9 حاجات غريبة بيعملها جسمك مكنتيش تعرفي انها وسائل دفاع عن الجسم !
الجسم بيتركب من اجهزة ونظام بيولوجي معقد جدا صعب اننا نفهمه, واللي منعرفهوش ان ساعات كتير الجسم بيعمل حاجات تعتبر وسائل دفاع بتحمي الجسم على مدار ال24 ساعة كل يوم من حاجات ممكن تؤذينا, والنهاردة من خلال موضوعنا هنقولكم على 9 وسائل دفاع عن الجسم بتحصل لنا تقريبا كل يوم لكن مكناش نعرف انها بتحصل كوسيلة دفاع ضد حاجة كانت ممكن تأذينا.
9 وسائل دفاع عن الجسم:
1- التثاؤب:
التثاؤب من الحاجات اللي بتحصلنا يوميا واكتر من مرة في اليوم ولما بيحصل كتير مننا بيفتكر ان ده معناه اننا عايزين ننام لكن ده مش صحيح التثاؤب يعتبر وسيلة من وسائل الدفاع عن الجسم ومعناه ان المخ كان عليه ضغط او طاقة زيادة عن اللزوم فبيحصل التثاؤب عشان يهدي المخ ويخفف الضغط اللي عليه.
2- العطس:
العطس بيحصل لما الممرات الانفية بتتملي بالغبار والجراثيم والمواد المسببة للحساسية او اي حاجة ممكن تسبب لنا مشكلة او تهيج الجيوب والممرات الانفيه والعطس هو الوسيلة الدفاعية اللي بتخلصنا من المشاكل والسموم دي عشان تخرجها من الممرات الانفية.
3- التمدد Stretching:
اول ما بنصحى من النوم معظمنا تقريبا بنعمل تمدد او استريتشنج للجسم وبالحركة دي احنا بنجهز الجسم لكل اللي هيتعرض ليه خلال فترة النهار, وبيعمل تمدد للعضلات وبيعيد تدفق الدم في الجسم وبيحسن المزاج.
4- الزغطة “الفواق”:
لما بناكل بسرعة او بنبلع كمية كبيرة من الاكل مرة واحدة او لو اكلنا وجبة دسمة ده بيهيج العصب الرئوي المعدي وده مرتبط بالمعدة والحجاب الحاجز وبتكون نتيجة ده انه بتحصلنا الزغطة كوسيلة دفاع عن الجسم.
5- الهزة او الرعشة العضلية “الرمع العضلي”:
اكيد في كتير مننا مر بالاحساس ده وهو بيجي احيانا لبعضنا في بداية النوم وهو عبارة عن شعور غريب بتحسي فيه كانك بتقعي في الفراغ او بتقعي من مكان عالي او كانه حصلك صدمة كهربائية وفي اللحظة دي بيحصل تشنج شديد وبتقومي فجأة من النوم, والاعراض دي بتحصل لانه اول ما بتبدأي تروحي في النوم معدل التنفس بتاعك بينخفض بسرعة والنبض بيبطأ والعضلات بترتخي فالدماغ بيفسر ده على انه انذار بالموت فبتحصل ساعتها الهزة العضلية دي كوسيلة دفاع عن الجسم عشان تنبهك وتقومي من النوم.
6- تجعد الجلد:
التجاعيد اللي بتظهر على بشرة الايد بيكون معناها ان البشرة فيها كمية زيادة من الرطوبة وعشان كده هنلاقي ده دايما بيحصل لنا بعد الحمام او لما نعرض ايدينا لمية لفترات طويلة وفي اللحظة دي الجلد بيبدأ يغير من شكله او طبيعته كوسيلة دفاع عشان تقدري تتعاملي مع الاسطح الناعمة بشكل اسهل واامن.
7- فقدان الذاكرة:
احيانا بيجي علينا لحظات نسيان او فقدان ذاكرة ودي بيحصل لما بتمري بتجربة مش حلوة او حزينة فالمخ كوسيلة دفاع بيحذف اللحظات دي من الذاكرة.
8- القشعريرة:
بنلاقي ساعات كتير وخصوصا في ايام البرد بيحصل لنا ان مسام الايد بتبقى واضحة اوي او اللي احنا بنقول عليها القشعرة وده معناه ان كمية الحرارة اللي في الجسم بتخرج عن طريق المسام, وده بينبه الجسم انك محتاجة تدفئة.
9- الدموع:
بصرف النظر ان الدموع بتحمي الغشاء المخاطي للعين, هي تعتبر وسيلة دفاع عاطفي وبيعتقد العلماء ان الجسم في حالات التوتر بيخلق مصدر قوة جديد اللي هو الدموع عشان يشتت الشخص عن الالم اللي هو حاسس بيه او اللي بيعاني منه.
ودي تعتبر بعض الحاجات اللي جسمنا بيعملها كل يوم عشان يحمينا من اي ضرر ممكن يحصل لنا.
شوفي كمان 10 عادات خاطئة بتعمليها كل يوم هتخلي سنك يكبر بسرعة !
