الدهنية بشكل خاص اللي بتعاني دايما من الدهون الزيادة واللمعان.

اخلطي 2 معلقة صغيرة من مسحوق الفحم مع قرصين اسبرين مطحونين وضيفي لهم شوية مية ورد لحد ما يتكون عندك عجينة تقدري تفرديها على بشرتك حطيها على البشرة وسيبيها 15 دقيقة وبعدين اغسليها بمية دافية.

3- علاج حبوب وبقع الضهر:

الفحم يعتبر فعال جدا في علاج حبوب وبقع الضهر, ومش بس كده كمان ممكن يساعد في التخلص من السيلوليت لانه بينقي الجسم من السموم المتراكمة وبيساعد على تقليل احتباس المية في الجسم.

 اخلطي معلقة كبيرة من مسحوق الفحم مع معلقة سكر ومعلقة كبيرة من زيت اللوز الحلو, افركي الجسم كله بالخليط في حركات دائرية لمدة دقايق, السكراب ده هينعم البشرة جدا وهيعالج الحبوب وهيخلي بشرتك صافية وخالية من اي عيوب.

4- تنقية وتفتيح البشرة وعلاج الرؤوس السودا والبيضا:

الفحم ليه قدرة على ازالة الشوائب من البشرة وتنضيف المسام وتقشير البشرة وبالتالي ده بيساعد في علاج مشكلة الرؤوس السودا وبينقي البشرة وبيساعد على تفتيحها وبيحافظ على نضارتها.

  • – اخلطي 2 معلقة فحم مطحون, 2 معلقة عسل نحل, كام نقطة ليمون اخلطيهم مع بعض كويس وادهني بيهم بشرتك وسيبيه 5 دقايق وبعدين افركي بشرتك بالراحة بمية فاترة.

– ممكن نعمل ماسك ال Peel off بالفحم هنخلط 2 معلقة جيلاتين مع معلقة كبيرة لبن وندوبهم مع بعض في حمام مية سخنة وبعدين نضيف لهم قرص فحم مطحون ونقلبهم مع بعض كويس ونفرد طبقة رقيقة من الخليط على البشرة ونسيبيه لحد ما ينشف خالص تقريبا 30 دقيقة وبعدين نقشره من على البشرة من تحت لفوق عكس اتجاه الشعر, هيشيل كل الرؤوس السودا والبيضا وهينضف المسام.

5- شد البشرة وتقليل حجم المسام:

الفحم من الحاجات الفعالة اللي بتساعد على شد البشرة وتقليل حجم الواسعة الواسعة.

  • – اخلطي 2 معلقة صغيرة فحم مطحون مع معلقة صغيرة مية ورد ومعلقة صغيرة عصير ليمون او جل صبار الالوفيرا اخلطيهم كويس وفردي الخليط على بشرتك وسيبيه 15 دقيقة وبعدين اغسليه بمية دافية.

– او اخلطي معلقة من مسحوق الفحم مع اللبن لحد ما تتكون عندك عجينة سميكة افردي طبقة رقيقة من العجينة على البشرة وسيبيها لحد ما تنشف وبعدين قشريها من على بشرتك واغسلي البشرة بمية دافية.

6- علاج ندبات الحبوب والجروح:

الفحم من الحاجات اللي بتساعد جدا في علاج الندبات اللي ممكن تنتج عن الحبوب والجروح.

اخلطي 2 معلقة من مسحوق الفحم مع 3 معالق كبيرة عسل نحل وحطي على البشرة كلها او مكان الندبات وسيبيه لحد ما ينشف وبعدين قشريه من على بشرتك واغسليها بمية دافية.

7- توحيد لو ن البشرة:

الفحم بيساعد على توحيد لون البشرة وعلاج التصبغات الجلدية.

اخلطي معلقة من مسحوق الفحم مع 2 معلقة مية ورد لحد ما تتكون عندك عجينة, افرديها على البشرة وسيبيها لحد ما تنشف وبعدين اغسليها بمية دافية.

