وصفة سهلة تحصلى بيها على نوم عميق وتصحى كلك نشاط وحيوية !
كل واحدة فينا ليها طقوس الخاصة بيها قبل النوم ، و كمان فىىحاجات معينة بنعملها كل يوم لما بنصحى زى اننا مثلا بنفكر ايه اللى مستنينا النهاردة و ورانا ايه نعمله، او بنطفى المنبه و ننام خمس دقيق كمان، و فى ناس بيقدروا يصحوا الصبح وكلهم نشاط وحيوية من غير ما يحسوا انهم كسلانين او تعبانين . خبير الصحة “Craig Ballantyne” بيقول انه فى علاقة بين الاكل و القدرة على الصحيان بدرى الصبح فى نشاط و اخترع وصفة او طريقة اسمها ” 10-3-2-1-0″اللى لومشيتى عليها هتساعدك تنامى بعمق و تصحى مرتاحة و كلك نشاط وحيوية ، واحنا فى المقال ده هنقولك على الوصفة دى و نقولك ايه هى الخطوات اللى تمشى عليها .
وصفة سهلة تحصلى بيها على نوم عميق وتصحى كلك نشاط وحيوية !
حسب الوصفة، الخطوات اللى محتاجة تمشى عليها علشان تقدرى تنامى بعمق هى انه لازم تبداى تحضرى لنومك من بعد الضهر، وفى خمس حاجات أساسية لازم تعمليها :
10 ساعات قبل النوم : ماتشربيش اى حاجه فيها كافيين.
3 ساعات قب النوم : ماتاكليش.
ساعتين قبل النوم : وقفى اى شغل بتعمليه.
ساعة قبل النوم: اطفى التليفزيون و ابعدى عن اللابتوب او الموبايل نهائيا.
0: لما المنبه يضرب الصبح ماتدوسيش على الـ Snooze ابدا.
و دلوقتى خلينا نشرخ الخطوات دى واحده واحده …
10 ساعات قبل النوم :
الـ 10 ساعات هى المدة اللى بتحتاجها الدورة الدموية علشان تنقى نفسها من تاثيرات الكافيين و الاكل و السكر اللى بيكتسبه الجسم من العصاير و الحلويات، علشان كده مهم انه اخر مشروب فيه كافين تشربيه يكون قبل نومك بـ 10 ساعات كاملين.
3 ساعات قبل النوم:
جسمك بيبقى محتاج انه يرتاح من بذل المجهود و الطاقة طول اليوم علشان يقدر يهضم العشاء او يقدر يخلص نفسه من المواد المضرة اللى مكن يكون جسمك اكتسبها طول اليوم من الاكل .
ساعتين قبل النوم :
لازم قبل ساعتين من نومك توقفى اى نشاط او اى حاجه بتعمليها ليها علاقة بشغلك، و حتى ماتفكريش فى اى حاجه ليها علاقة بالشغل. اجلى كل حاجه لوقت الشغل بكرة و حاولى تسترخى و تريحى دماغك.
ساعة قبل النوم :
اقفلى كل الاجهزة الالكترونية بتاعتك، التليفزيون و اللابتوب و الموبايل، و الراوتر و ماترديش على التليفون ولا تعملى شات ولا اى حاجه، ادى لعينيكى و عقلك الفرصة انهم يرتاحوا و يسترخوا علشان تقدرى نحصلى على نوم عميق .
ماتدوسيش على الـ Snooze :
لو قومتى من السرير اول ما المنبه يضرب من غير ما تدوسى على الـ Snooze هتعودى نفسك مع الوقت على انك تقومى من النوم من غير ما تنامى تانى لوقت قصير زى ما بنقول هنقوم كمان خمس دقايق مثلا، لانه عادة الـ Snooze دى بتدخل جسمك فى دورة نوم جديدة مابتكملش فبتقومى كسلانة و تعبانة جدا.
جربى الوصفة دى ونفذى الخطوات و ساعتها هتقدرى تحصلى على نوم عميق و صباح كله نشاط و حيوية و تقرى تعملى اى حاجه انتى محتاجاها فى يومك ، احلام سعيدة :)
شوفي كمان 20 حيلة سهلة هتساعدك تصحي بدري نشيطة !
