10 طرق تعملي بيهم ديتوكس لشعرك عشان تخليه صحي

بقلمريهام محمود فيشعر visibility5787

شعرنا بيتعرض يوميا لحاجات كتير بتأثر عليه زي الحرارة والشمس والتراب والسيشوار والمكوى وكل ده بيأثر على الشعر بشكل سلبي وبيسبب له الجفاف والتقصف وانقسام اطراف الشعر, وعشان نحاول ننقذ الشعر من كل الحاجات اللي بتأثر عليه محتاج اننا ننضفه ونطهره ونطرد منه السموم, عشان كده احنا هنقولكم النهاردة على 10 طرق ديتوكس للشعر لعلاجه عشان تخليه يبقى اقوى وينمو بشكل احسن وتحافظي على صحته ولمعانة.

10 طرق ديتوكس للشعر:

1- تطهير فروة الراس:

من المعروف دايما من زمان اننا عشان نحافظ على صحة الشعر المفروض اننا نغسله بالشامبو مرات اقل, لكن بتكون المشكلة مع صاحبات الشعر الدهني او اللي بيزيت بسرعة بيكونوا محتاجين يغسلوا شعرهم بشكل منتظم ويمكن بيكونوا محتاجين غسيله يوميا عشان يحافظوا على نضافته لان كل الخبراء المتخصصين بالشعر دايما بيقولوا ان فروة الراس النضيفة هي المفتاح لصحة ونمو الشعر, لان فروة الراس زي مسام البشرة بالظبط ممكن تتسد من كتر الزيوت او تراكم منتجات الشعر عليها عشان كده بتكون محتاجة تنضيف بشكل مستمر, والخبراء بينصحوا باستخدام انواع الشامبو اللي بتحتوي على مكونات زي كبريتيد السيلينيوم, حمض الصفصاف, او الزنك بيرثيون, لان المكونات دي بتساعد على تنضيف عميق لفروة الراس وفي نفس الوقت بترطبه, وعشان ننضف الشعر بشكل صح بالشامبو ونحافظ على صحتة ندلك الشامبو على الشعر من تحت عند مؤخرة الرقبة ونطلع على فوق واحدة واحدة لحد خط الشعر من قدام وده لان الجزء اللي من تحت في الشعر بيكون اكتر جزء سميك وبيتراكم فيه العرق والدهون والزيوت عشان كده بيكون محتاج تنضيف اكتر.

تطهير فروة الراس
تطهير فروة الراس

2- حاولي تتجنبي الحرارة:

استخدام الحرارة بشكل يومي على الشعر سواء السيشوار او المكوى من اكتر الحاجات اللي ممكن تضر الشعر وتسبب جفافه وتقصفة, عشان كده ضروري اننا نستخدم سبراي حامي للحرارة قبل السيشوار او المكوى عشان نحمي الشعر ممكن نستخدم سبراي تيرسميه او دوف او لوريال, ودايما نظبط الحرارة على الدرجة المتوسطة لان العالية اوي هتحرق الشعر والمنخفضة اوي هتخليكي تعيدي على الشعر كذا مرة وتضغطي عليه زيادة وده بردو ممكن يضر الشعر ويحرقه, وممكن تدي شعرك راحة من الحرارة وبعد ما تغسليه وهو رطب شوية قسميه خصل ولفيها على بكر شعر كبير وسيبيه لما ينشف وبعدين فكيه هيديكي شكل حلو مع تموجات, وممكن تغسليه من بالليل وتضفيريه هتصحي الصبح تفكيه هتلاقي معمول ويفي طبيعي.

حاولي تتجنبي الحرارة
حاولي تتجنبي الحرارة

3- رطبي شعرك قبل الغسيل:

الشعر محتاج تجديد عشان نحافظ على رطوبته ونعومته عشان كده لازم نحافظ بشكل مستمر اننا نعمل ماسك ترطيب للشعر قبل غسيله بالشامبو مرة في الاسبوع على الاقل, ممكن تدلكي الشعر وهو ناشف قبل ما تغسليه باي نوع زيت وتسيبيه 15 دقيقة وبعدين تغسليه بالشامبو, ممكن تستخدمي زيت البابونج عشان يدي لمعان للشعر, زيت جوز الهند لتنعيم الشعر, وزيت المسك لتعزيز نمو الشعر, وزيت الارجان للترطيب, او اي نوع زيت تاني من الزيوت الطبيعية.