8- علاج لدغات النحل والحشرات:

الفحم النشط كمان بيساعد في علاج لدغات النحل والحشرات وحتى الطفح الجلدي اللي ممكن يحصل من اللبلاب او انواع النباتات السامة لانه ليه قدرة على ازالة المواد السامة من الجسم وبتمنع التورم والالم اللي ممكن يحصل من اللدغة.

اطحني قرص فحم وضيفي عليه شوية زيت جوز هند لحد ما يكون عندك عجينة حطيها على المنطقة المصابة ولفيها بقطعة قماش وسيبيها شوية وبعدين اغسليها وكرري الوصفة كل كام ساعة خلال اليوم لحد ما يختفي مكان اللدغة.

فوايد واستخدامات اقراص الفحم الصحية والجمالية 1
فوايد واستخدامات اقراص الفحم الصحية والجمالية 1

9- تبييض الاسنان:

اقراص الفحم مفيدة جدا في التخلص من بقع الاسنان وطبقة البلاك وبيساعد على تبييضها لانه قادر انه يمتص كل المواد اللي ممكن تسبب البقع, وكمان بيحسن من توازن درجة الحموضة في الفم, ومش بس كده كمان الفحم بيمنع تسوس الاسنان, وامراض اللثة, ورائحة الفم الكريهة.

اطحني قرص فحم وبلي فرشة السنان بالمية وخدي من مسحوق الفحم على الفرشة وافركي بيها السنان بالطريقة العادية زي ما بتستخدمي معجون السنان وبعدين اغسلي الفم كويس عشان تتخلصي من اي اثار للفحم, ممكن تكرري الوصفة من مرة لمرتين في الاسبوع.

بس لو في حد عنده اي مشاكل في السنان ممكن قبل استخدام الفحم يستشيروا دكتور الاسنان الاول.

فوايد واستخدامات اقراص الفحم الصحية والجمالية 2
فوايد واستخدامات اقراص الفحم الصحية والجمالية 2

10- علاج قشرة الشعر وزيادة نموه:

الفحم بيحتوي على عناصر مضادة للبكتيريا والفطريات اللي بتساعد على تنضيف الشعر وعلاج وعلاج القشرة, وكمان بيساعد في زيادة نمو الشعر وتطويله.

ضيفي معلقة كبيرة من مسحوق الفحم لازازة الشامبو العادي اللي انتي بتستخدميه ورجيها كويس واغسلي بيه شعرك بالطريقة العادية, الطريقة دي هتخلصك من القشرة وهتنضف الشعر وفروة الراس.

فوايد واستخدامات اقراص الفحم الصحية والجمالية 3
فوايد واستخدامات اقراص الفحم الصحية والجمالية 3

11- علاج الغازات وانتفاخات المعدة:

الفحم من اكتر العلاجات الفعالة للغازات والانتفاخات لانه غير انه بيمتص السموم بيمتص كمان الاحماض والغازات المتراكمة في المعدة وبالتالي ده بيريح المعدة جدا وبيعالج عسر الهضم والانتفاخات والمغص.

  • – خدي قرص فحم مع كوباية مية كاملة قبل الوجبة بساعة وخصوصا لو هتاكلي حاجة بتسبب غازات وبعد الاكل اشربي كوباية مية كمان.

– ولعلاج الانتفاخات خدي من 2 – 3 اقراص فحم 3 مرات في اليوم.

ويفضل انك تاخديه لما بس تحسي ان معدتك مش مرتاحة او حاسة بانتفاخات مش لازم كل يوم يعني خديه وقت اللزوم بس.

12- علاج التسمم:

الفحم بيساعد في علاج التسمم سواء الغذائي او الناتج عن اي مادة كيميائية لانه بينقي ويطهر الجسم من السموم بيدخل جوه القناة الهضمية وبيخلص الجسم من كل المواد الضارة.

والجرعة المناسبة للفحم في حالة التسمم للبالغين من 25 – 100 جرام, وللاطفال من 25 – 50 جرام, وفي الغالب الجرعة بتعتمد على الوزن يعني تقريبا تبقى من 0.5 – جرام لكل كيلو جرام من وزن الجسم, وضروري تشربي مية كتير بعد ما تاخدي الفحم.

13- تخفيض الكوليسترول الضار:

ارتفاع الكوليسترول السيء او الضار في الجسم ممكن يسبب كتير من الامراض الخطيرة زي ضييق الشيرايين وده بيتسبب في صعوبة تدفق الدم وبالتالي ده ممكن يأدي للجلطات والنوبات القلبية والسكتات الدماغية.

والفحم ممكن يساعد في خفض الكوليسترول الضار, وعشان نعالج مشكلة الكوليسترول محتاجين جرعة فحم 8 جرام 3 مرات في اليوم يوميا لمدة 4 اسابيع.

بس ملحوظة مهمة متاخدوش الفحم من 90 دقيقة لساعتين من اخد اي علاج تاني او مكمل غذائي يعني لو بتاخدي علاج استني ساعتين وبعدين خدي اقراص الفحم لانها ممكن تمنع الجسم من الامتصاص السليم للمواد اللي في العلاج.

14- تطهير الجهاز الهضمي:

معظمنا تقريبا يوميا بتدخل لمعدتنا من الاكلات والمشروبات سموم ومواد كيميائية بيكون ليها تأثير سلبي على الجهاز الهضمي وبالتالي المعدة محتاجة لتطهير كل فترة, وعشان تطهري الجهاز الهضمي محتاجة جرعة حوالي 10 جرام من الفحم قبل كل وجبة ب 90 دقيقة لمدة يومين ورا بعض واشربي مية كتير بعد ما تاخديه.

15- منع حموضة المعدة:

لو اكلتي اكلة تقيلة سببت لك حموضة في المعدة اقراص الفحم ممكن تحل لك المشكلة دي لو اخدتيها هتنضف المعدة وتزيل منها السموم وهتريحها.

16- مفيد للكلى:

الفحم المنشط من الحاجات المفيدة جدا اللي ممكن تمنع تليف خلايا الكلى وبتحسن عمل الكلى, وده لانه زي ما قولنا الفحم بينضف الجسم من السموم والمواد الكيميائية وبالتالي ده بيساعد ان اجهزة الجسم تشتغل بشكل احسن.

17- علاج النقرس:

الفحم كمان فعال جدا في علاج النقرس لانه بيساعد على امتصاص حمض اليوريك اللي يعتبر ارتفاعه سبب في مرض النقرس والم المفاصل.

وعشان نعالج المشكلة دي اطحني كمية من اقراص الفحم تقريبا نص كوباية واخلطي معاها كمية كافية من المية لحد ما تكون عندك عجينة, املي البانيو بمية دافية ودوبي فيه عجينة الفحم وانقعي جسمك لمدة 30 دقيقة على الاقل وبعدين اغسلي جسمك بمية دافية, كرري الحمام ده من 2 – 3 مرات في الاسبوع هيخلصك من النقرس ومن الام المفاصل.

وممكن كمان تاخدي اقراص الفحم كعلاج عن طريق الفم.

فوايد واستخدامات اقراص الفحم الصحية والجمالية 4
فوايد واستخدامات اقراص الفحم الصحية والجمالية 4

شوفي كمان وصفات مذهلة بمية الارز لجمال البشرة والشعر

وصفات بمية الارز لجمال البشرة والشعر
وصفات بمية الارز لجمال البشرة والشعر

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

10 وصفات طبيعية لتغذية بشرتك في الشتا

10 وصفات طبيعية لتغذية بشرتك في الشتا