رطبي شعرك قبل الغسيل
رطبي شعرك قبل الغسيل

4- رطبي شعرك بعمق مرة في الاسبوع:

الطبقة الخارجية للشعر بتتكون من خلايا بروتين اللي هو الكيراتين ودي بتعمل حاجز على الشعر بتحميه من العوامل الخارجية لكن الحاجز ده بيضعف بسبب تعرض الشعر لعوامل الجو والشمس والحرارة والصبغة وده بيضعف الشعر, عشان كده لازم نعمله ترطيب عميق مرة في الاسبوع, ممكن تستخدموا كريم بانتين برو في لترميم الشعر حطيه على الشعر بعد ما تغسليه بالشامبو من الجذور للاطراف وسيبيه من 10 – 30 دقيقة ولو شعرك طويل ممكن تسيبيه فترة اطول, وبعدين اشطفيه بمية دافية لان المية السخة اوي بتأثر على الزيوت الطبيعية اللي بتغذي الشعر وده هيضعف رطوبة الشعر وهيخليه جاف.

رطبي شعرك بعمق مرة في الاسبوع
رطبي شعرك بعمق مرة في الاسبوع

5- اتجنبي الصبغة بشكل مستمر:

ريحي شعرك من الصبغة لانها من الحاجات اللي بتضعف الشعر وبتنشفه, ولو هتصبغي حاولي تستخدمي الانواع الخالية من الامونيا او البيروكسيد لانهم بيتلفوا الشعر, وكمان اكد الخبراء ان تفتيح الشعر المصبوغ بيضعف الشعر بنسبة 60% اكتر, ولما تصبغي ضروري انك ترطبي شعرك بعمق مرتين في الاسبوع عشان نعالج التأثير السلبي اللي بيحصل على الشعر من الصبغة.

اتجنبي الصبغة بشكل مستمر
اتجنبي الصبغة بشكل مستمر

6- استخدمي صودا الخبز كمطهر طبيعي:

صودا الخبز او الكربوناتو تعتبر مطهر طبيعي ممكن تستخدميها لتنضيف الشعر وبتزيل بقايا منتجات الشعر والزيوت المتراكمة على الشعر, ضيفي معلقة كبيرة من الكربوناتو على كمية من الشامبو وحطي الخليط على الشعر ودلكيه كويس وركزي على فروة الراس وبعدين اشطفيه بالمية.

استخدمي صودا الخبز كمطهر طبيعي
استخدمي صودا الخبز كمطهر طبيعي

7- استخدمي زيت الزيتون:

زيت الزيتون بيحتوي على الاحماض الامينية المفيدة جدا للشعر وبتساعد على ترطيبة وحمايته من التلف, هاتي كمية من زيت الزيتون تكفي طول وكثافة شعرك ودفيها على النار لمدة من 10 – 15 ثانية يعني تبقى يادوب دافية بس ودلكي شعرك كويس وهو ناشف بالزيت وغطيه بطاقية الشعر او كيس بلاستيك وسيبيه لمدة 20 دقيقة وبعدين اغسلية بالمية الدافية والشامبو.

استخدمي زيت الزيتون
استخدمي زيت الزيتون

8- استخدمي البيض:

البيض غني جدا بالبروتين والاحماض الامينية اللي بتغذي الشعر وبتساعد على تقويتة وتكثيفه وبتمنع التقصف وتكسر الشعر, اخلطي بيضة مع كمية من الشامبو وحطي الخليط على شعرك وسيبيه لمدة 5 دقايق وبعدين اغسليه بالمية والشامبو.

استخدمي البيض
استخدمي البيض

9- استخدمي خل التفاح:

حمض الخليك الموجود في الخل بيساعد على تنضيف الشعر من بقايا المنتجات ومن الزيوت والدهون, اخلطي 2 معلقة كبيرة من خل التفاح مع كوباية مية وبعد ما تغسلي شعرك بالشامبو صبي الخليط ده عليه كله وسيبيه لمدة دقيقة لحد ما الشعر يمتصه كويس وبعدين اشطفيه بالمية وبعدين رطبيه بالبلسم.

استخدمي خل التفاح
استخدمي خل التفاح

10- استخدمي زيت شجرة الشاي:

زيت شجرة الشاي يعتبر مطهر طبيعي للشعر وبيساعد في القضاء على البكتيريا اللي ممكن تضر الشعر, وتسبب قشرة الشعر, ضيفي كام نقطة من زيت شجرة الشاي على الشامبو العادي بتاعك ودلكي بيه شعرك وفروة الراس لمدة من 5 – 7 دقايق وبعدين اشطفيه بالمية.

استخدمي زيت شجرة الشاي
استخدمي زيت شجرة الشاي

شوفي كمان 7 اسرار جمالية من الهند هتخلي شعرك يطول بسرعة

اسرار جمالية لتطويل الشعر بسرعة
اسرار جمالية لتطويل الشعر بسرعة